ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្នុងការបង្កើនការយកចិត្តទុកដាក់ លើការពង្រឹងវិន័យ សីលធម៌ ចរិយាធម៌ សុជីវធម៌ គុណធម៌ និងឥរិយាបទល្អ របស់សិស្សានុសិស្ស ក្រសួងអប់រំ យុវជន និងកីឡា នឹងអនុវត្តការផ្តល់ពិន្ទុ ៨០ភាគរយ លើចំណេះដឹង, ១០ភាគរយលើបំណិន និង ១០ភាគរយលើសីលធម៌ និងចរិយាធម៌។ នេះបើតាមប្រសាសន៍លើកឡើងរបស់សម្តេចធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា ក្នុងឱកាសបើកបវេសនកាលឆ្នាំសិក្សា២០២៣-២០២៤។
សម្តេចធិបតីលើកឡើងថា ថ្ងៃទី១ ខែធ្នូ ឆ្នាំ២០២៣ ជាថ្ងៃដំបូងដែលរាជរដ្ឋាភិបាលកម្ពុជា នីតិកាលទី៧ នៃរដ្ឋសភា ចាប់ផ្តើមអនុវត្តអាទិភាពគោលនយោបាយសំខាន់ៗ ពាក់ព័ន្ធនឹងវិស័យអប់រំ ដូចមានចែងក្នុងបញ្ចកោណទី១ នៃយុទ្ធសាស្រ្តបញ្ចកោណដំណាក់កាលទី១ ផ្តោតលើ «ការពង្រឹងគុណភាពវិស័យអប់រំ កីឡា វិទ្យាសាស្រ្ត និងបច្ចេកវិទ្យា» និងការដាក់ចេញនូវវិធានការគន្លឹះ សម្រាប់ដោះស្រាយក្នុងនីតិកាលទី៧ នៃរដ្ឋសភា ក្នុងគោលដៅ «លើកកម្ពស់គុណភាពអប់រំ» ដោយផ្តោតលើការពង្រឹងគុណភាពសាលារដ្ឋ ចាប់ពីថ្នាក់មត្តេយ្យសិក្សា ដល់មធ្យមសិក្សា។
គួរជំរាបជូនដែរថា នៅក្នុងអាណត្តិទី៧នេះ រាជរដ្ឋាភិបាលនឹងផ្តោតការពង្រឹងគុណធម៌ សីលធម៌ ពីថ្នាក់មតេយ្យ រហូតដល់ថ្នាក់ទី១២ ដោយធ្វើយ៉ាងណាឱ្យការអប់រំមិនត្រឹមតែពង្រឹងមនុស្សឱ្យចេះអក្សរ មានសមត្ថភាព តែត្រូវគួបផ្សំជាមួយនឹងគុណធម៌ សីលធម៌ និងឥរិយាបទល្អ។
សម្តេចធិបតី ហ៊ុន ម៉ាណែត ធ្លាប់មានប្រសាសន៍ថា អត្តចរិតពិតជាសំខាន់ណាស់សម្រាប់ធនធានមនុស្សយើង។ សម្តេចបញ្ជាក់ថា គុណធម៌ សីលធម៌ ផ្នត់គំនិត របស់យុវជនយើង ចាំបាច់ត្រូវរៀបចំតាំងពីក្មេងមក។ «ការអប់រំមនុស្សមានតែ៣កន្លែងទេ នៅផ្ទះឪពុកម្តាយ, នៅសាលាគ្រូ និងបរិស្ថានជុំវិញ»។
លោកបណ្ឌិត យង់ ពៅ អគ្គលេខាធិការរាជបណ្ឌិតសភាកម្ពុជា មានប្រសាសន៍ថា គ្រឹះសង្គម គឺគ្រឹះរបស់មនុស្សដែលចាប់ផ្តើមចេញពីក្មេងវ័យ ដូច្នេះការដាក់បញ្ចូលគុណធម៌ សីលធម៌ ឥរិយាបទ រួមទាំងមនសិការជាតិ ដល់ធនធានមនុស្សកម្ពុជាចាប់ពីវ័យកុមារ រហូតដល់មធ្យមសិក្សា គឺជាការល្អបំផុតសម្រាប់គ្រឹះរបស់មនុស្ស គ្រឹះរបស់សង្គម៕
