ភ្នំពេញ – ក្នុងឱកាស​ចូលរួមទិវា​មួយ​ម៉ោង​សម្រាប់ភពផែនដី ដែល​ធ្វើ​ឡើង​កាលពីថ្ងៃសៅរ៍ចុងសប្តាហ៍នេះ ឯកឧត្តម នេត្រ ភក្រ្តា រដ្ឋលេខាធិការ​ក្រសួងបរិស្ថាន បានធ្វើ​ការ​អំពាវនាវ​ដល់ប្រជាជន​កម្ពុជា ក៏​ដូចជា​នៅ​លើពិភពលោក អនុវត្ត​សកម្មភាពវិជ្ជមាន​បន្ថែមទៀត ដើម្បីស្តារភពផែនដីឡើងវិញ សម្រាប់​គាំទ្រ​ដល់​ការ​អភិវឌ្ឍ​ប្រកប​ដោយ​ចីរភាព។

ឯកឧត្តម នេត្រ ភក្រ្តា មានប្រសាសន៍ថា ភពផែនដី​បានផ្តល់​ខ្យល់​អុកស៊ីសែន​ដល់យើង​សម្រាប់​ដក​ដង្ហើម ទឹក និងអាហារសម្រាប់ទទួលទាន ទ្រទ្រង់​ការ​សាយ​ភាយ​លំអងរុក្ខជាតិ ការពារ​មនុស្ស​ជាតិពីគ្រោះធម្មជាតិ​នានា ព្រមទាំង​ផ្តល់អត្ថប្រយោជន៍​ជា​ច្រើន​ផ្សេង​ទៀត​ចាំបាច់​សម្រាប់​គាំទ្រ​ដល់ជីវិត​មនុស្ស ។ ឯកឧត្តមបន្តថា យើង​ត្រូវ​រួម​គ្នា​ធ្វើ​សកម្មភាព​ពេលនេះ​ជាង​ពេល​ណាៗទាំងអស់ ដើម្បីតបស្នង​ដល់​ភពផែនដី​វិញ ក្នុង​ការ​រស់​នៅ​ប្រចាំ​ថ្ងៃតាមរយៈសកម្មភាពផ្សេងៗ​រាប់ចាប់តាំង​ពី​ការ​កាត់បន្ថយ​នូវ​ធនធាន​ដែល​យើង​មាន (Reduce) ការប្រើប្រាស់ឡើងវិញធនធានដែលយើងមាន (Reuse) និងការកែច្នៃឡើងវិញធនធានដែលយើងមាន(Recycle) ក៏ដូចជាការមិនបរិភោគសាច់សត្វព្រៃ មិនជាវផលិតផលពីសត្វព្រៃ ដើម្បីកាត់បន្ថយហេតុប៉ះពាល់អវិជ្ជមានលើបរិស្ថានធម្មជាតិ រហូតដល់ការរួមចំណែកសកម្មភាពធំ ឧទាហរណ៍ដូចជាការវិនិយោគលើជម្រើសថាមពលកកើតឡើងវិញ ដើម្បីចូលរួមការពារជីវៈចម្រុះនិងប្រព័ន្ធអេកូឡូស៊ីកម្ពុជា។

ឯកឧត្តម នេត្រ ភក្រ្តា រដ្ឋលេខាធិការក្រសួងបរិស្ថាន

“ប្រជាជនគ្រប់រូបត្រូវចូលរួមចំណែកក្នុងការបង្កើនឥទ្ធិពលនៃសកម្មភាពរួមជាវិជ្ជមានសម្រាប់ភពផែនដី។ ទិវាមួយម៉ោងសម្រាប់ភពផែនដីគឺជានិមិត្តរូបនៃការបង្រួបបង្រួម…”

សម្រាប់ ឯកឧត្តម តុប សុភ័ក រដ្ឋលេខាធិការក្រសួងទេសចរណ៍លើក​ឡើងថា ព្រឹត្តិការណ៍ចុងក្រោយមួយចំនួនដែលបានកើតឡើង បានជម្រុញឱ្យមនុស្សនៅជុំវិញពិភពលោកងាកមកគិតគូរសារឡើងវិញអំពីសារៈសំខាន់នៃធម្មជាតិ ទំនាក់ទំនងរបស់ធម្មជាតិក្នុងជីវភាពរស់នៅរបស់យើងទាំងអស់គ្នា និងកត្តាគំរាមកំហែងដែលធម្មជាតិកំពុងប្រឈម ។ លក្ខខ័ណ្ឌទាំងអស់នេះបានបញ្ជាក់ឲ្យឃើញអំពីទំនាក់ទំនងដែលមិនអាចកាត់ផ្តាច់បានរវាងសុខភាពរបស់មនុស្ស និងសុខភាពរបស់ភពផែនដីដែលបច្ចុប្បន្នសុទ្ធតែកំពុងស្ថិតក្រោមការគំរាមកំហែងពីសកម្មភាពផ្សេងៗ។

ដោយ​ឡែក​លោក សេង ទៀក នាយកអង្គការ WWF បានមានប្រសាសន៍ថា ធម្មជាតិគឺជាសម្ព័ន្ធមិត្តដ៏ចាំបាច់បំផុតមួយរបស់មនុស្សដើម្បីប្រយុទ្ធប្រឆាំងនឹងហេតុប៉ះពាល់នៃការប្រែប្រួលអាកាសធាតុ និងកសាងអនាគតមួយប្រកបដោយនិរន្តរភាព ព្រោះធម្មជាតិនិងជីវៈចម្រុះជាអ្នកទ្រទ្រង់ជីវិតមនុស្ស និងសុខមាលភាពក៏ដូចជាផ្តល់អត្ថប្រយោជន៍ផ្នែកសេដ្ឋកិច្ចសង្គម។ លោកបន្តថា ការស្តារធម្មជាតិនិងជីវៈចម្រុះឡើងវិញ ជាដំណោះស្រាយឈ្នះឈ្នះដើម្បីសង្គ្រោះសុខមាលភាព បរិស្ថាន និងមនុស្សជាតិ។

គួរ​បញ្ជាក់ថា ទិវា​មួយ​ម៉ោង​សម្រាប់ភពផែនដី នៅ​ឆ្នាំនេះ បានប្រព្រឹត្ត​ឡើងក្រោម​ប្រធាន​បទ «ឈានទៅមុខ​រួមគ្នា ស្តារផែនដីស្រស់បំព្រង​ឡើងវិញ» ។ នៅកម្ពុជាទិវានេះ​បានប្រារព្ធធ្វើ​កាលពីថ្ងៃទី២៥ ខែមីនា ឆ្នាំ​២០២៣ នៅ Factory Phnom Penh ដោយ​មានការ​តាំង​ពិព័រណ៍​សមិទ្ធផល​ការងារបរិស្ថាន ផលិតផលការងារ​សហគមន៍ វេទិកា​រពិភាក្សា ព្រមទាំង​មានការ​ប្រគុំតន្រ្តី ការ​សម្តែង​សិល្បៈ សំដៅ​បង្កើន​ការ​យល់ដឹង​ពីបរិស្ថាន​ ក៏​ដូចជា​សម្រាប់​ការ​កំសាន្ត​ផងដែរ៕