ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
លើកឡើងក្នុងពិធីសម្ពោធដាក់ឱ្យប្រើប្រាស់ជាផ្លូវការស្ពានអាកាសមរតកតេជោ នាព្រឹកថ្ងៃចន្ទ (៧ មេសា) សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា មានប្រសាសន៍ថា ការអភិវឌ្ឍប្រទេស ការកសាងសមិទ្ធផល និងភាពប្រែប្រួលប្រកបដោយចីរភាព គឺត្រូវបណ្តុះបណ្តាលធនធានមនុស្សខាងក្នុង ដើម្បីអាចមានសមត្ថភាពធ្វើការដោយខ្លួនឯង ប្រកបដោយភាពម្ចាស់ការខ្ពស់ ដោយមិនពឹងដង្ហើមគេដក។ សម្តេចបញ្ជាក់ថា ការអភិវឌ្ឍដោយប្រើកម្លាំងសមត្ថភាពរបស់កូនខ្មែរ គឺជាការអភិវឌ្ឍដែលធានាបាននូវចីរភាព។
បើតាមប្រសាសន៍របស់សម្តេចធិបតី ការអភិវឌ្ឍប្រទេសបានន័យថា ការកសាងសមិទ្ធផលដែលមានចីរភាព ហើយសមត្ថភាពដែលមានចីរភាព គឺគ្មានអ្វីក្រៅតែពីផ្ទេរជំនាញពីអ្នកជំនាញបរទេសដែលមកជួយ ជំនាញពីក្រៅប្រទេសដែលយើងទៅរៀន ទៅធ្វើការ ចូលមកជាធនធានក្នុងប្រទេស ដែលយើងអាចប្រើប្រាស់បានគ្រប់ពេលវេលា, ទាំងអស់នេះហើយ ជាការអភិវឌ្ឍធនធានមនុស្ស និងការអភិវឌ្ឍប្រទេសដែលមានចីរភាព។
ក្នុងនោះសម្តេចធិបតីបានសម្តែងមោទនភាពចំពោះការសាងសង់សំណង់អគារធំៗមួយចំនួនដូចជា សំណង់ស្ពានអាកាសមរតកតេជោ ក៏ដូចជាអគារវិមានសន្តិភាព ដែលសុទ្ធសឹងតែបានកសាងឡើងដោយកូនខ្មែរសុទ្ធសាធ ទាំងស្ថាបត្យកម្ម ក៏ដូចជាសំណង់។
“លក្ខណៈពិសេសរបស់ស្ពាននេះ មិញឯកឧត្តម ឧកញ៉ា ពុង ឈាវសែ គាត់បានប្រាប់ថា ស្ពាននេះ គឺដឹកនាំសាងសង់ ដោយកូនខ្មែរតែម្ដង ដោយវិស្វករខ្មែរសុទ្ធ អញ្ចឹងនេះជាមោទនភាពរបស់យើង ដែលបញ្ជាក់ពីវឌ្ឍនភាពនៃការកសាងសមទ្ធផលធំៗ ជូនខ្មែរយើង ដោយកូនខ្មែរ”
សម្តេចធិបតីមានប្រសាសន៍បញ្ជាក់ថា ជាចក្ខុវិស័យរបស់កម្ពុជា គឺនឹងធ្វើជំហានៗ ក្នុងការកសាង អភិវឌ្ឍន៍ប្រទេស រៀបចំគ្រប់ដំណាក់កាល ទាំងផែនការ និងការដឹកនាំធ្វើ ការត្រួតពិនិត្យ និងការធ្វើកិច្ចការផ្សេងៗ ជាពិសេសពាក់ព័ន្ធនឹងហេដ្ឋារចនាសម្ព័ន្ធកម្រិតខ្ពស់ មានស្ពានអាកាស មានអាគារច្រើនជាន់ មានព្រលានយន្តហោះកម្រិតធំ ហើយឈានទៅដល់ការបណ្តុះបណ្តាល អនុវត្តន៍ធនធាននៅក្នុងប្រទេស ដែលនេះហើយ គឺជាការកសាងអភិវឌ្ឍប្រទេស។
សូមជំរាបជូនថា ស្ពានអាកាសមរតកតេជោ ជាស្ពានប្រសព្វរវាងមហាវិថីព្រៈមុនីវង្ស, មហាវិថីសម្តេចតេជោ ហ៊ុន សែន និងមហាវិថីយោធពលខេមរភូមិ (ផ្លូវ២៧១) ក្នុងខណ្ឌមានជ័យ និងខណ្ឌចំការមន ដែលជាស្ពានអាកាសកំពស់២ជាន់លើកដំបូងនៅកម្ពុជា។ បើតាមប្រសាសន៍របស់ ឯកឧត្តម ឃួន ស្រេង អភិបាលរាជធានីភ្នំពេញ វិស្វករដែលចូលរួមក្នុងការសាងសង់ស្ពាននេះ គឺសុទ្ធសឹងតែជាវិស្វករខ្មែរ ចេញពីសាលាតិចណូ ជាធនធានមនុស្សក្នុងស្រុក តែយ៉ាងណាក៏ដោយមិនចោលបច្ចេកទេសទំនើបៗពីបណ្តាប្រទេសផ្សេងៗដែរ ដើម្បីឱ្យកិច្ចការអនុវត្តគម្រោងផ្សេងៗប្រព្រឹត្តទៅដោយរលូន មានភាពរឹងមាំ និងជាប្រយោជន៍របស់ប្រជាជន៕
