ក្នុងជំនួបពិភាក្សាការងារជាមួយតំណាងក្រសួងអប់រំ នៃប្រទេសសិង្ហបុរី កាលពីពេលថ្មីៗនេះ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្រ្តី រដ្ឋមន្រ្តីក្រសួងអប់រំ យុវជន និងកីឡា បានបង្ហាញពីចក្ខុវិស័យក្នុងការធ្វើ​កំណែទម្រង់វិស័យអប់រំកម្ពុជាឆ្ពោះទៅរកគុណភាពដោយរៀនសូត្រពីប្រព័ន្ធអប់រំសិង្ហបុរី និងបណ្តាប្រទេសនានាទូទាំងពិភពលោក ដើម្បីឆ្លើយតបទៅនឹងយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាលអាណត្តិទី៧ ដែលបានកំណត់យកការអភិវឌ្ឍធនធានមនុស្សជាអាទិភាព ឈានទៅសម្រេចចក្ខុវិស័យកម្ពុជាឆ្នាំ២០៣០ និង២០៥០។

ឯកឧត្តមបណ្ឌិតសភាចារ្យ ហង់ជួន ណារ៉ុន បានលើកឡើងពីកំណែទម្រង់វិស័យអប់រំជាច្រើនដំណាក់កាលនៅកម្ពុជា ដែលបានចាប់ផ្តើមពីការធ្វើកំណែទម្រង់ការប្រឡងមធ្យមសិក្សាទុតិយភូមិ តាមរយៈការពង្រឹងបន្ថែមសមត្ថភាពគ្រូបង្រៀន និងវិធីសាស្ត្របង្រៀន ការពង្រឹងការគ្រប់គ្រងនៅតាមសាលារៀន ការលើកកម្ពស់បច្ចេកវិទ្យាអប់រំ វិធីសាស្ត្របង្រៀនបែបចម្រុះ និងការសហការជាមួយដៃគូអភិវឌ្ឍ និងអ្នកពាក់ព័ន្ធក្នុងវិស័យអប់រំ។

រដ្ឋមន្រ្តីក្រសួងអប់រំកម្ពុជា ក៏បានចែករំលែកពីសមិទ្ធផល១០ឆ្នាំ នៃកំណែទម្រង់ការបណ្តុះបណ្តាលគ្រូបង្រៀនក្នុងវិស័យអប់រំកម្ពុជា ចាប់តាំងពី ឆ្នាំ២០១៤ មកទល់បច្ចុប្បន្ននេះ ដោយរំលេចថា ក្រសួងបានដាក់ចេញនូវយុទ្ធសាស្ត្រកំណែទម្រង់សាលាគរុកោសល្យ ដូចជា ១. បង្កើនគុណវុឌ្ឍិគ្រូ កែលម្អកម្មវិធីបណ្តុះបណ្តាល និងវិធីសាស្ត្របង្រៀន ២. លើកកម្ពស់សមត្ថភាពវិជ្ជាជីវៈគ្រូឧទ្ទេស ៣. អភិវឌ្ឍហេដ្ឋារចនាសម្ព័ន្ធ ៤. លើកកម្ពស់ភាពជា អ្នកដឹកនាំគ្រប់គ្រង ៥. ផ្សារភ្ជាប់ទ្រឹស្តីទៅនឹងការអនុវត្តកម្មវិធីសិក្សាគរុកោសល្យ ៦. ការធានាគុណភាពអប់រំជាដើម។

ក្នុងឱកាសនោះដែរ លោក Song Chern Wei អគ្គនាយករងទទួលបន្ទុកកម្មវិធីសិក្សាក្នុងវិស័យអប់រំ នៃប្រទេសសិង្ហបុរី បានបង្ហាញជូនឯកឧត្តមរដ្ឋមន្រ្តីអំពីវឌ្ឍនភាពនៃការអភិវឌ្ឍប្រព័ន្ធអប់រំរបស់ប្រទេសសិង្ហបុរី ដើម្បីសម្របទៅនឹងដំណាក់កាលនីមួយៗនៃបម្រែបម្រួលសេដ្ឋកិច្ច រួមមាន ការអភិវឌ្ឍជំនាញសតវត្សទី២១ នៅក្នុងសាលារៀន, ការរៀបចំសកម្មភាពបន្ថែមនៅក្នុងកម្មវិធីសិក្សា, ការអប់រំកាយដើម្បីធ្វើឱ្យរាងកាយមានភាពសកម្ម និងសុខភាពល្អ, ការលើកកម្ពស់ជំនាញឌីជីថល និងបច្ចេកវិទ្យា, ការពង្រឹងការគាំទ្រស្មារតីនិងសុខុមាលភាព និងការអប់រំកម្រិតឧត្តមសិក្សា។

លោក Song Chern Wei ក៏បានលើកឡើងអំពីការគាំទ្រ និងពង្រីកបន្ថែមនូវគន្លងនៃការសិក្សាពេញមួយជីវិត ដោយរៀបចំកម្មវិធីសិក្សាឱ្យមានភាពចម្រុះ និងបង្កើនឱកាសបន្ថែម ធ្វើឱ្យប្រសើរឡើងនៃការអប់រំនៅថ្នាក់មត្តេយ្យសិក្សា និងការបង្កើនភាពបត់បែននៃការសិក្សា តាមការអនុវត្តកម្មវិធី Full Subject-Based Banding។

គួរ​ជំរាបជូនថា ក្នុងអំឡុងដំណើរទស្សនកិច្ចផ្លូវការនៃកម្មវិធី Lee Kuan Yew Exchange Fellowship នៅប្រទេសសិង្ហបុរី ឯកឧត្តម ហង់ជួន ណារ៉ុន បានដឹកនាំប្រតិភូក្រសួងអប់រំ យុវជន និងកីឡា បំពេញទស្សនកិច្ចនៅវិទ្យាស្ថានជាតិអប់រំនៃសាកលវិទ្យាល័យបច្ចេកវិទ្យាណានយ៉ាងសិង្ហបុរី (Nanyang Technological University) ដើម្បីស្វែងយល់ពីការបណ្ដុះបណ្ដាលគ្រូបង្រៀន, ធ្វើទស្សនកិច្ចសិក្សានៅវិទ្យាស្ថានពហុបច្ចេកវិទ្យាណានយ៉ាងសិង្ហបុរី (Nanyang Polytechnic) ដើម្បីពិនិត្យមើលគំរូនៃប្រព័ន្ធអប់រំពហុបច្ចេកទេសរបស់សិង្ហបុរីផងដែរ៕