ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភ្នំពេញ – នាពិធីបិទកម្មវិធីប្រកួតកីឡាអាស៊ីអាគ្នេយ៍ (ស៊ីហ្គេម) នៅរាត្រីថ្ងៃទី១៧ ខែឧសភា គណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍ (SEA Games) បានប្រកាសផ្តល់ពានជូនអត្តពលិកឆ្នើមប្រចាំព្រឹត្តិការណ៍កីឡាស៊ីហ្គេមឆ្នាំ២០២៣ ចំនួនពីររូប រួមមាន កីឡាការិនីវ៉ូវីណាមកម្ពុជា ប៉ាល់ ឆរស្មី និងកីឡាការិនីហែលទឹកសិង្ហបុរី Ting Wn Quah ។
កីឡាការិនីវ៉ូវីណាមកម្ពុជា ប៉ាល់ ឆរស្មី ដែលបានឈ្នះមេដាយមាស ៤គ្រឿង, មេដាយប្រាក់ ១គ្រឿង, និងសំរឹទ្ធ ១គ្រឿង ។ ចំណែកកីឡាការិនីហែលទឹកសិង្ហបុរី Ting Wn Quah ដែលបានឈ្នះមេដាយមាស ៦គ្រឿង និងប្រាក់ ២គ្រឿង ។ សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធានគណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍លើកទី៣២ ឆ្នាំ២០២៣ បានប្រគល់ពានជូនដល់កីឡាការិនីទាំងពីររូប ។
ពានអត្តពលិកឆ្នើមប្រចាំព្រឹត្តិការណ៍កីឡាស៊ីហ្គេមឆ្នាំ២០២៣ មានរូបសត្វទន្សាយជាតំណាង ។ គួរបញ្ជាក់ថា សម្រាប់ព្រឹត្តិការណ៍កីឡាស៊ីហ្គេមនៅកម្ពុជា បានសម្រេចយករូបទន្សាយណីរជានិមិត្តសញ្ញារង្វាន់ (Mascots) ។ រូបសត្វទន្សាយពីរមានឈ្មោះ បុរី (ឈ្មោល) និង រំដួល (ញី) ដែលមានក្នុងក្បាច់គុនបុរាណខ្មែរ ល្បុក្កតោ ។ ទន្សាយឈ្មោលឈ្មោះ បុរី តំណាងឱ្យសាមគ្គីភាព ហើយទន្សាយញីឈ្មោះ រំដួល ជាផ្កាតំណាងឱ្យប្រទេសកម្ពុជា ។
បើតាមគណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍ ទន្សាយទាំងពីរដែលបានជ្រើសរើសជាម៉ាស្កុតសម្រាប់កីឡាស៊ីហ្គេមឆ្នាំ២០២៣ នៅកម្ពុជា ជាតួអង្គគួរឱ្យស្រឡាញ់នៅក្នុងរឿងព្រេងនិទានបុរាណខ្មែរ ដែលបង្ហាញពីតម្លៃនៅក្នុងការអប់រំតាមរយៈព្រះពុទ្ធសាសនា ជុំវិញការបំផុសគំនិតយុត្តិធម៌ មិនលំអៀង ចំណេះដឹង និងការជួយសង្គម ។ ការជ្រើសរើសសត្វទន្សាយក៏បញ្ជាក់ពីសមភាពយេនឌ័រក្នុងកីឡាផងដែរ ។
សូមជម្រាបថា ការប្រកួតកីឡានៃព្រឹត្តិការណ៍កីឡាស៊ីហ្គេមឆ្នាំ២០២៣ កម្ពុជាប្រទេសម្ចាស់ផ្ទះទទួលបានមេដាយសរុបចំនួន ២៨២ ខណៈឥណ្ឌូនេស៊ីទទួលបានមេដាយចំនួន ២៧៦, ប្រទេសថៃទទួលបានមេដាយចំនួន ៣១២, វៀតណាមទទួលបានមេដាយចំនួន ៣៥៩, ហ្វីលីពីនទទួលបានមេដាយចំនួន ២៦០, សង្ហបុរីទទួលបានមេដាយចំនួន ១៥៨, ម៉ាឡេស៊ីទទួលបានមេដាយចំនួន ២៧៦ ១៧៥, មីយ៉ានម៉ាទទួលបានមេដាយចំនួន ១១៤, ឡាវទទួលបានមេដាយចំនួន ៨៨, ប្រ៊ុយណេទទួលបានមេដាយចំនួន ០៩, និងទីម៉រទទួលបានមេដាយចំនួន ០៨ ៕
