វីដេអូនៃសកម្មភាពរត់ប្រណាំងចម្ងាយ ៥០០០ម៉ែត្ររបស់កីឡាការិនីជម្រើសជាតិកម្ពុជា ប៊ូ សំណាង កាលពីថ្ងៃច័ន្ទ ទី៨ ខែឧសភា ក្នុងទីលាននៃពហុកីឡដ្ឋានមរកតតេជោ បានជាធ្វើឱ្យមហាជនកោតសរសើរ និងរំជួលចិត្តយ៉ាងខ្លាំង ចំពោះតែភាពអត់ធ្មត់ និងស្មារតីតស៊ូមិនបោះបង់របស់អត្តពលិករូបនេះ ដោយនាងបានបន្តរត់រហូតដល់គោលដៅដែលបានកំណត់ ទោះជារត់យឺតជាងកីឡាការិនីដទៃជាច្រើនជុំ និងដល់ទីក្រោយកីឡាការិនីវៀតណាម Nguyen Thi Oanh ដែលដល់ទីមុនគេ ៦នាទីក៏ដោយ។

ក្រោយពីរត់មកដល់ទី ប៊ូ សំណាង បានលើកដៃសំពះអរគុណដល់អ្នកគាំទ្រ ទាំងស្រក់ទឹកភ្នែកលាយឡំនឹងដំណក់ទឹកភ្លៀង ដែលធ្វើឱ្យអ្នកគាំទ្រទាំងអស់ទះដៃសាទរចំពោះនាង។ លើសពីនេះ វីដេអូរបស់ កីឡាការិនី ប៊ូ សំណាង ក៏​បាននិងកំពុងល្បីនៅបណ្ដាញសង្គមទាំងក្នុងស្រុក និងបរទេស ដែលមហាជនបានបង្ហាញការកោតសរសើរចំពោះទឹកចិត្តកីឡាដ៏អង់អាច និងក្លាហានមួយនេះ។

កាសែតថៃ MainStand បានចុះផ្សាយពី សំណាង ដោយបានលើកឡើងថា «នេះគឺជាថ្ងៃដំបូង ដែលខ្ញុំឃើញមនុស្សយំហើយ មិនឃើញទឹកភ្នែក ប៉ុន្តែបើយើងក្រឡេងទៅមើលនាង វាគឺជាទិដ្ឋភាពនៃការដឹងគុណអ្វីមួយ។»

ទំព័រហ៊្វេសប៊ុករបស់ព្រះមហាក្សត្រកម្ពុជា ដែលមានឈ្មោះថា Royal du Cambodge ក៏បានបង្ហាញសារលើកទឹកចិត្ត​ចំពោះ អត្តិពលិកកម្ពុជារូបនេះ ដោយថា «កីឡា គឺលើសពីភាពឈ្នះ និងចាញ់» ។ កីឡា មិនបានសំដៅទៅលើតែសេចក្តីឈ្នះចាញ់ចំពោះគូរប្រកួតនោះទេ ខ្លឹមសារបំផុតរបស់អត្តពលិក គឺការបង្ហាញឱ្យ​ឃើញនូវសេចក្តីអំណត់តស៊ូ ការខិតខំប្រឹងប្រែងយកឈ្នះលើខ្លួនឯងចំពោះបញ្ហាដែលកំពុងប្រឈម ស្តែងឱ្យឃើញនូវចំណុចពិសេសរបស់យើងទៅកាន់ពិភពខាងក្រៅ មួយជំហាននៃការខិតខំប្រឹងប្រែង គឺមួយជំហានខិតទៅរកភាពជោគជ័យ។ ប្រជាជនកម្ពុជាគ្រប់រូបមានមោទនភាពយ៉ាងក្រៃលែងចំពោះ អត្តពលិក តំណាងដល់កម្ពុជាទាំងអស់ដែលបានខិតខំប្រឹងប្រែងស្វែងរកមេដាយជូនជាតិ។ យើងនៅទីនេះគាំទ្រអ្នក មិនថាជ័យជំនះ ឬបរាជ័យ។

សម្រាប់លោក ហ្សង់ ហ្រ្វង់ស័រតាន់ នាយកគ្រប់គ្រងវិទ្យុបារាំងអន្តរជាតិ និង​ក៏​ត្រូវ​គេ​ស្គាល់ថា គឺជា​អ្នក​វិភាគអន្តរជាតិដ៏ល្បីឈ្មោះផងដែរនោះ ក៏​បាន​សរសេរ​នៅ​លើ​បណ្តាញ​សង្គម ​កោតសរសើរ​ចំពោះ​ការ​តស៊ូរបស់កីឡាការិនី ប៊ួ សំណាង ដោយថា «មហាជោគជ័យ គឺ ការយកឈ្នះលើខ្លួនឯង», ប៊ួ សំណាង រត់ទាល់តែដល់ទី (៥ពាន់ម៉ែត្រ) ទោះដល់ក្រោយគេ ទោះត្រូវរត់កាត់ខ្យល់និងក្រោមទឹកភ្លៀង។ លោក​បញ្ជាក់ថា នេះហើយជារូបភាពដែលមានន័យជាងគេ សម្រាប់កម្ពុជាយើង។ ដោយហេតុតែសង្គ្រាម យើងរត់តោងឡើងរទេះភ្លើងនៃការអភិវឌ្ឍក្រោយគេ ប៉ុន្តែយើងនឹងគង់តែទៅដល់ទីអភិវឌ្ឍ ពីព្រោះសន្តិភាពវិលវិញ ពីព្រោះខ្មែររួបរួម ពីព្រោះខ្មែរឈប់បោះបង់។

គួរជម្រាបជូនថា ក្រៅពីសារលើកទឹកចិត្តពីសំណាក់កាសែត និងមហាជនក្នុងស្រុក និងក្រៅស្រុក ផ្ញើសារលើកទឹក និងកោតសរសើរចំពោះនាង ក៏មានមហាជនកម្ពុជាផ្ដល់ប្រាក់លើទឹកចិត្តចំពោះរូបនាងផងដែរ៕