ជា​ឱកាសសម្រាប់លោកគ្រូ អ្នកគ្រូ ដែលកំពុងបង្រៀន​នៅ​តាម​សាលា​រៀន​បឋមសិក្សា មធ្យមសិក្សា និង​សាលាគរុកោសល្យ នៅទូទាំងប្រទេស​កម្ពុជា, សម្រាប់ឆ្នាំ​២០២៦នេះ កម្មវិធីអាហារូបករណ៍ Teacher Training Students របស់ក្រសួងអប់រំ វប្បធម៌ កីឡា វិទ្យាសាស្រ្ត និង​បច្ចេកវិទ្យា នៃប្រទេស​ជប៉ុន នឹង​ផ្តល់អាហារូបករណ៍មួយចំនួន​ដល់​គ្រូបង្រៀន​កម្ពុជា ដើម្បីទៅ​សិក្សា​ស្រាវជ្រាវ​លើវិស័យ​អប់រំ​នៅ​ប្រទេស​ជប៉ុន ចាប់ពីខែកញ្ញា ឬតុលា ឆ្នាំ២០២៦។

អាហារូបករណ៍នេះ នឹងផ្តល់ប្រាក់​សម្រាប់ផ្គត់ផ្គង់ការរស់នៅ, រ៉ាប់រងថ្លៃសេវាសុខភាព, ការ​ស្នាក់នៅ និង​ថ្លៃ​សំបុត្រយន្តហោះ​ទៅមក កម្ពុជា ជប៉ុន កម្ពុជា។

មុខវិជ្ជា​ដែលត្រូវ​សិក្សា​ស្រាវជ្រាវ​ រួមមាន៖ Educational Administration (ex. Educational administration and finance, school Management), Educational methods (ex. Instruction, learning system theory, curriculum, educational assessment). Specialized subject research (ex. Mathematics, Physics, Chemistry, Gymnastics). Observational Tours and practice (ex. Class observation, participation in special educational activities, tour of educational research facilities)។

លក្ខខណ្ឌនៃការចុះឈ្មោះជាបេក្ខជន ៖ បេក្ខជនទាំងពីរភេទត្រូវមានសញ្ជាតិខ្មែរ, បានបញ្ចប់ការសិក្សាពីសាលាគរុកោសល្យណាមួយ និងកំពុងបង្រៀននៅតាមសាលាបឋមសិក្សា សាលាមធ្យមសិក្សា ឬសាលាគរុកោសល្យនានានៅកម្ពុជា ដែលមានរយៈពេលបំពេញការងារយ៉ាងតិច ៥ឆ្នាំ (គិតដល់ថ្ងៃទី១ ខែតុលា ឆ្នាំ២០២៦), មានអាយុមិនលើសពី ៣៥ឆ្នាំ (កើតត្រឹម ឬក្រោយថ្ងៃទី២ ខែមេសា ឆ្នាំ១៩៩១), មានចំណេះដឹងភាសាអង់គ្លេសកម្រិតមធ្យម និងមានឆន្ទៈសិក្សាភាសាជប៉ុន, មានសុខភាពល្អបរិបូណ៌ទាំងកាយសម្បទា និងសតិបញ្ញា។

កាលបរិច្ឆេទ និងទីកន្លែងទទួលពាក្យ ៖ បេក្ខជនដែលមានចំណាប់អារម្មណ៍ ចំពោះកម្មវិធីអាហារូបករណ៍ខាងលើ សូមទាញយកពាក្យស្នើសុំ អាហារូបករណ៍ (Application Form) ជាភាសាអង់គ្លេស ដែលមាននៅក្នុងគេហទំព័ររបស់ស្ថានទូតជប៉ុន នៅ ភ្នំពេញ https://www.studyinjapan.go.jp/en/smap-stopj-applications-teacher.html និងពាក្យសុំប្រឡង អាហារូបករណ៍ជាភាសាខ្មែរ មកបំពេញដោយចាំបាច់ត្រូវភ្ជាប់មកជាមួយនូវព្រឹត្តិបត្រពិន្ទុ ពីសាលាគរុកោសល្យ ណាមួយដែលបេក្ខជនបានសិក្សា (មជ្ឈមណ្ឌលគរុកោសល្យភូមិភាគ ឬសាលាគរុកោសល្យ ឬវិក្រឹតការខេត្តជាដើម) រួចយកទៅដាក់នៅនាយកដ្ឋានសហប្រតិបត្តិការអន្តរជាតិ និងកិច្ចការអាស៊ាន ដែលមានអាសយដ្ឋានអគារលេខ ២៣ ផ្លូវលេខ៣៦០ សង្កាត់បឹងកេងកង១ ខណ្ឌបឹងកេងកង រាជធានីភ្នំពេញ (ខាងកើតស្ថានីយទូរទស្សន៍អប្សរា ចម្ងាយប្រហែល៥០ម៉ែត្រ) ឱ្យបានមុនថ្ងៃទី២៣ ខែមករា ឆ្នាំ២០២៦ វេលាម៉ោង១៦ម៉០០នាទី។

កាលបរិច្ឆេទ និងទីកន្លែង នៃការប្រឡង ៖ ក្រសួងអប់រំ យុវជន និងកីឡា សហការជាមួយស្ថានទូត នឹងរៀបចំការប្រឡងសំណេរវិញ្ញាសា ភាសាជប៉ុន និងភាសាអង់គ្លេស នាថ្ងៃទី១៦ ខែកុម្ភៈ ឆ្នាំ២០២៦ នៅស្ថានទូតជប៉ុន ប្រចាំព្រះរាជាណាចក្រកម្ពុជា។

សម្រាប់ព័ត៌មានបន្ថែមពីកម្មវិធីអាហារូបករណ៍ខាងលើ បេក្ខជនអាចទាក់ទងសាកសួរតាមទូរសព្ទលេខ៖ ០៩៨ ៩៨៩ ៧៨៩ ឬទាក់ទងនាយកដ្ឋានសហប្រតិបត្តិការអន្តរជាតិ និងកិច្ចការអាស៊ាន តាមអាសយដ្ឋានខាងលើ៕