ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ការអានសៀវភៅយឺតៗ មិនមែនជាបទពិសោធន៍មិនល្អទេ ព្រោះអ្នកអានមានពេលគ្រប់គ្រាន់ក្នុងការសញ្ជឹងគិតអំពីប្រយោគនីមួយៗ និងការផ្ចង់ស្មារតីទៅកាន់រាល់ទំព័រសៀវភៅបានគ្រប់ជ្រុងជ្រោយ បន្ថែមពីនោះ គឺជាឱកាសបង្កើនព័ត៌មានដែលមានភាពប្រទាក់ក្រឡាគ្នាទៅក្នុងសាច់រឿង ឬអត្ថន័យបន្ទាប់។ តែយ៉ាងណា កាលដែលស្វែងរកយុទ្ធសាស្រ្តអានសៀវភៅបានលឿន ក៏មានគុណសម្បត្តិមួយផ្នែក ក្នុងការចាប់ផ្តើមទំព័រថ្មីៗ។
ជាមធ្យម ល្បឿននៃការអានក្នុងមួយនាទី គឺគិតចាប់ពី ២០០ពាក្យ ទៅ៣០០ពាក្យ ឬក៏មានភាពប្រែប្រួលបន្តិចបន្តួចទៅតាមស្ថានភាព បរិយាកាស និងបទពិសោធន៍នៃអ្នកអាននីមួយៗ។ ការអានក្នុងល្បឿនលឿន ទៀតសោតតម្រូវឱ្យមានការយល់ដូចពេលដែលអានយឺតៗដែរ។ តាមរយៈគេហទំព័រ Thought បានបង្ហាញរបៀបបែបបទ៤ ចំណុចក្នុងការពន្លឿនល្បឿន នៃការអាន។
១. អានត្រួសៗអំពីភាពសំខាន់ នៃខ្លឹមសារអត្ថបទ ៖ ដើម្បីរក្សាល្បឿននៃការអាន ជាដំបូងត្រូវដឹងរាល់ឯកសារពាក់ព័ន្ធ ដែលមានក្នុងដៃជាមុនសិនថា តើមានឯកសារយោងអ្វីខ្លះដែលសម្រួលក្នុងការអានសៀវភៅទាំងមូល ជៀសវាងការប្រើពេលយូរពេក។ មុនពេលអានសៀវភៅទៀតសោត គួរចាប់ផ្តើមអាននូវគន្លឹះសំខាន់ៗជាមុនសិន ដូចជាបែងចែកលេខរៀង ឬការបែងចែកជំពូកជាដើម ការអានបែបសង្ខេបៗជាមុន គឺដើម្បីឈ្វេងយល់ពីគោលបំណងជារួមរបស់ឯកសារ ឬសៀវភៅជារួម។
២. ប្រមាណល្បឿននៃការអាន ៖ ពន្លឿនល្បឿននៃការអាន មិនមែនមានន័យថា ត្រូវតែអានទាំងមិនយល់នោះទេ ប៉ុន្តែជាការដឹងថា ពេលណាត្រូវបន្ថយ ឬចំនុចណាដែលមិនចាំបាច់ផ្តល់ការយកចិត្តទុកដាក់ទាំងស្រុង។ ជាឧទាហរណ៍ នៅពេលអានអំពីការបំបែកជំពូក ហើយរកឃើញចំណុចដែលមិនពាក់ព័ន្ធនឹងចំណេះដែលចង់បាន គឺជាការប្រមាណឱ្យដឹងថាគួរបន្តអាន ឬបញ្ឈប់។
៣. ប្រើជំនួយពីឧបករណ៍អេឡិចត្រូនិច ៖ ការជ្រើសរើសរបៀបអានបែបទំនើបតាមរយៈកម្មវិធីឌីជីថល ដូចជាការប្រើប្រាស់ Kindle ឬឧបករណ៍ណាមួយដែលអាចពន្យល់ពាក្យគន្លឹះភ្លាមៗនៅពេលដែលអានមិនយល់អត្ថន័យ ដែលនេះជាកត្តាមួយជួយឱ្យបញ្ចប់សៀវភៅនីមួយៗក្នុងរយៈពេលខ្លី។
៤. ប្រើប្រាស់សម្ភារ ៖ សម្ភារជំនួយការអាន គឺ ប៊ិក ស្នៀតសៀវភៅ បន្ទាត់ និងខូល័រជាដើម។ សម្ភារទាំងនេះដើរតួនាទីសំខាន់ក្នុងការអាន ព្រោះសៀវភៅដែលមានទំព័រច្រើន ដែលពុំអាចអានម្តងឱ្យចប់បាន ត្រូវការគូសវាស ក៏ដូចជាមានរបស់ដាក់ចំណាំសម្រាប់អាននៅពេលក្រោយ បើពុំនោះទេ អាចនាំឱ្យមានការភ្លេចភ្លាំង ឬអានចុះអានឡើងធ្វើឱ្យល្បឿនអានមិនដំណើរការរលូន ដូច្នេះជ្រើសសម្ភារដែលផ្តល់ភាពងាយស្រួលចំពោះខ្លួនឯងជាចម្បង៕
