ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ការកែលម្អខ្លួនឯងឱ្យប្រសើរជាងមុន មានន័យថាធ្វើយ៉ាងណាជំរុញការវិវឌ្ឍបុគ្គលផ្ទាល់ខ្លួនបរិបូរដោយភាពរីកចម្រើនពីមួយពេល ទៅមួយពេល ដែលរាប់បញ្ចូលទាំងសុខភាពផ្លូវកាយ និងផ្លូវចិត្ត ឬភាពរឹងមាំផ្នែកទំនាក់ទំនងសង្គមការងារ សុវត្ថិភាពហិរញ្ញវត្ថុ និងសុខុដុមរមនាមក្នុងការរស់នៅប្រចាំថ្ងៃ។ យោងតាមគេហទំព័រ calendar បានបង្ហាញគន្លឹះមួយចំនួនដើម្បីផ្ទៀងផ្ទាត់កាវិវឌ្ឍសមត្ថភាពផ្ទាល់ខ្លួនប្រចាំខែដូចជា ៖
១. កំណត់គោលដៅតាមបែបវៃឆ្លាត ៖ ការកំណត់គោលដៅ គឺជាជំហានមួយឆ្ពោះទៅរកការអភិវឌ្ឍខ្លួនបានឆាប់រហ័ស ។ តើអ្វីខ្លះដែលលោកអ្នកចង់សម្រេចបាន? ខណៈរកឃើញរាល់អ្វីដែលចង់បានហើយ ចូរធ្វើផែនការដែលមានភាពជាក់លាក់ សមល្មមវាស់វែងបាន ឬប្រាកដថា អាចធ្វើបានក្នុងរយៈពេលណាមួយជាដើម។
២. ដាក់ផែនការសកម្មភាពដែលមានវិធីសាស្រ្តសម្រេច ៖ មុននឹងចាប់ផ្តើមអនុវត្តន៍ ឬទៅធ្វើអ្វីមួយ គឺចាំបាច់ណាស់ មានផែនការដើម្បីសម្រេចគោលដៅដែលចាំបាច់ជាមុន ដោយត្រូវការកត់សម្គាល់សកម្មភាពនីមួយៗ ធ្វើពីតូចទៅធំ តាមជំហាននីមួយៗ និងកំណត់រយៈពេលដែលចាប់ផ្តើម ហើយនិងរយៈពេលដែលបញ្ចប់ទៅក្នុងបញ្ជីផែនការ។
៣. អានសៀវភៅជំនួយខ្លួនឯង ៖ សៀវភៅជំនួយខ្លួនឯង គឺមានសរសេរបញ្ចូលអំពីយុទ្ធសាស្រ្ត ការគ្រប់គ្រងនិងកត់សម្គាល់បញ្ហា សៀវភៅដែលមានទស្សនៈថ្មីៗ និងជំរុញឱ្យមានការផ្លាស់ប្តូរខ្លួនឯង ទៅរកភាពវិជ្ជមាន។ មិនថាលោកអ្នក ចូលចិត្ត ឬមិនចូលចិត្តអាននោះទេ អ្វីដែលសំខាន់គឺត្រូវតែចាប់ផ្តើមអាន។ ដោយការជ្រើសសៀវភៅពាក់ព័ន្ធនឹងស្ថានភាពខ្លួនឯង ឬក៏អានអំពីទំព័រដែលពាក់ព័ន្ធនឹងខ្លួនឯងតែម្តង។
៤. ឧស្សាហ៍រំឮកខ្លួនឯង ៖ និយាយពាក្យ ល្អៗ ទៅកាន់ខ្លួនឯងជារឿយៗ ដូចជាពាក្យជំរុញចិត្ត និងពង្រឹងស្មារតីឱ្យរឹងប៉ឹងជាងមុន។ កាលដែលធ្វើបែបនេះ វាជួយជំរុញឱ្យលោកអ្នក កាន់តែមានទំនុកចិត្ត និងស្គាល់គុណតម្លៃនៃជីវិតជាងមុន រួមទាំងឱកាសនៃការសម្រេចគោលដៅ។
៥. គ្រប់គ្រងពេលឱ្យមានប្រសិទ្ធភាព ៖ វាជាចំណុចមួយដែលមិនងាយស្រួលប៉ុន្មាននោះទេក្នុងការដោះស្រាយបញ្ហាអំពីប្រសិទ្ធភាពនៃការប្រើប្រាស់ពេលវេលា។ ប៉ុន្តែ លោកអ្នកនៅតែអាចចាប់ផ្តើមតាមរយៈសកម្មភាពសាមញ្ញៗដូចជា ទុកចន្លោះផ្ទៀងផ្ទាត់កិច្ចការ កំណត់គោលដៅហើយត្រូវតែកំណត់ប្រភេទការងារដែលអទិភាពផងដែរ សរសេរផែនការឱ្យបានរៀងរាល់ថ្ងៃ ត្រូវតែកំណត់ពេលបញ្ចប់អ្វីមួយដោយខ្លួនឯង បំបែកការងារឱ្យតូចៗ វិភាគអំពីឧបសគ្គដែលរារាំងរាល់អ្វីដែលលោកអ្នកកំណត់ទុក ឬគិតថា វានឹងកើតឡើងនៅពេលខាងមុខ។ ក្រៅពីនោះក៏ត្រូវ ទុកពេលសម្រាកចំពោះខ្លួនឯង ឬផ្ទេរភារកិច្ចទៅកាន់អ្នកដទៃក្នុងករណីចាំបាច់ ចេះបដិសេធនូវអ្វីដែលមិនអាចទទួលធ្វើបាន ឬមិនអាចជួយគេបាន ហើយអ្វីដែលសំខាន់ចុងក្រោយគឺរៀនចេះអបអរសាទរនឹងខ្លួនឯង នៅពេលសម្រេចបានគោលដៅណាមួយដែលបានកំណត់ទុក។
៦. រៀនជំនាញថ្មីៗបន្ថែម ៖ ប្រហែលជាមានសកម្មភាពច្រើនណាស់ ដែលលោកអ្នកកំពុងគិត និងគ្រោងទុករៀនបន្ថែម ប៉ុន្តែពេលខ្លះ លោកអ្នកមិនធ្លាប់សាកល្បងទៅធ្វើសូម្បីតែម្តង។ បើគ្រាន់តែគិតទុក តើអាចចេះជំនាញថ្មីៗយ៉ាងដូចម្តេច ? ជាឧទារណ៍ ងាយយល់មួយគឺលោកអ្នកកំពុងចាប់អារម្មណ៍រៀនភាសាថ្មីៗ លេងហ្គីតា ឬការបង្កើតអាជីវកម្មខ្នាតតូចជាដើម។ ដូច្នេះដើម្បីពង្រឹងវឌ្ឍភាពនៃការអភិវឌ្ឍសមត្ថភាពខ្លួនឯងជារៀងរាល់ខែ គឺចាប់ផ្តើមរៀននូវអ្វីដែលបានគ្រោងទុក។ បើពុំដូច្នោះទេ លោកអ្នកអាចពង្រឹងសមត្ថភាពបន្ថែមទៅលើអ្វីដែលមិនទាន់ធ្វើបានល្អកាលពីមុន ឬពង្រឹងជំនាញដែលកំពុងធ្វើបច្ចុប្បន្នតែម្តង៕
