បណ្ណាល័យអេឡិកត្រូនិកសម្ដេចតេជោ ហ៊ុន សែន បានទទួលមេដាយមាស និងលិខិតសរសើរ ពីចក្រភពអង់គ្លេស ក្នុងកម្មវិធីប្រកួតគំនិតច្នៃប្រឌិត និងបង្កើតថ្មី ២០២៤។ នេះជាមោទនភាពមួយសម្រាប់កម្ពុជាដែលទទួលបានភាពជោគជ័យក្នុងការផ្ដួចផ្ដើមគំនិតច្នៃប្រឌិត និងបង្កើតថ្មី និងមានការទទួលស្គាល់កម្រិតអន្តរជាតិ។

លោក លុយ​ មិថុនា ស្ថាបនិក នៃបណ្ណាល័យអេឡិកត្រូនិកសម្ដេចតេជោ ហ៊ុន សែន មានប្រសាសន៍ថា លោកពិតជាមានមោទនភាពដែលបណ្ណាល័យអេឡិកត្រូនិកសម្ដេចតេជោ ហ៊ុន សែន បានទទួលមេដាមាស និងលិខិតសរសើរពីប្រទេសអង់គ្លេសក្នុងកម្មវិធីប្រកួតគំនិតច្នៃប្រឌិត និងបង្កើតថ្មី ២០២៤។ លោក លុយ​ មិថុនា បន្តថា មុននឹងទទួលបានមេដាយមាស និងលិខិតសរសើរ គឺមានការវាយតម្លៃជាច្រើនរបស់គណកម្មការលើគំនិតច្នៃប្រឌិតក្នុងការបង្កើតថ្មីរបស់យើង។

លោក លុយ​ មិថុនា បញ្ជាក់បន្ថែមថា បណ្ណាល័យអេឡិកត្រូនិកសម្ដេចតេជោ ហ៊ុន សែន ជាគេហទំព័រមួយសម្រាប់ប្រមូលផ្ដុំដោយព័ត៌មានជាច្រើនដូចជា ព័ត៌មានរបស់សម្ដេចតេជោ ព័ត៌មានថ្នាក់ដឹកនាំ និងមានសៀវភៅឯកសារចាប់ពីថ្នាក់ទី១ រហូតដល់ថ្នាក់ទី១២ និងព័ត៌មានចំណេះដឹងជាសំឡេងអាន និងជាវីដេអូជាច្រើនទៀត ដោយទទួលស្គាល់ពីក្រសួងអប់រំ យុវជន និងកីឡា។ «ខ្ញុំសង្ឃឹមថា បណ្ណាល័យអេឡិកត្រូនិកសម្ដេចតេជោ ហ៊ុន សែន ជាបណ្ណាល័យមួយដែលអាចផ្ដល់ឱកាសឱ្យប្រជាជនខ្មែរស្វែងរកចំណេះវិជ្ជាបាន»។

ស្ថាបនិកនៃបណ្ណាល័យអេឡិកត្រូនិកសម្ដេចតេជោ ហ៊ុន សែន លើកឡើងថា បណ្ណាល័យអេឡិកត្រូនិកសម្ដេចតេជោ ហ៊ុន សែន បង្កើតឡើងដើម្បីឱ្យប្រជាជនខ្មែរ សិស្សានុសិស្ស អាចរៀនបានគ្រប់ទីកន្លែង បើទោះជាមិនមានលទ្ធភាពក៏អាចរៀនបាន។ ជាពិសេស កម្មករ កម្មការិនីរោងចក្រដែលមិនទាន់ចេះអានអក្សរនៅឡើយ អាចឆ្លៀតពេលរៀនបាន បន្ទាប់ពីទំនេរពីការងារដោយមានទាំងសៀវភៅ និងវីដេអូបង្រៀន។

បើតាម លោក លុយ​ មិថុនា បណ្ណាល័យអេឡិកត្រូនិកសម្ដេចតេជោ ហ៊ុន សែន បង្កើតឡើងចាប់តាំងពីឆ្នាំ២០១៥ ហើយបានដាក់ឱ្យដំណើរការប្រើប្រាស់ក្នុងឆ្នាំ២០២២ នៅសាលាមធ្យមវិចិត្រសិល្បៈ។ លោក លុយ​ មិថុនា បន្តថា រយៈពេលជិត៩ឆ្នាំមកនេះ ក្រុមការងារនៅតែខំប្រឹងប្រែង និងយកបណ្ណាល័យអេឡិកត្រូនិកសម្ដេចតេជោ ហ៊ុន សែន ដែលជាគំនិតច្នៃប្រឌិតរបស់ក្រុមការងារទៅប្រកួតប្រជែងនៅបរទេសជាញឹកញាប់។

គួរបញ្ជាក់ថា បណ្ណាល័យអេឡិកត្រូនិក សម្ដេចតេជោ ហ៊ុន សែន បានបង្កើតឡើងដើម្បីតបស្នងតម្លៃនៃសន្តិភាព ហើយបណ្ណាល័យនេះមានព័ត៌មានចំណេះដឹងជាច្រើនរបស់ថ្នាក់ដឹកនាំកំពូលៗ ជាពិសេសព័ត៌មានរបស់សម្ដេចតេជោ ហ៊ុន សែន នាយករដ្ឋន្ត្រីនៃកម្ពុជា ដែលអាចប្រើជាប្រយោជន៍ទូទៅសម្រាប់សិស្សនិស្សិត និងប្រជាពលរដ្ឋ៕