ក្នុងកិច្ចប្រជុំសន្និសីទភាគីនៃអនុសញ្ញា​​បាស៊ែល​​ រ៉ូតាថឺដាម និងស្តុកខូម​​ ក្រោមប្រធានបទ « ការពន្លឿនគោលដៅគ្រប់គ្រងសារធាតុគីមី និងសំណល់ប្រកបដោយសុវត្ថិភាពបរិស្ថាន​» ដែលរៀបចំ​ឡើង​នៅ​ទីក្រុងហ្សឺណែវ ប្រទេសស្វីស ឯកឧត្តម សាបូ អូហ្សាណូ រដ្ឋលេខាធិការ​ក្រសួងបរិស្ថាន បានលើក​ឡើងពីគោលជំហរ និងការប្តេជ្ញាចិត្តរបស់កម្ពុជា​ក្នុងការ​ចូលរួម​ជាមួយ​សហគមន៍​អន្តរជាតិ​លើ​ការងារ​កិច្ច​គាំពារបរិស្ថាន និង​ការពារ​សុខភាពសាធារណៈ តាមរយះការផ្តល់សច្ចាប័នចូលជាភាគី​ និងបំពេញកាតព្វកិច្ចដែលបានកំណត់នៅក្នុងកិច្ចព្រមព្រៀងពហុភាគីវិស័យបរិស្ថាន។

ជាមួយ​គ្នា​នេះដែរ ឯកឧត្តម សាបូ អូហ្សាណូ ក៏បានស្នើ កឧត្តម​​​ Rolph Payet អគ្គលេខាធិកានៃអនុសញ្ញាបាស៊ែល​ អនុសញ្ញារ៉ូថឺដាម និងអនុសញ្ញាស្តុកខូម​​ (BRS) បន្តផ្តល់ជំនួយបច្ចេកទេស និងថវិកាដល់កម្ពុជា ដើម្បីពង្រឹង និងបង្កើនសមត្ថភាពស្ថាប័ន​ក្នុងការ​អនុវត្តកាតព្វកិច្ចក្រោមអនុសញ្ញាអន្តរជាតិពាក់ព័ន្ធនឹង​ការ​គ្រប់គ្រងសារធាតុ និងសំណល់គ្រោះថ្នាក់ឱ្យ​កាន់តែមានប្រសិទ្ធភាពបន្ថែមទៀត។

ជាការឆ្លើយតប​ ​​ ឯកឧត្តម​ Rolph Payet បានថ្លែងអំណរគុណដល់កម្ពុជា​ដែលបានចូលរួមយ៉ាងសកម្មនៅក្នុងការបំពេញកាតព្វកិច្ចក្រោមអនុសញ្ញា​បាស៊ែល​ រ៉ូថឺដាម និងស្តុកខូម​តាមរយៈការផ្តល់របាយការណ៍ និងការរៀបចំលិខិតបទដ្ឋានគតិយុត្តពាក់ពន្ធ័នឹងការគ្រប់គ្រងសារធាតុ​និងសំណល់គ្រោះថ្នាក់​ ហើយនឹងទទួលយកសំណើររបស់កម្ពុជាលើការលើកកម្ពស់សមត្ថភាពស្ថាប័នក្នុងការអនុវត្តអនុសញ្ញា​ BRS។​

គួរជំរាបជូនថា កិច្ចប្រជុំសនិ្នសីទភាគីលើកទី១៦ នៃអនុសញ្ញាបាសែល ស្តីពីការត្រួតពិនិត្យចលនាដឹកជញ្ជូន និងការបោះបង់ចោលសំណល់គ្រោះថ្នាក់ឆ្លងដែន (BC COP16) កិច្ចប្រជុំសន្និសីទភាគីលើកទី១១ នៃអនុសញ្ញារ៉ូថឺដាម ស្តីពីនីតិវិធីនៃការយល់ព្រមផ្តល់ព័ត៌មានជាមុនចំពោះសារធាតុគីមី និងថ្នាំកសិកម្មគ្រោះថ្នាក់ក្នុងពាណិជ្ជកម្មអន្តរជាតិ (RC COP11) និងកិច្ចប្រជុំសន្និសីទភាគីលើកទី១១ នៃអនុសញ្ញាស្ដុកខូម ស្តីពីសារធាតុបំពុលសរីរាង្គមិនងាយបំបែកធាតុ (SC COP11) ​​​ ដែលរៀបចំឡើងនៅទីក្រុង​ហ្សឺណែវ​​ ប្រទេសស្វីស បានប្រព្រឹត្តធ្វើ​ឡើង​ចាប់ពីថ្ងៃទី០១ ដល់ថ្ងៃទី១២ ខែឧសភា ឆ្នាំ​២០២៣ ដែលមានអ្នកចូលរួមចំនួន​​ ១៤០០​ តំណាងអោយប្រទេសជាភាគីចំនួន​​១៨២​ និងអង្គការអន្តរជាតិជាអ្នកអង្កេតការណ៍។​ ​

គោលបំណងសំខាន់នៃកិច្ចប្រជុំសន្និសីទភាគីនៃអនុសញ្ញាទាំងបីនេះ រួមមាន៖​​ ពិនិត្យ​​លើការវឌ្ឍនភាព​​និងបញ្ហាប្រឈមក្នុងការអនុវត្តអនុសញ្ញាទាំងបី​​ ដើម្បីស្វែងរកដំណោះស្រាយសំដៅជួយដល់ប្រទេសជាភាគី, ពិភាក្សា​​​​ និងសម្រេចលើសេចក្តីសម្រេច​​ និងសំណើកែសម្រួលមាត្រាមួយចំនួនដែលបានរៀបចំ​ដោយក្រុមការងារបច្ចេកទេស និងបានស្នើឡើងដោយប្រទេសជាភាគី​ ដើម្បីលើកកម្ពស់​ប្រសិទ្ធិភាពក្នុងការអនុវត្តអនុសញ្ញា​​សំដៅសឆ្លើយតបទៅនឹងគោលដៅដែលបានកំណត់, ពិនិត្យ​ និងពិភាក្សា​លើការរៀបចំផែនការសកម្មភាព និងថវិកាសម្រាប់ឆ្នាំ​ ២០២៤​ និង​២០២៧៕