ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភ្នំពេញ – មានប្រសាសន៍លើកឡើងនៅក្នុងកម្មវិធីប្រគល់សញ្ញាបត្រជូននិស្សិតបញ្ចប់ការសិក្សាពីសាកលវិទ្យាល័យភូមិន្ទនីតិសាស្រ្ត និងវិទ្យាសាស្រ្តសេដ្ឋកិច្ច នាព្រឹកថ្ងៃទី៥ ខែមិថុនា ឆ្នាំ២០២៣ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា បានស្នើទៅដល់យុវជន ក៏ដូចជាពលរដ្ឋកម្ពុជា បន្តរៀនពេញមួយជីវិត ដោយសារតែសភាពការណ៍ពិភពលោកដើរកាន់តែលឿន។
សម្តេចតេជោមានប្រសាសន៍ថា នៅថ្ងៃនេះ យើងអាចនឹងគិតថា យើងបានរៀនចប់បរិញ្ញាបត្រ យើងកំពុងមានលទ្ធភាព ប៉ុន្តែសភាពការណ៍ពិភពលោកបច្ចុប្បន្នកំពុងតែដើរលឿនណាស់ បច្ចេកវិទ្យាកាន់តែវិវឌ្ឍខ្លាំង ដូច្នេះតម្រូវឱ្យយើងរៀនសូត្រជាប្រចាំ ដោយមិនអាចនៅទ្រឹងបាននោះទេ។ បើតាមប្រសាសន៍របស់សម្តេចតេជោ ប្រសិនបើយើងនៅទ្រឹង នោះយើងនឹងក្លាយទៅជាជនអភិរក្សនិយមដ៏គួរឱ្យខ្លាច។
សម្តេចតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា
“បញ្ហានេះ វាមិនមែនគ្រាន់តែចង្អុលបង្ហាញទៅលើនិស្សិតទេ ប៉ុន្តែចង្អុលបង្ហាញទៅលើមេដឹកនាំផងដែរ បើមេដឹកនាំនោះមិនព្រមរៀនសូត្រ មិនព្រមស្វែងយល់ គឺពួកគាត់នឹងក្លាយទៅជាឧបស័គ្គរារាំងនូវការជឿនលឿនរបស់ក្មេងជំនាន់ក្រោយ វាប្រៀបបានដូចជាដុំថ្មសង្កត់ពន្លកដែលកំពុងតែរីកដុះដាល ដូច្នេះគ្រប់តួអង្គទាំងអស់ ត្រូវបន្តការរៀន រៀនពេញមួយជីវិត….”
សម្តេចតេជោបន្តថា ដំណាក់កាលនេះ គឺជាដំណាក់កាលសេដ្ឋកិច្ចឌីជីថល ដូច្នេះគេមិនអាចយកបញ្ហាកាលពី២០ឆ្នាំមុន មកធ្វើជាវិធីសាស្រ្តដឹកនាំនៅពេលនេះបានទេ ។ តែយ៉ាងណាបើតាមប្រសាសន៍របស់សម្តេចតេជោ ត្បិតតែអតីតកាលយើងមិនអាចធ្វើអ្វីវាកើត ប៉ុន្តែអតីតកាលវាផ្តល់នូវបទពិសោធន៍ឱ្យយើងសម្រាប់តម្រង់ផ្លូវបច្ចុប្បន្នកាល និងអនាគតកាល។
សូមបញ្ជាក់ថា ការសិក្សាពេញមួយជីវិត គឺជាដំណើរការរៀនសូត្រទាំងនៅក្នុងប្រព័ន្ធ ក្រៅប្រព័ន្ធ និងមិនផ្លូវការ តាំងពីការចាប់កំណើតរហូតដល់វ័យជរា ដើម្បីអភិវឌ្ឍវិជ្ជាសម្បទា បំណិនសម្បទា ចរិយាសម្បទា កាយសម្បទា និងគុណសម្បទា ឱ្យក្លាយជាពលរដ្ឋល្អ និងចេះរួមរស់ជាមួយគ្នាប្រកបដោយសុខដុមនៅក្នុងសង្គម។ ស្ថិតក្នុងបរិការណ៍ នៃសកលភាវូបនីយកម្មសតវត្សរ៍ទី២១ និងការប្រកួតប្រជែងទាំងក្នុងតំបន់ និងសកលលោកផ្នែកសង្គម សេដ្ឋកិច្ច នយោបាយ បរិស្ថាន វប្បធម៌ ឧស្សាហកម្ម និងបច្ចេកវិទ្យា បុគ្គលគ្រប់រូបត្រូវទទួលបានការបណ្តុះបណ្តាលវប្បធម៌សិក្សាពេញមួយជីវិត។
បច្ចុប្បន្ននេះ កម្ពុជាកំពុងបោះជំហានទៅរកដំណាក់កាលថ្មីមួយទៀត នៃការអភិវឌ្ឍ គឺការប្រែក្លាយកម្ពុជាឱ្យទៅជាប្រទេសដែលមានចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសដែលមានចំណូលខ្ពស់នៅឆ្នាំ២០៥០។ នៅក្នុងន័យនេះ រាជរដ្ឋាភិបាលកម្ពុជា ក៏បានបង្កើតឡើងនូវគោលនយោបាយជាតិស្តីពីការសិក្សាពេញមួយជីវិត ដើម្បីឆ្លើយតបទៅនឹងបរិបទថ្មី សំដៅអភិវឌ្ឍធនធានមនុស្សប្រកបដោយសក្តានុពលសម្រាប់ឈានឆ្ពោះទៅសម្រេចចក្ខុវិស័យកម្ពុជាខាងលើ៕
