ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ដើម្បីត្រៀមខ្លួន ចូលរួមប្រកួតប្រជែងក្នុងទីផ្សារការងារ ដែលកំពុងមានការប្រកួតប្រជែង យុវជនចាំបាច់ត្រូវស្វែងយល់អំពីបច្ចេកវិទ្យា ភាសាបរទស និងបទពិសោធន៍ការងារ ព្រោះចំណេះដឹង និងចំណេះធ្វើទាំងបីនេះ គឺជាអ្វីដែលក្រុមហ៊ុន ក្នុងប្រទេសកម្ពុជាត្រូវការ, នេះបើតាមការលើកឡើងរបស់លោក លី វណ្ណារិទ្ធ ប្រធានផ្នែកជ្រើសរើសបុគ្គលិក នៃក្រុមហ៊ុន CAM HR ។
លោក វណ្ណារិទ្ធ បានប្រាប់ AMS Education នៅក្នុងពិព័រណ៍ការងារ និងផលិតភាពជាតិ ឆ្នាំ២០២៤ថា បើតាមទិន្នន័យ និងការសង្កេតរបស់លោក ជាអ្នកជំនាញធនធានមនុស្ស លោកមើលឃើញថា បច្ចុប្បន្នគ្រប់វិស័យទាំងអស់ គឺសុទ្ធតែមានតម្រូវការបុគ្គលិក យ៉ាងណាក៏ដោយ វិស័យដែលមានតម្រូវការបុគ្គលិកខ្ពស់ជាងគេ គឺវិស័យដឹកជញ្ជូន ខណៈកាលពីមុនវីរុសរាត្បាតកូវីដ វិស័យអចលនទ្រព្យ ជាវិស័យដែលមានតម្រូវការបុគ្គលិកខ្ពស់។
លោកសង្កត់ធ្ងន់ថា ត្បិតថា គ្រប់វិស័យសុទ្ធតែមានតម្រូវការ ប៉ុន្តែយុវជនត្រូវពង្រឹងសមត្ថភាពបច្ចេកវិទ្យា ព្រោះសម័យបច្ចុប្បន្ន គឺជាសម័យបច្ចេកវិទ្យា, ទន្ទឹមនឹងនេះ ជំនាញភាសាបរទេសក៏មានសារៈសំខាន់ខ្លាំងដែរ ហើយក្នុងលក្ខខណ្ឌបច្ចុប្បន្ន ភាសាចិន ជាភាសា ដែលកំពុងមានតម្រូវការខ្ពស់ ខណៈអ្នកជំនាញភាសាចិននៅមានចំនួនតិចនៅឡើយ។ ដោយឡែក ក្រុមហ៊ុន ក៏ត្រូវការបុគ្គលិក ដែលមានបទពិសោធន៍ផងដែរ ដូច្នេះ ដើម្បីទទួលបានបទពិសោធន៍ យុវជន អាចដាក់ពាក្យហាត់ការការងារ នៅក្រុមហ៊ុនផ្សេងៗ ឬដាក់ពាក្យធ្វើការងារ បើទោះបីជាក្នុងដំណាក់កាលដំបូង ទទួលបានចំណូលទាបក៏ដោយ។
លោក វណ្ណារិទ្ធ បន្តថា ចំពោះតួនាទីបច្ចុប្បន្ន ក្រុមហ៊ុនភាគច្រើន មានតម្រូវការ បុគ្គលិកផ្នែកលក់ច្រើនជាងផ្នែកផ្សេងៗ ព្រោះថា អ្នកជំនាញផ្នែកលក់ ជាអ្នកទាក់ទាញអតិថិជនឱ្យប្រើប្រាស់សេវាកម្ម ឬផលិតផល របស់ក្រុមហ៊ុន។
សម្រាប់ក្រុមហ៊ុន ផ្នែកដែលគេជ្រើសរើសច្រើនជាងគេ គឺផ្នែកលក់ ក្រុមហ៊ុននីមួយៗ ក្រុមហ៊ុនខ្លះ ជ្រើសរើស១០នាក់ក៏បានមានដែរ ដោយសារតែគាត់ត្រូវការបុគ្គលិកផ្នែកលក់ ដើម្បីចេញរកអតិថិជនឱ្យបានច្រើន។
អ្នកជំនាញផ្នែកធនធានមនុស្សរូបនេះ បានបញ្ជាក់បន្ថែមថា ប្រសិនបើយុវជន ត្រូវការការងារ ដែលស្របទៅតាមទីផ្សារការងារបច្ចុប្បន្ន។ ចំណុចសំខាន់ទី១ យុវជន ត្រូវតែពង្រឹងសមត្ថភាពបន្ថែម និងបន្តសិក្សាពេញមួយជីវិត, ចំណុចទី២ យុវជន ត្រូវក្រឡេកមើលចក្ខុវិស័យរបស់រដ្ឋាភិបាល ថា តើរដ្ឋាភិបាល មានគោលដៅអភិវឌ្ឍប្រទេសទៅរករូបភាពបែបណា។ លោកបន្តថា ការរៀនស្របទៅតាមចក្ខុវិស័យរដ្ឋាភិបាល យុវជន នឹងងាយស្រួលស្វែងរការងារ៕
