ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្នុងបរិបទនៃការរីកចម្រើនផ្នែកវិទ្យាសាស្រ្ត និងបច្ចេកវិទ្យា ជាពិសេសបញ្ញាសិប្បនិម្មិត និងបរិវត្តកម្មបច្ចេកវិទ្យាឌីជីថល បានជះឥទ្ធិពលយ៉ាងខ្លាំងដល់ការអភិវឌ្ឍលើគ្រប់វិស័យ ក្រសួងអប់រំ យុវជន និងកីឡា កំពុងធ្វើការងារយ៉ាងសកម្ម ដើម្បីជំរុញឱ្យគ្រូបង្រៀន និងសិស្សានុសិស្សមានចំណេះដឹង និងសមត្ថភាពប្រើប្រាស់បច្ចេកវិទ្យាបញ្ញាសិប្បនិម្មិត ប្រកបដោយការទទួលខុសត្រូវខ្ពស់។ នេះជាប្រសាសន៍លើកឡើងរបស់ ឯកឧត្តមបណ្ឌិតសភាចារ្យ ហង់ជួន ណារ៉ុន រដ្ឋមន្រ្តីក្រសួងអប់រំ យុវជន និងកីឡា ក្នុងទិវាគ្រូបង្រៀន ៥តុលា ក្រោមប្រធានបទ “គ្រូបង្រៀនជាតួអង្គសំខាន់ នៃបរិវត្តកម្មបញ្ញាសិប្បនិម្មិត”។
បើតាមប្រសាសន៍របស់ឯកឧត្តមរដ្ឋមន្រ្តី ប្រធានបទសម្រាប់ទិវាគ្រូបង្រៀនឆ្នាំនេះ បង្ហាញអំពីទិសដៅគោលនយោបាយរបស់ក្រសួងអប់រំ យុវជន និងកីឡា ក្នុងការកសាងមូលដ្ឋានគ្រឹះរបស់គ្រូបង្រៀន ឆ្លើយតបទៅនឹងបរិវត្តកម្មវិស័យអប់រំនៅកម្ពុជា ផ្តោតលើការប្រើប្រាស់ និងការចេះទាញយកអត្ថប្រយោជន៍ជាអតិបរិមា នៃការរីកចម្រើនបច្ចេកវិទ្យាអប់រំ (EdTech) និងបញ្ញាសិប្បនិម្មិត (AI) ក្នុងការលើកកម្ពស់គុណភាពអប់រំ តាមរយៈការអភិវឌ្ឍបំណិនឌីជីថលដល់គ្រូបង្រៀននៅកម្ពុជា ឆ្លើយតបទៅនឹងការវិវត្តយ៉ាងឆាប់រហ័សនៃបច្ចេកវិទ្យាឌីជីថលក្នុងតំបន់ និងពិភពលោក ដែលនឹងនាំមកនូវការផ្លាស់ប្តូរជាវិជ្ជមានយ៉ាងច្រើនដល់វិស័យអប់រំនៅ កម្ពុជា។
ក្នុងនោះឯកឧត្តមរដ្ឋមន្រ្តីក៏បានលើកពីគុណសម្បត្តិរបស់បញ្ញាសិប្បនិម្មិត ដែលជះឥទ្ធិពលទៅលើវិស័យអប់រំ ដូចជា អាចជួយគាំទ្រដល់អ្នកសិក្សាឱ្យសម្រេចបានគោលដៅនៃការអប់រំ ជួយគ្រូបង្រៀនក្នុងការរៀបចំកិច្ចតែងការបង្រៀន និងធ្វើការរង្វាយតម្លៃលើកិច្ចការសិស្ស និងជាពិសេសទៅលើលទ្ធផលនៃការសិក្សា ដោយចំណាយពេលវេលាតិច។ បន្ថែមពីនេះទៀត AI ក៏ជួយដល់គ្រូបង្រៀនអាចស្វែងរកព័ត៌មាន ការសរសេរអត្ថបទ ការឆ្លើយសំណួរ ការបង្កើតសំណើ ការបង្កើតមេរៀន សំណួរនិងចម្លើយពេលប្រឡង កិច្ចតែងការ វីដេអូបង្រៀន ផលិតរូបភាពដើម្បីប្រើប្រាស់ក្នុងការបង្រៀន និងល្បែងសិក្សា។ល។ បច្ចេកវិទ្យា AI ឱ្យសិស្សរៀនបានលឿន បង្កបរិយាកាសរីករាយក្នុងការរៀនសូត្រ ជាក់ស្តែងនៅសាលារៀនជំនាន់ថ្មី សិស្សកំពុងប្រើប្រាស់ AI ដើម្បីស្វែងយល់ពីមេរៀនដែលគេកំពុងសិក្សា និងដោះស្រាយលំហាត់ជាដើម។
យោងតាមការរីកចម្រើននៃបច្ចេកវិទ្យានេះ គឺទាមទារឱ្យបុគ្គលិកអប់រំ គ្រូបង្រៀន សិស្សានុសិស្សមានការអភិវឌ្ឍសមត្ថភាព ចំណេះដឹង និងការរៀនសូត្រជាប្រចាំ ដើម្បីឆ្លើយតបនឹងការវិវត្តឥតឈប់ឈរនេះ។ ជាមួយគ្នាអ្នកសិក្សាក៏ត្រូវស្វែងយល់ និងប្រតិបត្តិក្រមសីលធម៌នៃការប្រើប្រាស់បច្ចេកវិទ្យាថ្មីនេះផងដែរ ជាពិសេសចំណេះដឹងពីការប្រើប្រាស់បច្ចេកវិទ្យាដោយសុវត្ថិភាព ដែលមានផលជះទៅលើកុមារតូចៗ និងត្រូវយល់ដឹងអំពីឥទ្ធិពលនៃបច្ចេកវិទ្យាដែលធ្វើឱ្យប៉ះពាល់ដល់ការរីកលូតលាស់ផ្នែកបញ្ញា ស្មារតី និងកាយសម្បទាររបស់សិស្សផងដែរ។
លោកស្រី Esther Mcfarlance ប្រធានផ្នែកអប់រំ នៃការិយាល័យអង្គការយូណេស្កូនៅភ្នំពេញ ក៏យល់ស្របទៅនឹងប្រសាសន៍របស់ឯកឧត្តមបណ្ឌិតសភាចារ្យ ហង់ជួន ណារ៉ុន ដោយថា នៅក្នុងស្ថានភាពដែលបញ្ញាសិប្បនិម្មិតជួយសម្រួលដល់ការផ្លាស់ប្តូរវិធីសាស្រ្តអប់រំ យើងត្រូវតែធានាថា បច្ចេកវិទ្យាថ្មីៗគួរត្រូវបានប្រើប្រាស់ដើម្បីគាំទ្រ និងជួយសម្រួលដល់គ្រូបង្រៀន មិនមែនទៅជំនួសពួកគាត់នោះទេ។ តាមរយៈការវិនិយោគលើការប្រឹក្សាគរុកោសល្យ ការស្រាវជ្រាវ និងការអភិវឌ្ឍវិជ្ជាជីវៈសម្រាប់គ្រូបង្រៀន យើងធានាថា គ្រូបង្រៀននៅតែមានតួនាទីសំខាន់ក្នុងបរិបទអប់រំដែលកំពុងផ្លាស់ប្តូរនេះ។
យ៉ាងណាក៏ដោយចំពោះមុខការវិវឌ្ឍនៃបច្ចេកវិទ្យានេះ ឯកឧត្តមរដ្ឋមន្រ្តីបានវាយតម្លៃខ្ពស់ចំពោះគណៈគ្រប់គ្រង គ្រូឧទ្ទេស និងលោកគ្រូអ្នកគ្រូនៃវិទ្យាស្ថានជាតិអប់រំ វិទ្យាស្ថានគរុកោសល្យរាជធានីភ្នំពេញ បាត់ដំបង និងសាលារៀនជំនាន់ថ្មី ដែលបានជំរុញនវានុវត្តន៍ក្នុងការងារបង្រៀន និងរៀនឱ្យកាន់តែមានប្រសិទ្ធភាព តាមរយៈការធ្វើសមាហរណកម្មបច្ចេកវិទ្យាអប់រំ (EdTech) និងបញ្ញាសិប្បនិម្មិត (AI) ក្នុងការបង្រៀននៅកម្ពុជា។ ឯកឧត្តមបញ្ជាក់ថា នវានុវត្តន៍នេះ ជាកាតាលីករពន្លឿនបរិវត្តកម្មបច្ចេកវិទ្យាឌីជីថល និងការធ្វើសមាហរណកម្មប្រព័ន្ធអប់រំកម្ពុជា ចូលទៅក្នុងតំបន់ និងពិភពលោក ស្របតាមកំណែទម្រង់ការអប់រំឌីជីថលរបស់ក្រសួងអប់រំ យុវជន និងកីឡា៕
