ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភ្នំពេញ – ក្រោយពីមកដល់ប្រទេសកម្ពុជាមួយរយៈ លោកបណ្ឌិត Hing Siong ដែលជាអ្នកដឹកនាំក្រុមកីឡាករជម្រើសជាតិសិង្ហបុរីមកចូលរួមព្រឹត្តិការណ៍ស៊ីហ្គេមលើកទី៣២ បានបង្ហាញការពេញចិត្តចំពោះកម្ពុជា ដែលបានរៀបចំព្រឹត្តិការណ៍ស៊ីហ្គេមយ៉ាងល្អ។
លោកបណ្ឌិត Hing Siong ដែលក៏ជាសមាជិកគណៈកម្មាធិការប្រតិបត្តិរបស់ក្រុមប្រឹក្សាអូឡាំពិកជាតិ និងជាប្រធានសហព័ន្ធកីឡាជិះកង់សិង្ហបុរីលើកឡើងថា «យើងបានទៅកាន់ទីតាំងប្រកួតកីឡាមួយចំនួនក្នុងទីក្រុងភ្នំពេញដូចជា កីឡាគ្រីឃីត កីឡាហុកគីក្នុងសាល កីឡាហែលទឹក និងកន្លែងហាត់ប្រាណ ដែលទើបនឹងសង់។ កម្ពុជាបានសាងសង់កន្លែងហាត់ប្រាណដ៏ធំសម្រាប់អត្តពលិក ដែលផ្ដល់ភាពងាយស្រួលសម្រាប់ការហ្វឹកហាត់» ។ លោកបន្ថែមថា «ម្ចាស់ផ្ទះកម្ពុជាយល់យ៉ាងច្បាស់ពីតម្រូវការចាំបាច់របស់អត្តពលិក ព្រោះអ្នករៀបចំព្រឹត្តិការណ៍នេះក៏ធ្លាប់ជាអត្តពលិកដែរ។ ពួកគេបានរៀបផែនការយ៉ាងល្អ វានឹងក្លាយជាព្រឹត្តិការណ៍ប្រវត្តិសាស្ត្រ ដែលលើសពីការប្រកួតកីឡា»។
លោកបណ្ឌិតបានបង្ហាញអារម្មណ៍ផ្ទាល់ខ្លួនរបស់លោកថា ចំពោះភូមិកីឡាសម្រាប់អត្តពលិកស្នាក់នៅក៏រៀបចំបានល្អផងដែរ។ អគារទាំងអស់សុទ្ធតែអគារថ្មី ដែលមានអនាម័យខ្ពស់ និងផ្ដល់នូវផាសុកភាពសម្រាប់ការរស់នៅ។ ម៉ាស៊ីនត្រជាក់ត្រូវបានបំពាក់គ្រប់បន្ទប់ ប្រព័ន្ធទឹកក៏ល្អ មានទាំងទឹកក្ដៅ ទឹកត្រជាក់។ សូម្បីតែសេវាកម្មបោកអ៊ុតក៏ម្ចាស់ផ្ទះបានរៀបចំសម្រាប់យើងដែរ។ ក្រុមអត្តពលិកសិង្ហបុរី អាចសម្របខ្លួនទៅនឹងបរិយាកាសនេះ បានយ៉ាងងាយស្រួល។
លោកលើកឡើងថា
“ខ្ញុំញ៉ាំបាន ញ៉ាំអាហារដែលគេបានរៀបចំ ជាមួយនឹងក្រុមអត្តពលិក។ ឃើញថា រសជាតិនៃអាហារពិតជាឆ្ងាញ់!”
ដោយឡែកចំពោះបញ្ហាអាកាសធាតុវិញ លោក Hing Siong បញ្ជាក់ថា នៅភ្នំពេញមានសីតុណ្ហភាពចន្លោះពី ៣៦ ទៅ ៣៨ អង្សារ ដែលកម្ដៅនេះបង្ករការលំបាកសម្រាប់កីឡាមួយចំនួន។ ប៉ុន្តែវាមិនមែនជាបញ្ហាចោទនោះទេ ព្រោះមុនពេលមកដល់កម្ពុជា ក្រុមអត្តពលិកសិង្ហបុរីក៏បានហ្វឹកហាត់ក្រោមកម្ដៅប្រហាក់ប្រហែលនេះដែរ។ គួរជម្រាបជូនថា ក្រុមអត្តពលិកសិង្ហបុរី ដែលចូលរួមព្រឹត្តិការណ៍ស៊ីហ្គេមលើកទី ៣២ នៅកម្ពុជាមានចំនួន ៥៥៨នាក់ ក្នងនោះមានអត្តពលិកថ្មីចំនួន ២៦០នាក់ ដែលនឹងចូលប្រកួតក្នុងប្រភេទកីឡាចំនួន ៣០៕
