ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្នុងស្មារតីស្នេហាជាតិ និងសាមគ្គីភាព មន្រ្តីជំនាញក្រសួងបរិស្ថានតាមតំបន់ក្នុងខេត្តត្បូងឃ្មុំ សៀមរាប កំពង់ស្ពឺ មណ្ឌលគិរី និងកោះកុង បាននិងកំពុងចែករំលែកចំណេះដឹង និងបំផុសសកម្មភាពដាំបន្លែបង្ការ នៅតាមសាលារៀន វត្តអារាម និងសហគមន៍ ដើម្បីផលិតបន្លែសុវត្ថិភាព ជួយផ្គត់ផ្គង់គ្រួសារ ផ្តល់ស្បៀងសម្រាប់សមរភូមិជួរមុខ និងជួយជនភៀសសឹក ក្នុងតម្រូវការចាំបាច់ណាមួយ។
ឯកឧត្តមបណ្ឌិត អ៊ាង សុផល្លែត រដ្ឋមន្រ្តីក្រសួងបរិស្ថាន មានប្រសាសន៍ថា ក្រសួងបរិស្ថាន បានជំរុញឱ្យមន្រ្តីជំនាញ ចែករំលែកចំណេះដឹងលើការដាំដុះ កូនឈើចម្រុះ និងបន្លែសេរីរាង្គ ជាមួយលោកគ្រូអ្នកគ្រូ សិស្សានុសិស្ស រួមទាំងអាជ្ញាធរមូលដ្ឋាន និងប្រជាពលរដ្ឋនៅតាមសហគមន៍មូលដ្ឋាន។ បើតាមឯកឧត្តមរដ្ឋមន្រ្តី កូនឈើហូបផ្លែ និងបន្លែសេរីរាង្គ គឺអាចដាំដុះងាយបានផល ក្នុងនោះបន្លែដែលមានរយៈពេលខ្លី មានដូចជា ស្ពៃគ្រប់ប្រភេទ ត្រកួន ត្រប់ ជាដើម អាចបម្រើការចាំបាច់ក្នុងជីវភាពប្រចាំថ្ងៃ ជួយលើកកម្ពស់សន្តិសុខស្បៀងគ្រួសារ ជួយបង្កើនចំណូលសម្រាប់ជីវភាព និងជួយដល់ពលរដ្ឋភៀសសឹកផង និងការគាំទ្រវីរកងទ័ពជូរមុខដ៏អង់អាចក្លាហាន ដែលកំពុងឈរជើងការពារទឹកដី ប្រយុទ្ធប្រឆាំងនឹងចោរឈ្លារនពាន នៅតាមបន្ទាត់ព្រំដែនកម្ពុជា-ថៃ។
សកម្មភាពនេះ គឺជាការចូលរួមចំណែកក្នុងចលនា “យើងរួមគ្នាដើម្បីជាតិ” ផ្ដួចផ្ដើមគំនិតដោយលោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត អគ្គស្នងការសមាគមកាយឫទ្ធិនារីកម្ពុជា ក្នុងគោលបំណងផុសសកម្មភាពដាំបន្លែ ដែលអាចឆាប់ប្រមូលផលបាន នៅតាមសាលារៀន ផ្ទះសំបែង វត្តអារាម និងដីសហគមន៍ សំដៅកសាងកសិផលជាតិ ដើម្បីទ្រទ្រង់ដល់វីរកងទ័ព វីរនគរបាលជួរមុខការពារព្រំដែន និងជនភៀសសឹកដោយសារការឈ្លានពានពីប្រទេសថៃ។
សូមជំរាបជូនដែរថា ការដាំបន្លែបង្ការតាមសាលារៀន ទីវត្តអារាម និងសហគមន៍នេះ ក៏ស្របតាមយុទ្ធសាស្រ្តនិងគោនយោបាយ របស់រាជរដ្ឋាភិបាលកម្ពុជា ក្នុងនោះយុទ្ធសាស្រ្តចក្រាវិស័យបរិស្ថាន ដែលក្នុងនោះសសរស្ថម្ភទី២ គឺ«ភាពបៃតង»។ យ៉ាងណា អ្នកចូលរួមបានប្ដេជ្ញា ចូលរួមដាំដុះ និងថែទាំពន្លកបៃតង (កូនឈើនិងបន្លែបង្ការ) ឱ្យបានរីលូតលាស់ល្អ ឆ្លើយតមតម្រូវការក្នុងគ្រួសារ និងសង្គមជាតិ ជាពិសេសក្នុងស្មារតីខ្មែរជួយខ្មែរ ខ្មែររួមសាមគ្គីគ្នា ខ្មែរស្រឡាញ់សន្តិភាព៕
