ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
កម្មវិធីគោលនយោបាយអាទិភាពចំនួន៦ នឹងត្រូវរាជរដ្ឋាភិបាលអាណត្តិទី៧ ដឹកនាំដោយ ឯកឧត្តមអគ្គទេសាភិបាលបណ្ឌិត ហ៊ុន ម៉ាណែត យកមកអនុវត្តបន្ទាន់ភ្លាមៗនៅក្នុងឆ្នាំ២០២៣នេះ ដោយក្នុងនោះ ក៏មានការផ្តល់អាហារូបករណ៍ដល់យុវជនមកពីគ្រួសារក្រីក្រចំនួន១លាន៥សែននាក់ ដើម្បីទទួលបានការបណ្តុះបណ្តាលជំនាញវិជ្ជាជីវៈដោយឥតគិតថ្លៃ។
ថ្លែងក្នុងពិធីសំណេះសំណាលជាមួយកម្មករ កម្មការិនី នៅតំបន់ព្រៃស្ពឺ រាជធានីភ្នំពេញ នាព្រឹកថ្ងៃទី២៩ ខែសីហា ឯកឧត្តមអគ្គទេសាភិបាលបណ្ឌិត ហ៊ុន ម៉ាណែត នាយករដ្ឋមន្រ្តី នៃកម្ពុជា មានប្រសាសន៍ថា សុខភាព សុខមាលភាពប្រជាពលរដ្ឋគឺជាគោលនយោបាយអាទិភាពទី១ ហើយសុខភាព និងសមត្ថភាព បូកបញ្ចូលគ្នា ទើបទទួលបានគុណភាព នៃមូលធនមនុស្ស ។ «សុខភាពយើងគិតហើយ ឥឡូវគិតពីការបណ្តុះបណ្តាល១លាន៥សែននាក់ កូនចៅប្រជាពលរដ្ឋក្រីក្រនឹងទទួលបាននូវអាហារូបករណ៍នេះ ដើម្បីរៀនជំនាញ មានទាំងវគ្គខ្លី វគ្គជំនាញ វគ្គមធ្យម វគ្គវែង ហើយយើងគិតទាំង២ ទៅ៤ភាគរយនៃចំនួនសរុប ប្តូរទៅឱ្យខាងកេរ្តិ៍មរតកដូនតា ដើម្បីរក្សាវប្បធម៌របស់យើង»។
បើតាមប្រសាសន៍របស់ឯកឧត្តមអគ្គទេសាភិបាលបណ្ឌិត ហ៊ុន ម៉ាណែត គោលនយោបាយថ្មីនេះ នឹងជួយកូនចៅប្រជាពលរដ្ឋឱ្យរៀនជំនាញដោយមិនបង់ប្រាក់ ហើយថែមទាំងទទួលបានប្រាក់ឧបត្ថម្ភថែមទៀត ដើម្បីជួយសម្រួលជីវភាព។ «អ្នកទៅរៀនមិនត្រឹមតែអត់បង់លុយទេ តែបានប្រាក់ឧបត្ថម្ភទៀត រដ្ឋចេញលុយឱ្យគាត់ មិនមែនគាត់ទៅរៀនអស់លុយទេ រៀនអត់អស់លុយហើយ បានលុយទៀត ព្រោះគាត់មានជីវភាពលំបាក…»។
ជាមួយគ្នានេះ បើតាមនាយករដ្ឋមន្រ្តីកម្ពុជា បងប្អូនកម្មករនិយោជិត ក៏នឹងត្រូវជួយសម្របសម្រួលចូលរៀនជំនាញវិជ្ជាជីវៈផងដែរ ដើម្បីលើកកម្ពស់សមត្ថភាពជំនាញ បង្កើនផលិតភាព នៅក្នុងការបង្កើនប្រាក់ឈ្នួល ។ ហើយក្នុងនោះ ឯកឧត្តម ហ៊ុន ម៉ាណែត ក៏បានណែនាំដល់សាលាបណ្តុះបណ្តាលជំនាញវិជ្ជាជីវៈ ពង្រីកថ្ងៃបណ្តុះបណ្តាលឱ្យមានថ្ងៃសៅរ៍ និងថ្ងៃអាទិត្យ ដើម្បីបង្កលក្ខណៈងាយស្រួលដល់កម្មករកម្មការិនីដែលរវល់ធ្វើការងារនៅថ្ងៃចន្ទ ដល់ថ្ងៃសុក្រ អាចចូលរៀនវគ្គបណ្តុះបណ្តាលបាន។ «ឧទាហរណ៍យើងចង់ដូរការងារនៅក្នុងក្រុមហ៊ុនមកជាការងារផ្សេងបានប្រាក់ខែខ្ពស់ … អញ្ចឹងសុំឱ្យនិយោជកផ្តល់ឱកាសឱ្យគាត់ ដោយយើងមានរៀបកម្មវិធីទាំងរៀនយប់ទៀត ព្រមជាមួយចុងសប្តាហ៍… ព្រោះខ្លាចក្រែងបងប្អូនធ្វើការពីថ្ងៃចន្ទ ដល់សុក្រ… ចង់ប្តូរការងារបានប្រាក់ខែច្រើនជាងហ្នឹង ប្រសើរជាងហ្នឹង ទៅរៀនបន្ថែម…»។
សូមបញ្ជាក់ថា ការបណ្តុះបណ្តាលជំនាញបច្ចេកទេស គឺស្ថិតនៅក្នុងមុំទី២ នៃបញ្ចកោណទី១ ក្នុងយុទ្ធសាស្រ្តបញ្ចកោណ ដំណាក់កាលទី១ ដោយមានគោលដៅធ្វើបរិវត្តកម្មការបណ្តុះបណ្តាលជំនាញបច្ចេកទេស និងវិជ្ជាជីវៈ, បង្កើនការចុះឈ្មោះចូលរៀន, រៀបចំជំនាញឡើងវិញ និងការបង្កើនជំនាញ (Reskilling and Upskilling) , ការពង្រឹងប្រព័ន្ធអេកូឡូស៊ីអភិវឌ្ឍជំនាញ, ដោះស្រាយបញ្ហានៃភាពមិនស៊ីសង្វាក់គ្នា រវាងការបណ្តុះបណ្តាល និងតម្រូវការ ទាំងប្រភេទ និងគុណភាពជំនាញ៕
