ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្រសួងអប់រំ យុវជន និងកីឡា សហការជាមួយទីភ្នាក់ងារ KOICA នៅកម្ពុជា កាលពីពេលថ្មីៗនេះ បានរៀបចំវគ្គបណ្ដុះបណ្ដាលស្ដីពី “ការលើកកម្ពស់សមត្ថភាព ICT សម្រាប់ការអប់រំនៅមធ្យមសិក្សាបឋមភូមិ” ដល់គ្រូបង្រៀន និងគរុសិស្សឯកទេសបច្ចេកវិទ្យាព័ត៌មាន (ICT) នៅតាមសាលារៀនគោលដៅទាំង២០ មកពីខេត្តកំពង់ចាម ខេត្តតាកែវ ខេត្តកណ្តាល និងខេត្តព្រៃវែង។
លោកជំទាវ ឃួន វិច្ឆិកា អគ្គនាយក នៃអគ្គនាយកដ្ឋានបណ្ដុះបណ្ដាល និងវិក្រឹតការ និងជាអ្នកនាំពាក្យក្រសួងអប់រំ យុវជន និងកីឡា មានប្រសាសន៍ថា វគ្គបណ្ដុះបណ្ដាលនេះ មានគោលបំណងពង្រឹងសមត្ថភាពបន្ថែមដល់គ្រូបង្រៀនមុខវិជ្ជា ICT និងគរុសិស្សឯកទេស ICT ដែលកំពុងបង្រៀន និងត្រូវចេញទៅបង្រៀន នៅតាមសាលារៀនគោលដៅទាំង២០ របស់គម្រោង “កសាងសមត្ថភាពបច្ចេកវិទ្យាព័ត៌មានសម្រាប់ការអប់រំនៅមធ្យមសិក្សាបឋមភូមិនៅកម្ពុជា”។
លោកជំទាវបញ្ជាក់បន្ថែមថា វគ្គបណ្ដុះបណ្ដាលនេះ នឹងជួយឱ្យគ្រូបង្រៀន ក៏ដូចជាគរុនិស្សិតស្វែងយល់បានកាន់តែច្បាស់នូវខ្លឹមសារមេរៀននៃសៀវភៅសិក្សាគោលបច្ចេកវិទ្យាព័ត៌មាន និងសារគមនាគមន៍ថ្នាក់ទី៧ ទី៨ និងទី៩ ព្រមទាំងបញ្ជ្រាបនូវគរុកោសល្យ វិធីសាស្ត្របង្រៀនថ្មីៗ ដើម្បីឱ្យការបង្រៀនមុខវិជ្ជា ICT ប្រកបដោយប្រសិទ្ធភាពខ្ពស់។
បើតាម អគ្គនាយក នៃអគ្គនាយកដ្ឋានបណ្ដុះបណ្ដាល និងវិក្រឹតការ បានឱ្យដឹងថា សៀវភៅសិក្សាគោលបច្ចេកវិទ្យាព័ត៌មាន និងសារគមនាគមន៍ថ្នាក់ (ICT) ថ្នាក់ទី៨ នឹងត្រូវដាក់ឱ្យប្រើប្រាស់នៅក្នុងខែវិច្ឆិកា ឆ្នាំ២០២៥ខាងមុខ។
គួរជម្រាបជូនថា វគ្គបណ្ដុះបណ្ដាលស្ដីពី “ការលើកកម្ពស់សមត្ថភាព ICT សម្រាប់ការអប់រំនៅមធ្យមសិក្សាបឋមភូមិ” ធ្វើឡើងចាប់ពីថ្ងៃទី៣ រហូតដល់ថ្ងៃទី១៤ ខែកុម្ភៈ ឆ្នាំ២០២៥ នៅមជ្ឈមណ្ឌលគរុកោសល្យភូមិភាគ ហ៊ុន សែន ខេត្តកណ្ដាល ដោយមានសិក្ខាកាមចូលរួមជាគ្រូបង្រៀនមុខវិជ្ជា ICT នៃសាលារៀនគោលដៅទាំង២០ គរុសិស្សដែលកំពុងសិក្សានៅមជ្ឈមណ្ឌលគរុកោសល្យភូមិភាគកំពង់ចាម កណ្ដាល តាកែវ និងព្រៃវែងសរុបចំនួន ៥៥នាក់ ស្ត្រី១១នាក់៕
