ក្រសួងកសិកម្ម រុក្ខា​ប្រមាញ់ និ​ងនេសាទ គ្រោងនឹងធ្វើការប្រឡងជ្រើសរើសមន្រ្តីកសិកម្មឃុំ ចំនួន២៥០នាក់ នៅទូទាំងប្រទេស នាសប្តាហ៍ទី២ខែធ្នូ ឆ្នាំ២០២៣ខាងមុខនេះ, សម្តេចធិបតី ហ៊ុន ម៉ាណែត នាយករដ្ឋមន្រ្តី នៃកម្ពុជា មានប្រសាសន៍ថា ការប្រឡងជ្រើសរើសមន្រ្តីជំនាញកសិកម្ម​នៅ​តាម​ឃុំសង្កាត់ ត្រូវតែប្រព្រឹត្តទៅប្រកបដោយគុណភាពខ្ពស់ និង​ត្រូវ​ផ្តល់លទ្ធភាពដល់អ្នកដែលមានឆន្ទៈខ្ពស់ពិតប្រាកដ។

ក្នុងពិធីប្រកាស​ដាក់​ឱ្យប្រើប្រាស់ជាផ្លូវការនូវគោលនយោបាយអាទិភាពទី៥ និងទី៦ របស់រាជរដ្ឋាភិបាល នីតិកាលទី៧ នៃរដ្ឋសភា នៅទីស្តីការក្រសួងកសិកម្ម រុក្ខា​ប្រមាញ់ និង​នេសាទ សម្តេចធិបតី ហ៊ុន​ ម៉ាណែត លើកឡើងថា ជាគោលការណ៍រាជរដ្ឋាភិបាលប្រកាស​ប្រឡងជ្រើសរើសមន្រ្តីកសិកម្មបម្រើ​ការងារ​នៅតាមឃុំ-សង្កាត់ ត្រឹមតែ២៥០នាក់ ប៉ុន្តែជាក់ស្តែងមានបេក្ខជនដាក់ឈ្មោះប្រឡងរហូត​ដល់ទៅជិត១ម៉ឺននាក់, ប៉ុន្តែទោះជាយ៉ាងណា ការប្រឡងនេះ ត្រូវ​ប្រាកន់ជំហរនូវតម្លាភាព យុត្តិធម៌ និង​សុក្រឹត្យភាព ពោល​គឺអ្នកជាប់ប្រកបដោយមោទនៈ ហើយអ្នកធ្លាក់ឱ្យគេអស់ចិត្ត។

ការប្រឡងជ្រើសរើសន្ត្រីជំនាញកសិកម្មនៅតាមឃុំ-សង្កាត់នាពេលខាងមុខនេះ ត្រូវតែប្រព្រឹត្តទៅប្រកបដោយគុណភាព​ខ្ពស់ ត្រូវផ្ដល់លទ្ធភាព​ដល់​អ្នកដែលមានឆន្ទៈខ្ពស់ពិតប្រាកដ…

សម្តេចធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា

បើតាមប្រសាសន៍ ឯកឧត្តម ឌិត ទីណា រដ្ឋមន្រ្តីក្រសួងកសិកម្ម រុក្ខា​ប្រមាញ់ និងនេសាទ កាលពីខែសីហា ឆ្នាំ២០២៣ រាជរដ្ឋាភិបាលបានផ្តល់​ការ​ឯកភាព​លើការជ្រើសរើសមន្រ្តីកសិកម្ម​ចំនួន១៦០០នាក់ ក្នុងរយៈពេល​៣ឆ្នាំ ក្នុងនោះ ក្នុងនោះ ២៥០នាក់ក្នុងឆ្នាំ២០២៣នេះ ៨០០នាក់ក្នុងឆ្នាំ២០២៤ និង ៥៥០នាក់ក្នុងឆ្នាំ២០២៥ ដើម្បីបែងចែកទៅតាមឃុំសង្កាត់ទូទាំងប្រទេសដែលមានសកម្មភាពកសិកម្ម ។ ឯកឧត្តមមានប្រសាសន៍បន្តថា មន្រ្តីកសិកម្មទាំងនេះនឹងឆ្លងកាត់វគ្គកម្មសិក្សាមួយឆ្នាំ មុននឹងក្លាយទៅជាមន្រ្តីរាជការពេញសិទ្ធ ដោយទទួលបានប្រាក់បៀវត្សតាមរបបគ្រូបង្រៀន ប៉ុន្តែមិនត្រូវបានអនុញ្ញាតឱ្យផ្លាស់ចេញពីតួនាទីមន្រ្តីកសិកម្ម ឃុំសង្កាត់ទេ។

ពាក់ព័ន្ធនឹងការប្រឡងជ្រើសរើសមន្រ្តីកសិកម្មឃុំសង្កាត់ ឯកឧត្តម ឌិត ទីណា បញ្ជាក់ថា សម្រាប់ឆ្នាំ២០២៣ ក្រសួងកសិកម្ម រុក្ខាប្រមាញ់ និង​នេសាទ រួមសហការជាមួយក្រសួងមុខងារសាធារណៈ និងក្រសួងសេដ្ឋកិច្ច និង​ហិរញ្ញវត្ថុ បានរៀបចំការប្រឡងជ្រើសរើសប្រកបដោយតម្លាភាព ដែលគ្រោងនឹងធ្វើនៅក្នុងសប្តាហ៍ទី២ នៃខែធ្នូខាងមុខ ដើម្បីជ្រើសរើសមន្រ្តីកសិកម្ម ២៥០នាក់សម្រាប់ពង្រាយនៅតាមឃុំសង្កាត់ ក្នុងខេត្តចំនួន១៧ ដែលមានសក្តានុពលកសិកម្មដំណាំស្រូវ។ ឯកឧត្តមបញ្ជាក់ថា មន្រ្តីទាំងអស់នឹងត្រូវស្នាក់នៅជាអចិន្រ្តៃនៅមូលដ្ឋានតែម្តង ដើម្បីផ្សារភ្ជាប់ជីវភាពជាមួយនឹងប្រជាកសិករ និង​ស្វែងយល់ពីបញ្ហាប្រឈម និងសំណូមពរ ហើយដោះស្រាយបញ្ហាជូនប្រជាពលរដ្ឋឱ្យទាន់ពេលវេលា។

គួរបញ្ជាក់ដែរថា កាលពីចុងខែតុលា ក្រសួងមុខងារសាធារណៈ បានប្រកាសពីការជ្រើសរើសមន្រ្តីកសិកម្មឃុំ ចំនួន២៥០នាក់ សម្រាប់ប្រភេទក្របខណ្ឌ ក, ខ, គ ដែលមានជំនាញ/ឯកទេសកសិកម្ម​ចាប់ពីវិញ្ញាបនបត្រ បរិញ្ញាបត្ររង បរិញ្ញាបត្រ ឬសញ្ញាបត្រ​សមមូល ឱ្យ​ចូល​បម្រើ​ការងារ​នៅ​តាមឃុំ ស្រុក ខេត្ត​ក្នុងក្របខណ្ឌ​ក្រសួងកសិកម្ម រុក្ខាប្រមាញ់ និង​នេសាទ សម្រាប់ឆ្នាំ២០២៣ ។ ក្នុងនោះក្រសួងបានលើកទឹកចិត្ត និងផ្តល់អាតិភាព​សម្រាប់​អ្នក​ដែលមាន​សញ្ញាបត្រជាន់ខ្ពស់​លើជំនាញកសិកម្ម, មានបទពិសោធន៍ការងារលើវិស័យកសិកម្ម, ស្រ្តីភេទ និងអ្នកដែលមានទីលំនៅអចិន្រ្តៃយ៍​ក្នុងឃុំ ស្រុក ខេត្ត ដែលត្រូវជ្រើសរើស​មន្រ្តីកសិកម្មឃុំ។

ក្នុងនោះ​អត្ថប្រយោជន៍​ការងារដែលទទួលបាន បេក្ខជនដែលបានប្រឡងជាប់ជាស្ថាពរ នឹង​ត្រូវធ្វើកម្មសិក្សា និងតាំងស៊ប់ក្នុងប្រភេទក្របខណ្ឌ ក, ខ, គ ផ្អែក​លើកម្រិតបណ្តុះបណ្តាលរបស់សាម៉ីខ្លួន, បេក្ខជន​ដែលបានប្រឡងជាប់ជាស្ថាពរ នឹងត្រូវទទួលបានប្រាក់បៀវត្សទាបបំផុតចាប់ពី ១លាន៤សែនរៀល នៅ​តាមប្រភេទក្របខណ្ឌ និង​ទទួលបានប្រាក់ឧបត្ថម្ភប្រចាំខែចំនួន ១៦ម៉ឺនរៀល​ក្នុងមួយខែ រួមទាំង​អត្ថប្រយោជន៍ផ្សេងៗ​ទៀត​របស់​មន្រ្តីរាជការស៊ីវិល៕