តាមរយៈការចូលរួមយ៉ាងផុសផុល របស់យុវជន នៃការធ្វើបទបង្ហាញ ដោយមានទស្សនៈផ្ទាល់ខ្លួន និងការស្រាវជ្រាវដោយគត់មត់ ទាក់ទងនឹងបច្ចេកវិទ្យា​ឌីជីថល ក្នុងការលើកកម្ពស់សុខភាពផ្លូវចិត្ត និងសុខុមាលភាព ក្នុងវេទិកាប្រកួតគំនិតបង្កើតថ្មី កម្ពុជា ៤.០ គឺបានបង្ហាញអំពីការយកចិត្តទុកដាក់របស់យុវជន ទៅកាន់សង្គមដែលពួកគេរស់នៅ ហើយថែមទាំងឆ្លើយតបនឹងតម្រូវការនៃការរស់នៅប្រចាំថ្ងៃរបស់យើងទាំងអស់គ្នាផងដែរ។ នេះជាប្រសាសន៍ របស់ឯកឧត្តម អាំង សុវណ្ណរ័ត្ន នាយកប្រតិបត្តិនៃមជ្ឈមណ្ឌលកម្ពុជា ៤.០ ក្នុងកម្មវិធីប្រកួតប្រជែងគំនិតបង្កើតថ្មី កម្ពុជា ៤.០ រដូវកាលទី ៤ ក្រោមប្រធានបទ “ការប្រើប្រាស់បច្ចេកវិទ្យាឌីជីថល ក្នុងការលើកកម្ពស់សុខភាពផ្លូវចិត្ត និងសុខុមាលភាព” (Using Digital Technology to Promote Mental Health and Well-being)  ។

ឯកឧត្តមបន្តថា ការយល់ដឹងអំពីបច្ចេកវិទ្យាមានសារៈសំខាន់ក្នុងពេលបច្ចុប្បន្នរួមទាំងអនាគត ហើយការវិវឌ្ឍនេះ មានភាពជឿនលឿន ពីមួយពេលទៅមួយពេល ដែលត្រូវការស្វែងយល់ជាប្រចាំ។ “ការចូលរួមរបស់បេក្ខជនជា សញ្ញាណវិជ្ជមានមួយ នៅក្នុងសង្គមរបស់យើង ដែលមានន័យថា យើងចូលរួមគិត ចូលរួមធ្វើ និងចូលរួមទទួលខុសត្រូវទាំងអស់គ្នា ទៅលើអ្វីដែលជាអនាគតរបស់ប្រទេសយើង ដែលទាមទារចាំបាច់ ពីការចូលរួម របស់ភាគីនៃគ្រប់តួអង្គ”។

នៅក្នុងលក្ខខណ្ឌ នៃការចូលរួមមានការកំណត់យ៉ាងជាក់ច្បាស់ថា បេក្ខជនដែលចូលរួមបាន ត្រូវមានអាយុ២៥ឆ្នាំចុះក្រោម ដែលធ្វើឱ្យសាធារណៈជនមើលមួយភ្លែតទៅ ហាក់ឃើញថាមិនសូវមានការបើកទូលាយ ប៉ុន្តែនាយកប្រតិបត្តិនៃមជ្ឈមណ្ឌលកម្ពុជា ៤.០ បានពន្យល់ថា  កាលដែលកំណត់បែបនេះ គឺមានន័យថាយុវជនកម្ពុជាបច្ចុប្បន្ន ថ្វីត្បិតតែមានវ័យក្មេងបន្តិចមែន ប៉ុន្តែពួកគាត់ចាប់ផ្តើមចូលរួមបញ្ចេញមតិ និងធ្វើលំហាត់នៃការគិតជាប្រចាំ ដើម្បីពង្រឹងធនធានជាតិ​ឱ្យពោរពេញដោយសក្តានុពល។

កាលណាតែយើងចូលរួមគិត ទៅលើប្រធានបទដែលមានសារៈសំខាន់សម្រាប់ខ្លួន​យើង ឬសង្គមយើង  គឺយើងនឹងធានាបាន នូវធនធានមួយដែលមានសមត្ថភាព មានការយក់ចិត្តទុកដាក់ទៅលើអនាគតរបស់ប្រទេសជាតិយើង ទាំងនេះហើយជាមូលបទ និងវត្ថុបំណងយ៉ាងសំខាន់ នៃមជ្ឈមណ្ឌលកម្ពុជា ៤.០ ។

ឯកឧត្តម អាំង សុវណ្ណរ័ត្ន នាយកប្រតិបត្តិនៃមជ្ឈមណ្ឌលកម្ពុជា ៤.០

នៅក្នុងកម្មវិធីមានបេក្ខជនតែបីរូបប៉ុណ្ណោះ ដែលទទួលបាននៅជ័យលោភី និងទឹកប្រាក់លើកទឹកចិត្ត។ ដោយឡែក បេក្ខជនដទៃក៏បានទទួលនៅវត្ថុអនុស្សាវរីយ៍ដើម្បីជាការលើកទឹកចិត្តផងដែរ។

ឈានមកដល់ដំណាក់កាលប្រកួតគឺមានន័យថា​ បេក្ខជនទទួលបានជ័យជំនះរួចទៅហើយ គឺឈ្នះខ្លួនឯង ដែលបានបង្ហាញអំពីភាពក្លាហាន និងសមត្ថភាព។

ឯកឧត្តម អាំង សុវណ្ណរ័ត្ន នាយកប្រតិបត្តិនៃមជ្ឈមណ្ឌលកម្ពុជា ៤.០

ជាចុងក្រោយ ឯកឧត្តម អាំង សុវណ្ណរ័ត្ន លើកទឹកចិត្តឱ្យយុវជននិងបេក្ខជន បន្តប្រឹងប្រែង បន្តស្វែងយល់ សិក្សារៀនសូត្រ ព្រមទាំងការយកចិត្តទុកដាក់លើសពីការសិក្សានៅក្នុងថ្នាក់រៀន។ ដូចជាការចូលរួមប្រកួតក្នុងកម្មវិធីប្រឡងប្រជែងនានា ដើម្បីជាការរៀនបន្ថែមពីសកម្មភាពក្នុងសាលា។ ឯកឧត្តមសង្កត់ធ្ងន់ថា ចំណុចនេះគឺសំខាន់ណាស់ ហើយក៏ឆ្លើយតបនឹងតម្រូវការរបស់យុវជន ក្នុងរយៈពេលវែងទៅមុខទៀត ជាពិសេសសម្រាប់អភិវឌ្ឍន៍អាជីពការងារនាថ្ងៃអនាគត៕