សិស្ស​កម្ពុជា​ចំនួន៧នាក់​បាន​ឈ្នះ​ពានរង្វាន់ ខណៈ១៣នាក់​បានឈ្នះមេដាយមាស ពីការ​ប្រកួត UCMAS អន្តរជាតិ ដែល​មាន​កុមារ​មក​ពី៣១ប្រទេស​លើសកល​លោក​ចូលរួម​ប្រកួត។ ការប្រគល់ពានរង្វាន់ មេដាយមាស បានធ្វើ​ឡើង​កាលពីចុងសប្តាហ៍​កន្លងទៅនេះ ក្រោម​អធិបតីភាព លោកជំទាវ​បណ្ឌិត ពេជ ចន្ទមុន្នី ហ៊ុនម៉ាណែត និង​ឯកឧត្តម សាយ សំអាល់ ឧបនាយករដ្ឋមន្រ្តី រដ្ឋមន្រ្តីក្រសួងរៀបចំដែនដី នគរូបនីយកម្ម និង​សំណង់។

លោក ងន់ ច័ន្ទរ៉ា នាយកយូស៊ីម៉ាសកៀនស្វាយផ្លាហ្សានៃសាលារៀនបញ្ញវន្តកម្ពុជា មានប្រសាសន៍ថា ក្នុងការ​ប្រកួត UCMAS អន្តរជាតិឆ្នាំនេះ សិស្ស​កម្ពុជាសរុបទាំងអស់ចំនួន៥០០នាក់ បានឈ្នះពានរង្វាន់ មេដាយមាស និង​វិញ្ញាបនបត្រ​បញ្ជាក់ការសិក្សា។ ក្នុងនោះសិស្ស ៧នាក់ឈ្នះបានពានរង្វាន់ ១៣នាក់ឈ្នះមេដាយមាស និង៤៨០នាក់ទទួលបានវិញ្ញាបនបត្របញ្ជាក់ការសិក្សា និងលិខិតសរសើរ។

លោក ងន់ ច័ន្ទរ៉ា មានប្រសាសន៍ដោយកោតសរសើរ​ដល់​សិស្ស​កម្ពុជា ដែលបានខិតខំ​ប្រឹងប្រែង​រៀន​សូត្រ រហូត​ទទួលបានលទ្ធផលជាទីគាប់ចិត្ត ដោយ​សិស្ស​កម្ពុជា​បានឈ្នះ Grand Champion ជា​ពានផុតលេខខ្ពស់​បំផុត យកឈ្នះ​កុមារ​អន្តរជាតិ​មក​ពី៣១ប្រទេស លើពិភពលោក។

លោក ច័ន្ទរ៉ា បន្តថា តាមរយៈលទ្ធផលនេះ បានបង្ហាញឱ្យឃើញថា សិស្សានុសិស្សកម្ពុជាពិតជាមានសមត្ថភាពគ្រប់គ្រាន់ និងអាចប្រកួតប្រជែងជាមួយសិស្សានុសិស្សបរទេសជាច្រើននៅលើសកលលោកបាន។ ភាពជោគជ័យរបស់ពួកគាត់ពិតជានឹងមិនអាចទៅរួចនោះទេ ប្រសិនបើគ្មានវត្តមានរបស់លោកគ្រូ-អ្នកគ្រូ និងអ្នកអាណាព្យាបាល ជាពិសេសនោះគឺសុខសន្តិភាពរបស់ប្រទេសយើងផ្ទាល់។

លោកបណ្ឌិត Chris Chew នាយកប្រិតបត្តិយូស៊ីម៉ាសអន្តរជាតិ មានប្រសាសន៍ថា UCMAS ជាកម្មវិធីអភិវឌ្ឍន៍ខួរក្បាលដែលឈានមុខគេនឹងបានបង្តើតតាំងពីឆ្នាំ១៩៩៣ ដែលមាន ៦០០០សាខា ក្នុង៨០ប្រទេស ទូរទាំងពិភពលោក។ UCMAS ត្រូវបានបង្រៀនដោយប្រើប្រាស់ម្រាមដៃទាំង ៦ជាមួយ ឧបករណ៍ Abacus ជួយសិស្សឱ្យអភិវឌ្ឍការផ្តោតអារម្មណ៍ច្បាស់ និងមានឥទ្ធិពលលើការចងចាំ និងការផ្តោតអារម្មណ៍របស់កុមារអាយុចន្លោះពី ៤ទៅ១២ឆ្នាំ ដោយពួកគេផ្តោតការយកចិត្តទុកដាក់កាន់តែខ្ពស់លើមេរៀន និងការសិក្សារបស់ពួកគេ។

កុមារី ច័ន្ទ នុន សុភ័ក្រគា ជាសិស្ស UCMAS ដែលទទួលបានជ័យលាភីពានរង្វាន់ និយាយថា ដើម្បីទទួលបានពានរង្វាន់នេះ រូបគេខិតខំព្យាយាម ហើយអនុវត្តលំហាត់ជារៀងរាល់ថ្ងៃ រហូតដល់ថ្ងៃប្រឡង។ កុមារី ច័ន្ទ នុន សុភ័ក្រគា បន្តថា ​ការខិតខំសិក្សារៀនសូត្រពិតជាមានសារៈសំខាន់ណាស់ ដែលជួយឱ្យក្លាយជាពលរដ្ឋល្អ និងរួមចំណែកជួយអភិវឌ្ឍសង្គមជាតិនៅថ្ងៃអនាគត។

លោក កុល សំអុល ជាឪពុករបស់សិស្ស UCMAS ជ័យលាភីមេដាយមាស មានប្រសាសន៍ថា កម្មវិធី UCMAS គឺជាកម្មវិធីសិក្សាដែលជួយឱ្យកុមារមានខួរក្បាលឆ្លាតវៃ ឆាប់ចាប់បាន និងមានភាពក្លាហាន។ លោកថា ពីមុនកូនរបស់លោករៀនមិនសូវពូកែនោះទេ ប៉ុន្តែក្រោយបញ្ជូនកូនមករៀនក្នុងកម្មវិធី UCMAS ក៏មានការអភិវឌ្ឍខួរក្បាល ឆាប់ចងចាំបានល្អ៕