មនុស្ស​ម្នាក់ៗ​តែងស្វែងរកវិធីសាស្រ្តក្នុងការរស់នៅ​ប្រកបដោយសុវត្ថិភាព និងសុខដុមរមនា ប៉ុន្តែ​នៅពេល​ខ្លះ​ក៏នៅតែមានភាពខ្វះចន្លោះក្នុងការប្រើប្រាស់ជីវិតរស់នៅប្រចាំថ្ងៃ​ប្រកបដោយប្រសិទ្ធភាព ព្រោះមនុស្សម្នាក់ៗ មានបទពិសោធន៍នៃការរស់នៅដាច់ដោយឡែកពីគ្នា។ តាមរយៈគេហទំព័រ Healthdigest បានបង្ហាញ អំពីបទពិសោធន៍៤ ដែលអាចជំរុញឱ្យគ្រោះថ្នាក់ដល់អាយុជីវិត ឬបង្កហានិភ័យដល់សុខភាព រួមទាំងវិធី​ក្នុង​ការឆ្លើយតបបែបណាទើប អាចកាត់បន្ថយហានិភ័យទាំងនេះបាន។

១. ធ្វើការក្នុងបរិយាកាសមិនល្អ (Toxic ) ៖ សម្រាប់អ្នកមានបទពិសោធន៍ធ្វើការ ក្នុងបរិយាកាសមិនអំណោយផល បានបង្កការគំរាមកំហែងដល់សុខភាពដូចជា​ ភាពតានតឹងរ៉ាំរ៉ៃ ជំងឺបេះដូង និងអាការលើសឈាម។ ទន្ទឹមគ្នានោះក៏អាចជះឥទ្ធិពលពីខ្លួនឯង ទៅកាន់អ្នកដទៃ ឬមនុស្សជុំវិញខ្លួនបានយ៉ាងងាយផងដែរ ដូច្នេះការយកចិត្តទុកដាក់ ថែទាំសុខភាពផ្លូវចិត្ត គួរតែអនុវត្តន៍ឱ្យបានហ្មត់ចត់ចំពោះខ្លួនឯង។

២. ការផ្តាច់ខ្លួនពីសង្គម ៖ ចំណាយពេលវេលានៅម្នាក់ឯង ក្នុងចំនួនលើសលុប ជាឱកាសមួយ អាចបង្កហានិភ័យទៅជាជំងឺធ្ងន់ធ្ងរមួយចំនួនដូចជា ជំងឺវង្វេង ជំងឺទឹកនោមផ្អែមប្រភេទទីពីរ ជំងឺបេះដូង និងជំងឺដាច់សរសៃឈាមខួរក្បាលជាដើម។ ជាមួយគ្នានេះ សកម្មភាពដែលកាន់តែបង្កហានិភ័យពេលនៅម្នាក់ឯង គឺអាចជួបប្រទះភាពឯកោ ឬក៏ភាពគ្រាំគ្រាចិត្ត ហើយធ្វើឱ្យពួកគេ ឈានទៅរកការប្រព្រឹត្តិនូវសកម្មភាពដូចជា​ ផឹក​ស្រា​ច្រើន​ជ្រុល ​ជក់​បារី និង​ទម្លាប់​គេង​មិនមានកាលវិភាគត្រឹមត្រូវ ដែលសកម្មភាពទាំងនេះហើយ ធ្វើឱ្យប្រព័ន្ធការពាររាងកាយចុះខ្សោយ និងមានហានិភ័យចំពោះអាយុជីវិត ដូច្នេះគួររកការគាំពារពីមនុស្សជុំវិញខ្លួន។

៣. វិបត្តិហិរញ្ញវត្ថុ ៖ បញ្ហាហិរញ្ញវត្ថុ គឺជាកង្វល់មួយដែលកើតមានចំពោះមនុស្សមួយចំនួន។ បញ្ហាបែបនេះចាក់ស្រេះយូរៗទៅ បណ្តាលឱ្យប៉ះពាល់យ៉ាងធ្ងន់ធ្ងរទៅកាន់សុខភាព បង្កើនបានទៅជាក្ដីបារម្ភច្រើន ការធ្លាក់ទឹកចិត្ត និងភាពខ្វល់ខ្វាយឥតឈប់ឈរ។

៤. មិនដោះស្រាយរបួសផ្លូវចិត្តកាលពីកុមារភាព ៖ កាលដែលមិនដោះស្រាយបញ្ហា ឬក៏របួសផ្លូវចិត្តកាលពីក្មេង បានជះឥទ្ធិពលនៅពេលដែលពួកគេមានវ័យជំទង់ ដែលបណ្តាលឱ្យយុវវ័យជួបប្រទះរឿងរ៉ាវដូចជា ភ័យសស្លន់សស្លោ មានបំណងធ្វើអត្តឃាត ជ្រើសរើសការប្រើប្រាស់សារធាតុញៀន ឬក៏សកម្មភាពទាំងឡាយណាដែលបង្កគ្រោះថ្នាក់ដល់ខ្លួនឯង។ ក្រៅតែពីសម្ពាធផ្លូវចិត្ត បញ្ហានេះបានជំរុញទៅកាន់សុខភាពរាងកាយដូចគ្នាដែរ ដូចជាការទទួលទានអាហារច្រើន បង្កបានទៅជាអាការលើសទម្ងន់ ឬទឹកនោមផ្អែមជាដើម៕