សន្និសីទនៃការបង្រៀនថ្នាក់ជាតិលើកទីមួយ នឹងប្រព្រឹត្តទៅនៅថ្ងៃទី២៤ និង២៥ ខែសីហា ឆ្នាំ២០២៤ នៅវិទ្យាស្ថានបច្ចេកវិទ្យាកម្ពុជា (ITC)។ សន្និសីទនេះរៀបចំឡើងដោយក្រុមហ៊ុន ម៉េងលី ជេ. គួច អេឌ្យូខេសិន ទទួលបានការគាំទ្រដោយក្រសួងអប់រំ យុវជន និងកីឡា និងមានការចូលរួមពីអ្នកអប់រំ សាស្ត្រាចារ្យ គ្រូបង្រៀន និងនិស្សិតប្រមាណ ១,៣០០នាក់ មកពីទូទាំងប្រទេស។

សន្និសីទនៃការបង្រៀនថ្នាក់ជាតិមានគោលបំណងផ្តល់ការអភិវឌ្ឍវិជ្ជាជីវៈដ៏មានតម្លៃជូនដល់សាស្ត្រាចារ្យ លោកគ្រូ អ្នកគ្រូទាំងជាជនជាតិខ្មែរ និងបរទេស។ មុននឹងឈានដល់ថ្នាក់ជាតិ និងផ្តល់ឱកាសដល់អ្នកអប់រំពីគ្រប់មជ្ឈដ្ឋាន «សន្និសីទនៃការបង្រៀន» ត្រូវបានរៀបចំដោយ មជ្ឈមណ្ឌលភាសា អេ អាយ អាយ (Aii) អស់រយៈពេលជាងមួយទសវត្សរ៍មកហើយ ដោយផ្តល់ជូននូវវេទិកាសម្រាប់លោកគ្រូ និងអ្នកគ្រូនៅ Aii ធ្វើការផ្លាស់ប្តូរការយល់ដឹង យុទ្ធសាស្រ្ត និងការអនុវត្តល្អៗសម្រាប់ការផ្តល់ការអប់រំប្រកបដោយគុណភាពជូនដល់អនាគតអ្នកបន្តវេនរបស់កម្ពុជា។

អ្នកឧកញ៉ា វេជ្ជបណ្ឌិត គួច ម៉េងលី ដែលជាស្ថាបនិក ប្រធានក្រុមប្រឹក្សាភិបាល និងអគ្គនាយកប្រតិបត្តិ នៃក្រុមហ៊ុន ម៉េងលី ជេ. អេឌ្យូខេសិន បានមានប្រសាសន៍ថា «យើងមានសេចក្តីសោមន្សយ៉ាងក្រៃលែង ក្នុងការរៀបចំ សន្និសីទនៃការបង្រៀនថ្នាក់ជាតិលើកទីមួយនេះ ដែលជាសក្ខីភាពដ៏សំខាន់មួយក្នុងកិច្ចខិតខំប្រឹងប្រែងរបស់យើងក្នុងការពង្រឹង និងលើកកម្ពស់វិជ្ជាជីវៈគ្រូបង្រៀននៅកម្ពុជា»។

សន្និសីទនៃការបង្រៀនថ្នាក់ជាតិនេះមានវាគ្មិនកិត្តិយស និងភ្ញៀវកិត្តិយសរួមមាន ឯកឧត្តមបណ្ឌិត អ៊ុម រម្យណី រដ្ឋលេខាធិការក្រសួងអប់រំ យុវជន និងកីឡា នឹងការអញ្ជើញថ្លែងសុន្ទរកថាស្វាគមន៍។ ក្នុងនោះឯកឧត្ដមបណ្ឌិត សាន វឌ្ឍនា រដ្ឋលេខាធិការក្រសួងអប់រំ យុវជន និងកីឡា នឹងថ្លែងសុន្ទរកថាសម្រាប់កិច្ចប្រជុំពេញអង្គផងដែរ។

អ្នកចូលរួមនឹងមានឱកាសចូលរួមក្នុងសិក្ខាសាលាដែលពោរពេញទៅដោយភាពរស់រវើក និងការពិភាក្សាដែលបណ្តុះគំនិតលើប្រធានបទជាច្រើនដូចជា ការប្រើប្រាស់បច្ចេកវិទ្យានៅក្នុងថ្នាក់រៀន និងលើកកម្ពស់ការអប់រំប្រកបដោយភាពចម្រុះ និងបរិយាបន្ន។

សន្និសីទនៃការបង្រៀនថ្នាក់ជាតិ គឺជាការបោះជំហានឆ្ពោះទៅមុខដ៏សំខាន់មួយសម្រាប់វិស័យអប់រំរបស់ប្រទេសកម្ពុជាក្នុងការវិនិយោគលើវិជ្ជាជីវៈនៃការបង្រៀន។ សន្និសីទនេះនឹងផ្លាស់ប្តូរ និងពង្រឹងបទពិសោធអ្នកអប់រំ ព្រមទាំងបំផុសគំនិតរបស់ពួកគេឱ្យបង្កើតបរិយាកាសសិក្សាដែលទាក់ទាញ និងជំរុញវប្បធម៌នៃការចង់ចេះ ចង់ដឹង ចង់ឃើញភាពច្នៃប្រឌិត និងស្រលាញ់ការអប់រំ៕