សាលារៀនចំនួន ៣៧៧សាលា ស្ថិតក្នុងខេត្តជាប់ព្រំដែនចំនួន៤ តាម​បណ្តោយ​ព្រំដែន​កម្ពុជា-ថៃ ត្រូវ​បានផ្អាក​ដំណើរការ​បង្រៀន និង​រៀន​ជា​បណ្តោះអាសន្ន ដែល​ធ្វើ​ឱ្យ​គ្រូ និងសិស្សប្រមាណ៨ម៉ឺននាក់កំពុង​រងផលប៉ះពាល់។ ស្របគ្នានេះ ក្រសួងអប់រំ​កំពុង​តែ​ធ្វើការ​យ៉ាង​ជិតស្និទ្ធជាមួយ​អាជ្ញាធរ ដើម្បី​អាច​ចាត់វិធានការ​ទាន់ពេលវេលា ដើម្បីរក្សា​សុវត្ថិភាព​សិស្ស គ្រូបង្រៀន បុគ្គលិកអប់រំទាំងអស់​នៅ​តាម​តំបន់ព្រំដែន។

លោកជំទាវបណ្ឌិត ឃួន វិច្ឆិកា អ្នកនាំពាក្យក្រសួងអប់រំ មានប្រសាសន៍ថា ដោយសារការវាយប្រហារបស់យោធាថៃនៅតាមបណ្ដោយព្រំដែន សាលារៀនសរុបចំនួន ៣៧៧សាលាបានបិទទ្វារ ដែលសាលារៀនទាំងនេះស្ថិតនៅក្នុងខេត្តចំនួន៤ រួមមាន ខេត្តឧត្តរមានជ័យ ខេត្តបន្ទាយមានជ័យ ខេត្តព្រះវិហារ និងខេត្តពោធិ៍សាត់។

អ្នកនាំពាក្យក្រសួងអប់រំ បញ្ជាក់ថា ការបិទសាលារៀនទាំង ៣៧៧សាលានេះ ធ្វើឱ្យគ្រូបង្រៀនប្រមាណ ៣១៩៧នាក់ និងសិស្សសរុប ៧៨៥៨៥នាក់រងផលប៉ះពាល់។

«ពេលនេះក្រសួងអប់រំ នៅតែបន្តធ្វើការងារយ៉ាងជិតស្និទ្ធជាមួយគណៈគ្រប់គ្រងសាលារៀន ក៏ដូចជាមន្ទីរអប់រំយុវជននិងកីឡាខេត្តនានានៅតាមតំបន់ព្រំដែន ធ្វើយ៉ាងណារក្សាសុវត្ថិភាពរបស់ប្អូនៗ​ លោកគ្រូ អ្នកគ្រូ ក៏ដូចជាបុគ្គលិកអប់រំទាំងអស់»

សម្រាប់លោកបណ្ឌិត ឈត ប៊ុនថង មន្ត្រីស្រាវជ្រាវផ្នែកទំនាក់ទំនង វប្បធម៌ អប់រំ និងទេសចរណ៍ នៃរាជបណ្ឌិត្យសភាកម្ពុជា យល់ឃើញថា ការសម្រេចផ្អាកដំណើរការសាលារៀនតាមបណ្ដោយព្រំដែន ជាពិសេសជាតំបន់ដែលប៉ះទង្គិចគ្នា ដែលរងការបាញ់ប្រហាពីកងទ័ពថៃ គឺជាចំណាត់ការមួយដ៏ត្រឹមត្រូវ ពីព្រោះសុវត្ថិភាព សន្តិសុខ គឺជារឿងចម្បងបំផុត។

«អ្វីដែលសំខាន់ជម្លៀសបងប្អូន សិស្សានុសិស្ស លោកគ្រូ អ្នកគ្រូ មកទីទួលសុវត្ថិភាពសិន ចាំរកវិធីដោះស្រាយក្រោយទៀត»

លោកបណ្ឌិត ឈត ប៊ុនថង បន្ថែមថា ជម្លោះប្រដាប់អាវុធព្រំដែនកម្ពុជា-ថៃនេះ អាចនឹងអូសបន្លាយវែងឆ្ងាយទៀត ដូច្នេះគួរពិចារណារកទីទួលសុវត្ថិភាព កន្លែងជំរុំជនភៀសខ្លួនត្រូវរៀបចំឱ្យមានសាលារៀនបណ្ដោះអាសន្ន ឬសង់រោងបណ្ដោះអាសន្ននៅកន្លែងមានសុវត្ថិភាពដើម្បីឱ្យសិស្សអាចរៀន ព្រោះបើមិនដូច្នោះទេ សិស្សរត់ចុះរត់ឡើងនឹងមិនបានរៀនសូត្រនោះទេ។

ស្របគ្នានេះដែរ អង្គការ​ទស្សនៈពិភពលោក​អន្តរជាតិ ប្រចាំ​នៅ​កម្ពុជា ដែលធ្វើការងារលើកុមារ ក៏​កំពុងបង្ហាញពីក្តីបារម្ភ​ចំពោះសុវត្ថិភាពកុមារ​ ចំពោះ​ការ​ប៉ះទង្គិចគ្នា​នៅ​តាម​បណ្តោយព្រំដែន​កម្ពុជា-ថៃ ដែលបណ្តាលឱ្យមានការផ្លាស់ទី និងការរំខានដល់អាយុជីវិត ហើយ​កុមារ គឺជាជនងាយរងគ្រោះបំផុត​ក្នុងវិបត្តិនេះ។ របាយការណ៍​ដែលអង្គការ​មួយនេះទទួលបាន គិតមកត្រឹមល្ងាចថ្ងៃទី៨ ខែធ្នូ មានគ្រួសារចំនួនជាង ៤៨៥០ក្នុងនោះមាន​មនុស្ស​ចំនួន​ជាង១៧០០០ នាក់ រួមទាំងកុមារ ស្ត្រីមានផ្ទៃពោះ មនុស្សចាស់ និងជនពិការត្រូវបានជម្លៀស នៅ​ក្នុង​ខេត្ត​ព្រះវិហារ និង​ឧត្តរមានជ័យ។

ជាមួយគ្នានេះ លោកបណ្ឌិត វីល ផាកស៍ នាយកអង្គការ​យូនីសេហ្វ​ប្រចាំ​នៅ​កម្ពុជា ក៏​បានសម្តែង​ការ​ព្រួយបារម្ភដែរ ដោយថា កុមារត្រូវតែទទួលបានការការពារគ្រប់ពេលវេលា ហើយសុវត្ថិភាព និងសុខុមាលភាពរបស់ពួកគេ ត្រូវតែចាត់ទុកជាអាទិភាពចម្បង។ ហើយពេលនេះ យូនីសេហ្វ កំពុងតាមដានស្ថានភាពនេះយ៉ាងយកចិត្តទុកដាក់ និងសហការជាមួយអាជ្ញាធរ ដើម្បីវាយតម្លៃតម្រូវការ និងផ្ដល់ការគាំទ្រចាំបាច់ដល់គ្រួសារ និងកុមារដែលរងផលប៉ះពាល់៕