ភ្ញាក់ពីដំណេកភ្លាម គ្រប់គ្នាសុទ្ធតែត្រូវការថាមពល ដើម្បីបង្កើនផលិតភាពសម្រាប់ថ្ងៃថ្មី ។ ទន្ទឹមគ្នានឹងក្ដីរពឹងបែបនេះ មានបុគ្គលមួយចំនួន បានប្រព្រឹត្តិសកម្មភាពដែលបង្កផលប៉ះពាល់ ក្នុងការទាញយកនូវសមិទ្ធផលពីការងារ ឬក៏ការសិក្សា។ សកម្មភាពទាំងនោះ មានដូចជា ទាញកែវផឹកកាហ្វេទាំងពោះទទេ ងូតទឹកក្តៅ អាហារពេលព្រឹកមិនល្អ ឬញ៉ាំអាហារលឿនពេក ហើយពេលខ្លះក្រោកភ្លាម គិតអំពីការងារដែលនៅសល់ រួចក៏បណ្តាលឱ្យអារម្មណ៍មិនល្អកើតមាន។ តាមរយៈគេហទំព័រ India.com បានបង្ហាញសកម្មភាព៤ចំណុចដែលមិនគួរប្រញាប់ធ្វើភ្លាមៗក្រោយភ្ញាក់ពីដំណេក។

១. ពិសាកាហ្វេ ៖ ភារកិច្ចដំបូងសម្រាប់អ្នកមានទម្លាប់ពិសាកាហ្វេគឺ ទាញកែវកាហ្វេមកទទួលទានក្រោយភ្ញាក់ពីដំណេក, ទម្លាប់បែបនេះ គួរជៀសវាង ដោយការទាញកែវទឹកមកទទួលទានជំនួសវិញ។ តាមរយៈការគិត ឬអ្នកទម្លាប់ញ៉ាំកាហ្វេ ពួកគាត់អាចនឹងគិតថា ការទាញកែវកាហ្វេមកទទួលទាន គឺជាកិច្ចការចាំបាច់ ប៉ុន្តែជាក់ស្ដែង សុខភាពរាងកាយមិនត្រូវការបែបនេះទេ។

ការហ្វេអាចនឹងមានភាពចាំបាច់នៅក្នុងករណីដែលចាប់ផ្តើមអង្គុយធ្វើការបានយ៉ាងហោចណាស់៣០នាទី។ មួយវិញទៀត ពេលវេលាសមស្របដែលគួរទទួលទានកាហ្វេគឺនៅម៉ោង៩និង៣០នាទីព្រឹក ។

២. ងូតទឹកក្ដៅ ៖ ទឹកក្តៅអាចបន្ធូរអារម្មណ៍បានដែរ ប៉ុន្តែសម្រាប់ពេលព្រឹកការងូតទឹកក្តៅបង្កនូវការបន្ធូរអារម្មណ៍ក្នុងសភាពមួយដែលលើសខុសពីតម្រូវការនៃសុខភាពរាងកាយ។ ផ្ទុយទៅវិញការងូតទឹកត្រជាក់​នៅពេលព្រឹកជាកត្តានាំឱ្យផលិតភាពកើនឡើងទៅវិញ។

៣. ទទួលទានអាហារពេលព្រឹកមិនល្អ ៖ ការញ៉ាំអាហារតិចតួចមិនមានជីវជាតិចិញ្ចឹមទៅកាន់រាងកាយ ជំរុញឱ្យថាមពលបំពេញកិច្ចការ ក៏ថមថយទៅតាមនោះដែរ។ អាហារពេលព្រឹកគួរតែមាន ស៊ុត គ្រាប់ធញ្ញជាតិ ទឹកដោះគោស្រស់ និងអាហារដទៃទៀតដែលផ្តល់នូវ វិតាមីន ឬប្រូតេអ៊ីន។

៤. គិតអំពីការងារដែលមិនទាន់បញ្ចប់ ៖ ខួរក្បាលមានភាពស្រឡះល្អ គឺជារឿងចំបាច់នៅពេលព្រឹក ដូច្នេះ អ្វីដែលគួរធ្វើ គឺ រក្សាការគិតឱ្យស្ថិតក្នុងដែនមួយមានភាពវិជ្ជមាន ដោយការកាត់បន្ថយសកម្មភាព ដែលនាំឱ្យអារម្មណ៍មិនល្អ ។ ចំណែកឯការងារដែលនៅសល់ គួរគិតមកវិញថា យើងនៅមានពេលពេញមួយថ្ងៃបន្ថែមក្នុងការបញ្ចប់វា និងមានឱកាសក្នុងការដោះស្រាយបញ្ហាដែលនៅសេសសល់ជាបន្តបន្ទាប់។ ទម្លាប់គិតវិជ្ជមាននៅពេលព្រឹក ជាចំណែកសំខាន់ ក្នុងការបណ្តុះនូវផ្នត់គំនិតល្អៗ ក្នុងវិថីវែងឆ្ងាយ៕