ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្នុងដំណើរទស្សនកិច្ចផ្លូវរដ្ឋមកកាន់ប្រទេសកម្ពុជា របស់ប្រធានាធិបតីចិន Xi Jingping កាលពីសប្តាហ៍កន្លងទៅនេះ មានឯកសារចំនួន៣៧ត្រូវបានចុះហត្ថលេខា ក្នុងនោះក៏មានឯកសារពាក់ព័ន្ធនឹងវិស័យអប់រំ ដោយភាគីចិនបានសន្យាផ្តល់អាហារូបករណ៍បន្ថែមទៀត និងពង្រីកកិច្ចសហប្រតិបត្តិការជាមួយកម្ពុជាផងដែរ។ ក្នុងនាមក្រុមប្រឹក្សាភិបាលសមាគមនិស្សិតកម្ពុជាប្រចាំសាធារណរដ្ឋប្រជាមានិតចិន ឯកឧត្តម អ៊ុំ វុទ្ធទី បានសម្តែងសេចក្តីរីករាយ ដោយថា ការផ្តល់អាហារូបករណ៍បន្ថែមនេះ បានបង្ហាញកាន់តែច្បាស់របស់ភាគីចិន ក្នុងការបណ្តុះបណ្តាលធនធានកម្ពុជា ដើម្បីសម្រេចចក្ខុវិស័យឆ្នាំ២០៥០ កម្ពុជា ក្លាយជាប្រទេសដែលមានចំណូលខ្ពស់។
ឯកឧត្តម អ៊ុំ វុទ្ធទី មានប្រសាសន៍ថា តាមរយៈសេចក្តីថ្លែងការណ៍រួមរវាងព្រះរាជាណាចក្រកម្ពុជា និងសាធារណរដ្ឋប្រជាមានិតចិន ភាគីចិនបានសន្យាថា នឹងផ្តល់អាហារូបករណ៍ដល់សិស្ស-និស្សិតកម្ពុជា ចំនួន១ពាន់កន្លែង រយៈពេល៣ឆ្នាំ។ ឯកឧត្តមបញ្ជាក់ថា នេះបានបង្ហាញកាន់តែច្បាស់របស់ភាគីចិន ក្នុងការបណ្តុះបណ្តាលធនធានយុវជនកម្ពុជា ក្នុងវិស័យបច្ចេកវិទ្យា, វេជ្ជសាស្រ្ត, សេដ្ឋកិច្ច, វិទ្យាសាស្រ្ត និងសង្គមវិទ្យា ដែលជាវិស័យសំខាន់ៗក្នុងការអភិវឌ្ឍប្រទេសកម្ពុជា ដើម្បីសម្រេចចក្ខុវិស័យ២០៥០ ហើយជាមួយគ្នានិស្សិតកម្ពុជាសិក្សានៅប្រទេសចិន បានក្លាយជាស្ពានចំណងមិត្តភាពរវាងកម្ពុជា-ចិន ផងដែរ។
ប្រធានក្រុមប្រឹក្សាភិបាលសមាគមនិស្សិតកម្ពុជាប្រចាំសាធារណរដ្ឋប្រជាមានិតចិន បន្តថា យោងតាមកិច្ចព្រមព្រៀងដែលបានចែងក្នុងឯកសារចំនួន៣៧នោះ ពិតប្រាកដជាអូសទាញសហគ្រាសរោងចក្រ និងក្រុមហ៊ុនចិនជាច្រើនមកកាន់ប្រទេសកម្ពុជា ហើយវាក៏ជាឱកាសការងារដ៏ល្អសម្រាប់និស្សិតកម្ពុជាដែលបានបញ្ចប់ការសិក្សាពីប្រទេសចិន ហើយនិស្សិតកម្ពុជាដែលកំពុងសិក្សា បញ្ចប់ការសិក្សា និងនិស្សិតកម្ពុជាគ្រោងទៅសិក្សាតាមរយៈអាហារូបករណ៍របស់រដ្ឋាភិបាលចិន បានក្លាយជាកត្តាទាក់ទាញអ្នកវិនិយោគចិនមកកម្ពុជា។
ឯកឧត្តម អ៊ុំ វុទ្ធទី បន្ថែមថា និស្សិតកម្ពុជាទៅបន្តការសិក្សានៅប្រទេសចិន មិនមែនជាប្រយោជន៍ត្រឹមតែភាគីកម្ពុជាប៉ុណ្ណោះទេ ប៉ុន្តែវាក៏ជាឱកាសមួយដែលប្រទេសចិន អាចផ្សព្វផ្សាយពីកិត្តិនាមនៃវិស័យអប់រំរបស់ខ្លួនទៅកាន់ពិភពលោកថា ប្រទេសចិនមានគុណភាពវិស័យអប់រំខ្ពស់ដែលអាចទាញចំណាប់អារម្មណ៍ចង់មកសិក្សារបស់និស្សិតបរទេសជាច្រើន។ ជាមួយគ្នានេះ អំឡុងពេលនិស្សិតអន្តរជាតិសិក្សានៅក្នុងប្រទេសចិន ផ្អែកតាមភាគច្រើននៃកម្មវិធីដែលរៀបចំដោយសាកលវិទ្យាល័យចិន ពួកគេក៏អាចស្វែងយល់អំពីគន្លងនយោបាយ សេដ្ឋកិច្ច បច្ចេកវិទ្យា និងសង្គមទំនើបតាមបែបផែនចិន ក្រោមភាពជោគជ័យនៃកំណែទម្រង់សេដ្ឋកិច្ចឆ្នាំ១៩៧៨ និងកំណែទម្រង់ហិរញ្ញវត្ថុឆ្នាំ១៩៨៤ ដែលអាចធ្វើឱ្យដិតដាមជាប់អារម្មណ៍ ភ្ជាប់ជាមួយចំណេះដឹងរបស់និស្សិតបរទេស ដើម្បីធ្វើជាភស្តុតាង និងគម្រូសម្រាប់ការអភិវឌ្ឍន៍ប្រទេសរបស់ពួកគេ ដោយប្រែក្លាយជីវភាពប្រជាជនពីការរស់នៅដោយលំបាក ទៅជារស់នៅជាមួយភាពសម្បូរបែបស្របតាមដំណើរជឿនលឿនរបស់ពិភពលោក និងបរិបទជាក់ស្តែងនៃកត្តាសេដ្ឋកិច្ច និងលក្ខខណ្ឌអំណោយផលរៀងៗខ្លួន។
យោងតាមរបាយការណ៍របស់សមាគមនិស្សិតកម្ពុជាប្រចាំសាធារណរដ្ឋប្រជាមានិតចិន ក្នុងរយៈពេល១០ឆ្នាំចុងក្រោយនេះ ពោលគឺគិតពីឆ្នាំ២០១៥ រហូតមកដល់បច្ចុប្បន្ន មាននិស្សិត និងអតីតនិស្សិតកម្ពុជាសរុបប្រមាណ ៤២០០នាក់ បានទទួលអាហារូបករណ៍ទៅសិក្សានៅប្រទេសចិន។ ឯកឧត្តម អ៊ុំ វុទ្ធទី លើកឡើងថា និស្សិតដែលបានបញ្ចប់ការសិក្សានៅប្រទេសចិនភាគច្រើនសុទ្ធសឹងតែមានសមត្ថភាពខ្ពស់ក្នុងការទទួលបាននូវឱកាសការងារល្អៗនៅក្នុងប្រទេសកម្ពុជា មិនថាវិស័យសាធារណៈ និងឯកជន ដែលរួមចំណែកក្នុងការកសាងសេដ្ឋកិច្ច សង្គមកម្ពុជា តាមទិសដៅ និងមហិច្ឆិតាក្នុងការកសាងធនធានមនុស្ស ដែលជាមុំមួយរបស់រាជរដ្ឋាភិបាលនីតិកាលទី៧ ដែលមានសម្តេចមហាបវរធិបតី ហ៊ុន ម៉ាណែត ជានាយករដ្ឋមន្រ្តី៕
