ទីភ្នាក់ងារជាតិមុខរបរ និងការងារ (NEA) នៃក្រសួងការងារ និងបណ្តុះបណ្តាលវិជ្ជាជីវៈ សហការជាមួយសហភាពសហព័ន្ធយុវជនកម្ពុជារាជធានីភ្នំពេញ និងសភាពាណិជ្ជកម្មកម្ពុជា-អ៉ីស្រាអែល នឹងរៀបចំពិព័រណ៍ការងារ និងមគ្គទេសក៍អាជីព រយៈពេល២ថ្ងៃជាប់គ្នា គឺថ្ងៃទី៩-១០ ឧសភា នៅអគារអង្គរវត្ត ស្ថិតនៅក្នុងវិទ្យាស្ថានជាតិបណ្តុះបណ្តាលបច្ចេកទេស (NTTI) ក្រោយវត្តទឹកថ្លា ដោយផ្តល់​ឱកាស​ការងារសរុបជាង៥៤០០កន្លែង។

ឯកឧត្តម ស៊ុន មេសា អ្នកនាំពាក្យ​ក្រសួងការងារ និង​បណ្តុះបណ្តាលវិជ្ជាជីវៈ មានប្រសាសន៍ថា ពិព័រណ៍ការងារ និងមគ្គទេសក៍អាជីព ដែលនឹងធ្វើនៅសប្តាហ៍ក្រោយនេះ មានការចូលរួមឧបត្ថម្ភគាំទ្រពីក្រសួង ស្ថាប័ន ក្រុមហ៊ុន សហគ្រាស គ្រឹះស្ថានអប់រំបណ្ដុះបណ្ដាលចំនួនប្រមាណ ៣១ ដែលក្នុងនោះព័ត៌មានជ្រើសរើសកម្លាំងពលកម្មមានប្រមាណជាង ៥ ៤០០កន្លែង ដែលសិស្ស-និស្សិត និងអ្នកស្វែងរកការងារ អាចទទួលបានព័ត៌មានឱកាសការងារ ការប្រឹក្សាយោបល់ និងមគ្គទេសក៍អាជីព ការងារ និងវិជ្ជាជីវ: ការចែករំលែកចំណេះដឹង និងឱកាសការងារ កម្មសិក្សាការងារនៅតាមស្ថាប័ន ក្រុមហ៊ុន សហគ្រាស និងគ្រឹះស្ថាន ដែលកំពុងមានសក្ដានុពល និងតម្រូវការខ្ពស់។

ក្រៅពីទទួលបានឱកាសការងារ យុវជន សិស្ស-និស្សិត និងអ្នកស្វែងរកការងារ អាចចូលរួមកម្មវិធីផ្សេងៗដូចជា ៖ វេទិកាកិច្ចពិភាក្សា ដើម្បីចែករំលែកចំណេះដឹង និងបទពិសោធន៍ លើប្រធានបទស្ដីពី «ការត្រៀមខ្លួនសម្រាប់អាជីពនៅក្នុងសម័យកាលឌីជីថល», កម្មវិធី Game Corner ត្រូវបានរៀបចំក្នុងគោលបំណងបង្កើតសកម្មភាពដល់យុវជន ដើម្បីទទួលបានចំណេះដឹង និងការត្រៀមខ្លួនឱ្យបានល្អប្រសើរក្នុងការដាក់ពាក្យស្នើសុំការងារ ក៏ដូចជាការបង្ហាញឆន្ទៈបំពេញការងារ សមត្ថភាព និង សក្តានុពលរបស់ខ្លួន។

បើតាមឯកឧត្តម ស៊ុន មេសា យុវជន សិស្ស-និស្សិត និងអ្នកស្វែងរកការងារ ដែលចូលរួម​ក្នុងកម្មវិធីនេះ ពួកគេ អាចទទួលបានអត្ថប្រយោជន៍ជាច្រើនដូចជា ស្វែងយល់អំពីទីផ្សារការងារកម្ពុជានាពេលបច្ចុប្បន្ននេះថា តើប្រភេទការងារអ្វីដែលកំពុងមានតម្រូវការច្រើន, ការដាក់ CVs សម្ភាសន៍ភ្លាមៗនៅនឹងកន្លែង, ការប្រឹក្សាយោបល់ និងមគ្គទេសក៍អាជីព ការងារ និងវិជ្ជាជីវ:, ទទួលបានចំណេះដឹងល្អៗអំពីការត្រៀមខ្លួនចូលទីផ្សារការងារពីសំណាក់វាគ្មិនល្បីៗ។

ជាមួយគ្នា ក្នុងនាមក្រសួងការងារ និង​បណ្តុះបណ្តាលវិជ្ជាជីវៈ ឯកឧត្តម ស៊ុន មេសា ក៏​បានអំពាវនាវដល់យុវជន និងសាធារណៈជនទូទៅទាំងអស់ អញ្ជើញចូលរួមកម្មវិធីពិព័រណ៍នេះឱ្យ​បានច្រើនកុះករ ដើម្បីទទួលបានឱកាសការងារ ការប្រឹក្សាយោបល់ ហើយ​សូមត្រៀម CVs ឱ្យ​បានច្រើនដើម្បីដាក់ពាក្យភ្លាម សម្ភាសន៍ភ្លាមៗ និងអាចទទួលបានឱកាសការងារ កម្មសិក្សាការងារនៅតាមស្ថាប័ន ក្រុមហ៊ុន សហគ្រាស និងគ្រឹះស្ថានដ៏ច្រើនទៀតផង៕