ថវិកា ជាឧបករណ៍ដ៏មានឥទ្ធិពលមួយផ្នែក ប៉ុន្តែនៅមានទ្រព្យសម្បត្ដិចំនួនបី ដែលសំខាន់ជាងលុយទៅទៀត នោះគឺ ពេលវេលា សុខភាព និងទំនាក់ទំនង។ មនុស្សដែលមាន សុខភាពល្អ មានពេលគ្រប់គ្រាន់ និងរក្សាបាននូវទំនាក់ទំនងល្អ គឺជាការផ្ទុកទ្រព្យដ៏មានតម្លៃមិនអាចកាត់ថ្លៃបាន។ តាមរយៈគេហំព័រ Yourtango បានបកស្រាយលម្អិតបន្ថែមអំពីកត្តាដែលបង្ហាញថា ពេលវេលា សុខភាព និងទំនាក់ទំនង មានតម្លៃជាងទឹកប្រាក់។

១. ពេលវេលា ៖ ពេលជាសេរីភាព ! ដែលជាសេរីភាពមួយ ជួយឱ្យអ្នកជ្រើសរើសទៅធ្វើសកម្មភាពដែលឆ្លើយតបនឹងគោលដៅ ឬបំណងប្រាថ្នាជីវិត។ ពេលវេលា ប្រៀបដូចជាប្រណិតភាពមួយដែលជាមូលហេតុបង្ហាញឱ្យឃើញថា ការប្រើពេលជាមួយខ្លួនឯង គួរតែចាត់ជាអាទិភាព។ ដូច្នេះ ការប្រើប្រាស់ប្រតិទិនដើម្បីកត់ត្រា និងកំណត់អំពីពេលវេលាមួយឱ្យជាក់លាក់ ក្នុងការកាត់ផ្តាច់ពីការរំខាន ឬយកពេលទៅធ្វើការងារដែលស្របនឹងចំណូលចិត្ត សន្សំពេលបន្តអភិវឌ្ឍន៍សមត្ថភាព និងការសង្រួបសង្រួមចិត្តឱ្យល្អ តាមរយៈការដកដង្ហើមមួយៗ វែងៗ។ មួយវិញទៀត គួរប្រើប្រាស់ពេលទៅស្រូបយកបទពិសោធបន្ថែម ដោយការព្យាយាមធ្វើកិច្ចសន្ទនាជាមួយមនុស្សដទៃ ធ្វើខ្លួនឱ្យស្ថិតក្នុងបច្ចុប្បន្នភាព ប្រើពេលវិស្សមកាលឱ្យអស់លទ្ធភាពតាមដែលអាចធ្វើបានទៅដើរកម្សាន្ត ឬរៀនសូត្រអ្វីថ្មីៗ ជាការកាត់បន្ថយភាពស្តាយក្រោយចំពោះការប្រើប្រាស់ជីវិត ហើយអ្វីដែលគួរឱ្យស្តាយក្រោយនោះ គឺ បណ្តាយឱ្យពេលកន្លងផុតទៅ ដោយមិនបានប្រើឱ្យអស់លទ្ធភាព ឬមិនបានធ្វើអ្វីដែលមានន័យចំពោះខ្លួនឯង។

២. សុខភាព ៖ សុខភាពល្អ គឺជាអត្ថប្រយោជន៍ និងទ្រព្យដែលមិនអាចកាត់ថ្លៃបាននោះឡើយ។ ត្បិតថារាងកាយគ្រាន់តែជាវត្ថុក្រៅខ្លួនបណ្តោះអាសន្ន ដើម្បីប្រើប្រាស់ក្នុងការស់នៅក៏ពិតមែន ប៉ុន្តែកាលដែលមិនមានសុខភាពមួយរឹងប៉ឹង នោះក៏នឹងគ្មានន័យអ្វី ក្នុងការរស់នៅឡើយ។ ដូច្នេះ គួរតែបង្កើតទម្លាប់បរិភោគអាហារល្អៗ ចលនារាងកាយ តាមរយៈសកម្មភាពចម្រុះ ដូចជាហាត់ប្រាណ ជិះកង់ ហាត់យូហ្គា ដើរ និងរត់ជាដើម ដែលសកម្មភាពទាំងនេះ សុទ្ធសឹងតែ ជាចំណែកជំរុញដល់សុខភាពខួរក្បាល។ ហើយការបង្កើតទម្លាប់ល្អចំពោះខ្លួនឯង ជាកត្តាសំខាន់ ព្រោះវាសនា នាពេលខាងមុខ ត្រូវទទួលខុសត្រូវដោយខ្លួនឯងជាចម្បង។

៣. ទំនាក់ទំនង ៖ សេចក្ដីទាមទារនៃការផ្សារភ្ជាប់ទំនាក់ទំនងរវាងគ្នានឹងគ្នា គឺជាធម្មជាតិរបស់មនុស្ស យើងត្រូវការរបៀបយកចិត្តទុកដាក់ ក្ដីស្រឡាញ់ ការយល់ចិត្តបែបស៊ីជម្រៅ មិនថាមិត្តភាពឬក៏ដៃគូនោះទេ។ ប៉ុន្តែមិនមែនមនុស្សគ្រប់គ្នា សុទ្ធតែអាចក្លាយជាបុគ្គលបំពេញភាពកក់ក្តៅ និងតម្រូវការដែលយើងចង់បាននោះទេ ដែលជាហេតុបង្ហាញឱ្យឃើញថា បន្ទាប់ពីមានមនុស្សយល់ចិត្តហើយ ការរក្សាទំនាក់ទំនងឱ្យល្អ គឺជាចំណែកជួយបង្កើនសុភមង្គល និងជាទ្រព្យដ៏សំខាន់នៃមនុស្សម្នាក់ៗ ។ បន្តយកចិត្តទុកដាក់ជាមួយមនុស្សដែលផ្តល់អារម្មណ៍វិជ្ជមានទៅកាន់ខ្លួន ចែករំលែករឿងរ៉ាវជាមួយគ្នា ធ្វើជាអ្នកស្ដាប់ដ៏ល្អ និងធ្វើខ្លួនឱ្យនៅបច្ចុប្បន្នភាព ពេលនៅក្បែរមនុស្សជាទីស្រឡាញ់ទាំងនោះ៕