ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
បន្ទាប់ពីមានការប្រកាសដោយក្រសួងអប់រំ ក្នុងការអនុញ្ញាតឱ្យសិស្សភៀសសឹកអាចចុះឈ្មោះចូលរៀនបណ្តោះអាសន្ននៅតាមសាលារៀននៅជិតតំបន់ភៀសសឹក ឬកន្លែងស្នាក់នៅតាមការស្ម័គ្រចិត្ត ពេលនេះមានសាលារៀនជាច្រើនស្ថិតក្នុងខេត្តកំពុងប្រឈម និងខេត្តក្បែរខាង កំពុងតែធ្វើការផ្សព្វផ្សាយពីសេចក្តីណែនាំនេះ និងកំពុងទទួលសិស្សភៀសសឹកឱ្យចុះឈ្មនោះចូលរៀនបណ្តោះអាសន្ន។ នេះបើតាមប្រសាសន៍របស់លោកជំទាវ ឃួន វិច្ឆិកា អ្នកនាំពាក្យក្រសួងអប់រំ យុវជន និងកីឡា។
បើតាមលោកជំទាវ ឃួន វិច្ឆិកា ដើម្បីជួយសម្រួលដល់ការសិក្សារបស់គ្រួសារភៀសសឹក សាលារៀនមួយចំនួនក្នុងខេត្តបាត់ដំបង ខេត្តសៀមរាប បានបើកទទួលសិស្សភៀសសឹកឱ្យចុះឈ្មោះចូលរៀនបណ្តោះអាសន្នទម្រាំស្ថានភាពល្អប្រសើរឡើងវិញ។ សាលារៀនក្នុងខេត្តបាត់ដំបង រួមមាន សាលាបឋមសិក្សាសម្ដេច ជា ស៊ីម, សាលាបឋមសិក្សាបោះពោធិ៍, សាលាបឋមសិក្សាអនុវត្តន៍ និងអនុវិទ្យាល័យអនុវត្តន៍ នៃវិទ្យាស្ថានគរុកោសល្យបាត់ដំបង, អនុវិទ្យាល័យបាយដំរាំ និងវិទ្យាល័យនេត យ៉ង់ និងចែកជូនសម្ភារៈសិក្សាមួយចំនួនថែមទៀត។ ចំណែកសាលារៀនក្នុង ខេត្តសៀមរាប រួមមាន វិទ្យាល័យអង្គរ, វិទ្យាល័យ ១០មករា ១៩៧៩, សាលាបឋមសិក្សាវត្តស្វាយ, សាលាបឋមសិក្សាស្វាយធំ។ ព្រមទាំងវិទ្យាល័យ ហ៊ុន សែន រួតចំប៉ី ខេត្តឧត្ដរមានជ័យផងដែរ។
ជាមួយគ្នានេះ នៅមានសាលារៀនជាច្រើនទៀតដែលផ្សព្វផ្សាយជាបន្តបន្ទាប់ និងមានសាលាជាច្រើនទៀតមិនបានផ្សព្វផ្សាយ តែបានទទួលសិស្សភៀសសឹកឱ្យចុះឈ្មោះចូលរៀនបណ្តើរៗហើយ និងធ្លាប់បានធ្វើការងារនេះកាលពីខែកក្កដាកន្លងមក។
យោងតាមរបាយការណ៍របស់ក្រសួងអប់រំ ការឈ្លានពានរបស់ប្រទេសថៃមកលើទឹកដីកម្ពុជា គិតត្រឹមថ្ងៃទី១១ ខែធ្នូ ឆ្នាំ២០២៥ បាន្វើសាលានៅខេត្តចំនួន៦ ក្នុងក្រុង-ស្រុកចំនួន២០ ជាប់នឹងព្រំដែនប្រទេសថៃ បានបិទទ្វារសរុប ៩០៩សាលា ប៉ះពាល់គ្រូបង្រៀន ៧៦០១នាក់ និងសិស្ស ២១៦១០៧នាក់។
ក្នុងឱកាសជួបសំណេះសំណាល និងផ្តល់សម្ភារៈសិក្សា គ្រឿងឧបភោគបរិភោគ និងសម្ភារៈប្រើប្រាស់ចាំបាច់នានា ជូនដល់មន្ទីរអប់រំ យុវជន និងកីឡា នៃខេត្តទាំង៥ដែលរងផលប៉ះពាល់ កាលពីរសៀលថ្ងៃអាទិត្យ ឯកឧត្តមបណ្ឌិតសភាចារ្យ ហង់ជួន ណារ៉ុន រដ្ឋមន្រ្តីក្រសួងអប់រំ យុវជន និងកីឡា បានអំពាវនាវដល់ បុគ្គលិកអប់រំ មាតាបិតា សិស្សានុសិស្ស និងក្រុមគ្រួសារដែលរងផលប៉ះពាល់ទាំងអស់ សូមប្រែក្លាយការលំបាកនេះទៅជាការតស៊ូ និងកម្លាំងចិត្តដើម្បីជម្នះរាល់ឧបសគ្គ។ ដោយឡែកសាលារៀនទាំងអស់ត្រូវតែត្រៀមខ្លួន ទទួលយកកុមារ និងសិស្សានុសិស្សដែលបានភៀសខ្លួនឱ្យបន្តការសិក្សា ដោយធានាថាពួកគេមានកន្លែងរៀនសូត្រប្រកបដោយសុវត្ថិភាព។
ឯកឧត្តមរដ្ឋមន្រ្តីមានប្រសាសន៍ថា ក្រសួងអប់រំនឹងបន្តរៀបចំ និងផ្តល់ជំនួយជាបន្តបន្ទាប់ ជាពិសេសផ្តល់នូវតង់ និងទីតាំងសិក្សាបណ្តោះអាសន្ន សម្រាប់សិស្សានុសិស្សដែលភៀសខ្លួន ដើម្បីធានាថាដំណើរការរៀន និងបង្រៀនអាចប្រព្រឹត្តទៅបាន ទោះក្នុងកាលៈទេសៈណាក៏ដោយ៕
