ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ប្រជាពលរដ្ឋជាង៨ពាន់គ្រួសារ រស់នៅស្រុកចំនួន៥ ក្នុងខេត្តបន្ទាយមានជ័យ ដែលតែងតែប្រឈមមុខនឹងការខ្វះទឹក ពេលនេះពួកគាត់លែងខ្វះខាតទៀតហើយ ដោយប្រព័ន្ធចែកចាយទឹកស្អាតសហគមន៍ថ្មីចំនួន២៩ស្ថានីយ គាំទ្រដោយអង្គការទស្សនៈពិភពលោក បានដាក់ឱ្យប្រើប្រាស់ជាផ្លូវការកាលពីថ្ងៃទី១១ ខែមីនា ឆ្នាំ២០២៥។
ប្រព័ន្ធចែកចាយទឹកស្អាតសហគមន៍ថ្មីចំនួន២៩ ត្រូវបានរចនាឡើងដើម្បីនាំយកទឹកស្អាតផ្តល់ដល់គ្រួសារចំនួនជាង ៨ពាន់គ្រួសារ នៅទូទាំងស្រុកចំនួន៥ ក្នុងខេត្តបន្ទាយមានជ័យ គឺ ស្រុកស្វាយចេក ភ្នំស្រុក មង្គលបូរី ព្រះនេត្រព្រះ និង ថ្មពួក។ ស្រុកទាំង ៥ នេះ គឺតែងតែប្រឈមមុខនឹងការខ្វះទឹកយ៉ាងធ្ងន់ធ្ងរ ដែលបណ្តាលឱ្យប៉ះពាល់សុខភាពយ៉ាងខ្លាំង និងរារាំងដល់ការអភិវឌ្ឍន៍សេដ្ឋកិច្ចសង្គម។
បើតាមសេចក្តីប្រកាសព័ត៌មានរបស់អង្គការទស្សនៈពិភពលោក គម្រោងប្រព័ន្ធទឹកស្អាតនេះ គឺជាការធ្វើរួមគ្នាជាមួយក្រសួងអភិវឌ្ឍន៍ជនបទ ដោយបានដោះស្រាយបញ្ហា និងផ្តល់នូវប្រភពទឹកស្អាតដែលអាចទុកចិត្តបាន និងប្រកបដោយចីរភាព។ ជាមួយនឹងប្រព័ន្ធចែកចាយទឹកស្អាតសហគមន៍ អង្គការទស្សនៈពិភពលោក និងដៃគូរដ្ឋាភិបាល មន្ទីររដ្ឋបាលខេត្ត ក៏បានកសាងសមត្ថភាពសមាជិកគណៈកម្មាធិការគ្រប់គ្រងទឹកចំនួន២៩ស្ថានីយ ដែលតំណាងដោយសមាជិកសហគមន៍ ដើម្បីធានាបាននិរន្តរភាព នៃស្ថានីយទឹកចែកចាយទាំងនោះផងដែរ។
លោក ម៉ៅ ទៀត សមាជិកគណៈកម្មាធិការគ្រប់គ្រងទឹកនៅស្រុកស្វាយចេក ខេត្តបន្ទាយមានជ័យ បានមានប្រសាសន៍ថា “ប្រព័ន្ធទឹកស្អាតកំពុងជួយសហគមន៍ និងសុខភាពកុមារដោយកាត់បន្ថយជំងឺរាគ។ ពួកគាត់មិនចាំបាច់ដើរឆ្ងាយពីផ្ទះដើម្បីទៅយកទឹកទៀតទេ ដែលរួមចំណែកដល់ការអភិវឌ្ឍន៍សហគមន៍ ជាពិសេសដោយគាំទ្រសាលារៀនក្នុងការទទួលបានទឹកស្អាត”។
លោក Janes Ginting នាយកជាតិរបស់អង្គការទស្សនៈពិភពលោកអន្តរជាតិ នៅកម្ពុជាបានមានប្រសាសន៍ថា “…យើងអបអរសាទរសមិទ្ធិផលដ៏អស្ចារ្យមួយក្នុងបេសកកម្មរបស់យើង ដើម្បីធានាថា ប្រជាជនកម្ពុជាទទួលបានទឹកស្អាតប្រើប្រាស់ និងមានសុវត្ថិភាពសម្រាប់គ្រប់ៗគ្នា។ នេះគឺជាភស្តុតាងមួយទៀតនៃការប្តេជ្ញាចិត្តរបស់យើងចំពោះការអភិវឌ្ឍន៍ប្រកបដោយចីរភាព និងការបង្កើនសមត្ថភាពរបស់សហគមន៍ទាំងអស់នៅកម្ពុជា មិនត្រឹមតែដោះស្រាយតម្រូវការទឹកបន្ទាន់ប៉ុណ្ណោះទេ ប៉ុន្តែក៏ពង្រឹងភាពធន់ទ្រាំ និងសុខភាពប្រជាជនកម្ពុជាគ្រប់ៗគ្នាផងដែរ។”
ការដាក់ឱ្យប្រើប្រាស់ប្រព័ន្ធចែកចាយទឹកតាមបំពង់សហគមន៍នេះ គឺជាការគាំទ្រដល់ការខិតខំប្រឹងប្រែងរបស់កម្ពុជា ដើម្បីឈានដល់គោលដៅអភិវឌ្ឍន៍ប្រកបដោយចីរភាពលេខ៦ ដោយធានាឱ្យមានការគ្រប់គ្រងទឹក និងអនាម័យប្រកបដោយចីរភាពសម្រាប់មនុស្សគ្រប់ៗគ្នា។ វាក៏រួមចំណែកដល់យុទ្ធសាស្រ្តបញ្ចកោណរបស់រាជរដ្ឋាភិបាលដោយនាំមកនូវការអភិវឌ្ឍប្រកបដោយភាពធន់ទ្រាំ ចីរភាព និងបរិយាបន្ន៕
