អ្នកមានឥទ្ធិពលលើបណ្ដាញសង្គម ដែលត្រូវបានគេស្គាល់ថា Influencer គឺជាបុគ្គលម្នាក់ ដែលអាចបញ្ចុះបញ្ចូលក្រុមមនុស្សដែលជាអ្នកតាមដាន ឬអ្នកគាំទ្ររបស់ខ្លួន ឱ្យធ្វើសកម្មភាពផ្សេងៗ ដូចជា ឥរិយាបថរស់នៅ ការទិញផលិតផល ឬប្រើប្រាស់សម្ភារដូចគេជាដើម។ បច្ចុប្បន្ន ទាំងក្នុងបរិបទសកលលោក និងកម្ពុជា អ្នកមានឥទ្ធិពលលើបណ្ដាញសង្គម ទទួលបានគាំទ្រ និងមានឥទ្ធិពលយ៉ាងខ្លាំងលើសាធារណៈជន ជាពិសេសយុវជន។

ហេតុអ្វីបានជា អ្នកមានឥទ្ធិពលលើបណ្ដាញសង្គម ទទួលបានការចាប់អារម្មណ៍ និងមានឥទ្ធិពលខ្លាំង?

លោកបណ្ឌិត ឈត ប៊ុនថង អ្នកស្រាវជ្រាវ និងជាអ្នកជំនាញទស្សនវិជ្ជា នៃរាជបណ្ឌិត្យសភាកម្ពុជា មានប្រសាសន៍ថា រឿងនេះមិនមែនចៃដន្យទេ ដែលអ្នកមានឥទ្ធិពលលើបណ្ដាញសង្គម ទទួលបានការចាប់អារម្មណ៍ និងមានឥទ្ធិពលខ្លាំង។ មិនមែនចៃដន្យ ព្រោះពួកគេទទួលបានការរៀនសូត្រ បណ្ដុះបណ្ដាល និងយល់អំពីទំនោរសង្គម ដោយដឹងថាមនុស្សចង់បានអ្វី ហើយត្រូវធ្វើអ្វី ដើម្បីតម្រូវចំណីអារម្មណ៍ និងទាក់ទាញផ្លូវអារម្មណ៍អ្នកមើល។

លោក ហួត សេងគៀ អ្នកផលិតមាតិកាអប់រំ យល់ថា មូលហេតុដែលអ្នកមានឥទ្ធិពលលើបណ្ដាញសង្គមមានឥទ្ធិពលខ្លាំងលើសង្គម និងយុវជន ដោយសារបច្ចុប្បន្នយុវជនភាគច្រើនប្រើប្រាស់បណ្ដាញសង្គម ហើយការចូលចិត្តមាតិកា ដែលគេបានផលិត បានធ្វើឱ្យយុវជនជឿជាក់រាល់ពាក្យសម្ដី និងសកម្មភាពរបស់បុគ្គលនោះ។ លោកបន្តថា ការជឿជាក់នេះ បានធ្វើឱ្យផលិតមាតិកានោះ មានឥទ្ធិពលដោយស្វ័យប្រវត្តិ។

លោក ជី សុផាត អ្នកជំនាញក្នុងវិស័យបច្ចេកវិទ្យា និងជាអ្នកបង្កើតមាតិកាលើបណ្ដាញសង្គម លើកឡើងថា ជារឿងធម្មតាទេ អ្នកមានឥទ្ធិពលលើបណ្ដាញសង្គម ឬ Influencer ច្បាស់ជាមានឥទ្ធិពលលើសង្គម។ លោកបន្តថា ឥទ្ធិពលច្រើន ឬតិច អាស្រ័យលើចំណូលចិត្តអ្នកមើល វិស័យ ខ្លឹមសារ ភាពងាយយល់ និងប្រភេទមាតិកា ដែលគេបានផលិត។ ខណៈបច្ចុប្បន្ន នៅកម្ពុជា មាតិកា ដែលទទួលបានការចាប់អារម្មណ៍ខ្លាំង គឺជាមាតិកាបែបកម្សាន្ត ហើយឥទ្ធិពល នៃមាតិកាប្រភេទនេះ ក៏មានខ្លាំងដែរ ព្រោះជាមាតិកាផ្ដល់អារម្មណ៍រីករាយដល់អ្នកមើល។

គោលការណ៍ ដែលយុវជនត្រូវមាន មុនតាមដានអ្នកមានឥទ្ធិពលណាម្នាក់

លោកបណ្ឌិត ឈត ប៊ុនថង យល់ថា សម្រាប់យុវជន ការបង្កើតគោលការណ៍សម្រាប់ខ្លួនឯងមុនតាមនរណាម្នាក់ គឺពិតជាសំខាន់។ លោកបន្តថា មុនតាមដានបុគ្គលមានឥទ្ធិពលណាម្នាក់ យុវជនត្រូវដឹងថា អ្វីល្អ អ្វីអាក្រក់ អ្វីត្រូវ អ្វីខុស អ្វីគួរធ្វើ អ្វីមួយមិនគួរធ្វើ ត្រូវបែងចែកឱ្យច្បាស់, បន្ទាប់មកត្រូវដឹងថា គេកំពុងផលិតមាតិកាលើជ្រុងអ្វី ស្របនឹងគោលការណ៍សីលធម៌ ច្បាប់ជាតិ និងអន្តរជាតិឬទេ ហើយអ្វីដែលគេកំពុងធ្វើនោះបម្រើដល់មនុស្សជាតិ ឬសង្គមឬទេ។

ប្រសិនបើមានគោលការណ៍មុនតាមដាននរណាម្នាក់ទេ យុវជន ងាយនឹងទទួលយកគំរូមិនល្អ ទុកក្នុងស្មារតីរបស់ខ្លួន ឬនាំគ្នាគាំទ្រសកម្មភាពមិនល្អ ដោយមិនដឹងខ្លួន ដែលនាំគ្នាធ្វើឱ្យសង្គម តំបន់ឬពិភពលោក ប្រែប្រួល ឬមានទំនោរទៅផ្លូវមិនល្អដោយមិនដឹងខ្លួន។

លោក ហួត សេងគៀ យល់ថា យុវជនអាចទស្សនា ឬតាមដានអ្នកមានឥទ្ធិពលលើបណ្ដាញសង្គម ប៉ុន្តែមិនគួររៀនសូត្រតាមពួកគេនោះទេ ប្រសិនបើមិនមានបំណងចង់ក្លាយជាអ្នកមានឥទ្ធិពលលើបណ្ដាញសង្គមនៅថ្ងៃអនាគត ឬមិនមានបំណងធ្វើការ រកស៊ីជាមួយអ្នកមានឥទ្ធិពលលើបណ្ដាញសង្គម។ លោកសង្កត់ធ្ងន់ថា អ្នកដែលយុវជនត្រូវរៀនសូត្រតាម គឺអ្នកជំនាញបច្ចេកទេស ក្នុងវិស័យដែលខ្លួនកំពុងរៀន ឬកំពុងធ្វើការ ហើយអ្នកដែលយុវជនត្រូវគាំទ្រ គឺខ្លួនឯង។

ក្រមសីលធម៌ សម្រាប់អ្នកផលិតមាតិកាលើបណ្ដាញសង្គម

លោក ជី សុផាត លើកឡើងថា ក្នុងការផលិតមាតិកា យើងមិនអាចវាយតម្លៃបានថា មាតិកាមួយល្អ ឬមិនល្អនោះទេ ព្រោះមាតិកានីមួយៗ មានគោលដៅអ្នកគាំទ្រខុសគ្នា ហើយប្រជាប្រិយភាពនៃមាតិកា គឺអាស្រ័យលើចំណូលចិត្ត អ្នកតាមដាន និងអ្នកទស្សនា។ ប៉ុន្តែក្នុងនាមជាអ្នកផលិតមាតិកា ត្រូវតែយល់ពីគោលការណ៍ក្រមសីលធម៌ ច្បាប់ និងគោលការណ៍ណែនាំ ដែលមានការទទួលស្គាល់ទាំងស្ដង់ដាជាតិ និងអន្តរជាតិ។

ស្រដៀងនេះដែរ លោកបណ្ឌិត ឈត ប៊ុនថង លើកឡើងថា អ្នកមានឥទ្ធិពលលើបណ្ដាញសង្គម ត្រូវមានសីលធម៌ គុណធម៌ដោយខ្លួនឯង។ លោកថា ត្បិតជាអ្នកមានឥទ្ធិពលលើបណ្ដាញសង្គម ប៉ុន្តែគាត់ក៏ត្រូវគិតដែរថា អ្វីដែលគាត់បង្ហោះនោះ មានផលបែបណាចំពោះសង្គម និងអ្នកទស្សនា មិនអាចផលិតមាតិកា ដោយគិតតែពីប្រយោជន៍ផ្ទាល់ខ្លួននោះទេ៕