ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភ្នំពេញ – ក្រសួងប្រៃសណីយ៍និងទូរគមនាគមន៍ ប្រកាសជ្រើសរើសសិស្សានុសិស្ស ចូលរួមប្រកួតប្រជែងសរសេរសំបុត្រថ្នាក់ជាតិលើកទី២ ឆ្នាំ២០២៣ លើប្រធានបទ «ចូរស្រមៃថា អ្នកគឺជាវីរៈបុរសដ៏អស្ចារ្យ ហើយបេសកកម្មរបស់អ្នកគឺធ្វើឱ្យផ្លូវថ្នល់ទាំងអស់នៅជុំវិញពិភពលោកកាន់តែមានសុវត្ថិភាពសម្រាប់កុមារ។ ចូរសរសេរសំបុត្រទៅនរណាម្នាក់ដោយពន្យល់នូវការប្រើប្រាស់ឥទ្ធិពលណាមួយដែលអ្នកនឹងត្រូវការដើម្បីសម្រេចបាននូវបេសកកម្មរបស់អ្នក»។
កម្មវិធីប្រកួតនេះ រៀបចំឡើងដើម្បីផ្តល់ឱកាសឱ្យសិស្សានុសិស្សបង្ហាញស្នាដៃនៃការសរសេររបស់ខ្លួន និងដើម្បីចូលរួមចំណែកក្នុងការលើកកម្ពស់គំនិតច្នៃប្រឌិត ទេពកោសល្យនៃការសរសេរ ព្រមទាំងជំរុញការយល់ដឹង និងការប្រើប្រាស់សេវាប្រៃសណីយ៍នៅកម្ពុជា។ បេក្ខជនជ័យលាភីលេខ១ នឹងទទួលបានរង្វាន់លើកទឹកចិត្ត ព្រមទាំងត្រូវជ្រើសរើសបន្តឱ្យចូលរួមជាតំណាងរបស់កម្ពុជា នៅក្នុងកម្មវិធីប្រកួតប្រជែងកម្រិតអន្តរជាតិដែលរៀបចំដោយសហភាពប្រៃសណីយ៍សកល (Universal Postal Union)។
លក្ខខណ្ឌនៃការចូលរួម បេក្ខជនត្រូវតែជាសិស្សានុសិស្សសញ្ជាតិខ្មែរ និងមានអាយុពី៩-១៥ឆ្នាំ គិតត្រឹមថ្ងៃទី១ ខែឧសភា ឆ្នាំ២០២៣។ បេក្ខជនត្រូវសរសេរសំបុត្រដោយដៃជាភាសាខ្មែរ ឬជាភាសាអង់គ្លេស និងមិនត្រូវលើសពី៨០០ពាក្យ។ លើសពីនេះ ត្រូវសរសេរសំបុត្រដោយខ្លួនឯងផ្ទាល់ ។ ខ្លឹមសារលិខិតដែលលួចចម្លងទាំងស្រុង ឬដោយផ្អែកពីអត្ថបទផ្សេងៗ ពុំត្រូវបានវាយតម្លៃ។
សិស្សានុសិស្សដែលចាប់អារម្មណ៍ចង់ចូលរួមប្រកួតអាចចុះឈ្មោះចូលរួមប្រកួត និងផ្ញើសំបុត្រដែលបានសរសេររួចតាមរយៈសេវាប្រៃសណីយ៍អនុសិដ្ឋ (Registered Mail) របស់ប្រៃសណីយ៍កម្ពុជាដោយឥតគិតថ្លៃ ឬក៏អាចប្រើប្រាស់សេវាបញ្ញើឆាប់រហ័សឯកជន មកកាន់ក្រសួងប្រៃសណីយ៍និងទូរគមនាគមន៍ អគ្គនាយកដ្ឋានប្រៃសណីយ៍ អគារលេខ១៣ មហាវិថីព្រះមុនីវង្ស សង្កាត់ស្រះចក រាជធានីភ្នំពេញ។
ផុតកំណត់ទទួលពាក់្យចុះឈ្មោះយ៉ាងយូរត្រឹមថ្ងៃទី៧ ខែមេសា ឆ្នាំ២០២៣។ សម្រាប់ព័ត៌មានបន្ថែម សូមចូលទៅកាន់គេហទំព័រ https://mptc.gov.kh/letter-competition/ ឬទាក់ទងទូរសព្ទ ០២៣ ២៣៤ ៩៩៩ / ០១០ ២៦៥ ៧០០ ឬអ៊ីម៉ែល gdpadmin@mptc.gov.kh ។
