កត្តាដែលនាំឱ្យរីករាយចិត្ត មិនងាយក្នុងការរក្សាបានរាល់ពេល រាល់ថ្ងៃនោះទេ បើគ្មានទម្លាប់ល្អ និងការលត់ដំផ្លូវចិត្ត ឬរបៀបពង្រឹងផ្នត់គំនិតវិជ្ជមាន។ ដើម្បីជំរុញឱ្យសប្បាយចិត្តរាល់ថ្ងៃបាន វាក៏អាស្រ័យលើការប្រតិបត្តិល្អចំពោះខ្លួនឯងដែរ។ យោងតាម គេហទំព័រ Sweety High មានសកម្មភាពចំនួន៧ ដែលអាចពង្រឹងសុភមង្គលឱ្យស្រស់ស្រាយប្រចាំថ្ងៃ ឬក្នុងរយៈពេលវែង ៖

១. ស្តាប់ភ្លេង ៖ តន្រ្តីជាវិថីនាំទៅរកភាពរីករាយ តែក៏ក្នុងករណីវាស្របទៅនឹងចំណង់ចំណូលចិត្តផ្ទាល់ខ្លួនដែរ។ នៅពេលដែលជ្រើសរើសបានភ្លេង ឬចម្រៀងដែលខ្លួនស្រឡាញ់ជាប់ចិត្ត គឺជាបុព្វហេតុមួយជួយឱ្យចិត្តត្រជាក់ និងបង្កើនបានជាស្ថានភាពផ្លូវចិត្ត ដែលមានសេចក្ដីសុខ សេចក្ដីចម្រើន។ ទន្ទឹមគ្នានោះ ការកំណត់ប្រភេទ ឬកំណត់ការប្រើប្រាស់បណ្តាញសង្គមឱ្យស្របនឹងតម្រូវការ ឬការចង់បានក៏ជាការរួមចំណែកបំពេញនូវសេចក្ដីសុខផ្នែកស្មារតីដែរ។

២. ពេញចិត្តនឹងបច្ចុប្បន្នកាល ៖ មិនមែនជារឿងងាយស្រួលប៉ុន្មានឡើង ក្នុងការរក្សាផ្នត់គំនិតវិជ្ជមានក្នុងស្ថានភាពមួយដែលមិនសូវល្អ ប៉ុន្តែលោកអ្នកនៅតែអាចទាញភាពវិជ្ជមានទាំងនោះ ដោយការស្វែងយល់អំពីខ្លួនឯងតាមរយៈការសរសេរកំណត់ហេតុ ឬរឿងរ៉ាវដែលលោកអ្នកពេញចិត្តជាងគេឱ្យបានបីចំណុចក្នុងពេលពេញមួយថ្ងៃ ឱ្យបានជាប់លាប់។ អនុវត្តន៍បែបនេះ ជាចំណែកមួយក្នុងការផ្លាស់ប្តូរទស្សនៈរបស់អ្នកឱ្យមានការពេញចិត្តចំពោះបច្ចុប្បន្នភាព រួមទាំងបង្កើនអត្ថន័យនៃជីវិតបន្ថែម។

៣. ជួបមិត្តឬអ្នករាប់អានគ្នាជិតស្និទ្ធ ៖ ពេលបានជួបមិត្តម្តងៗ ជាពិសេសមិត្តស្និទ្ធស្នាលទៀតនោះ ជំរុញឱ្យមនុស្ស មានភាពរីករាយសប្បាយចិត្ត ឬបំផុសសំណើចចេញពីពោះ ដោយសារតែបាននិយាយរឿងរ៉ាវអស់ពីដួងចិត្តជាមួយគ្នា។ ការជួបគ្នាទៀតសោត មិនចាំបាច់ទាល់តែបង្អង់ចាំឱ្យមានឱកាសល្អណាពេកនោះទេ សូមចាប់ផ្តើមកំណត់ថ្ងៃ និងហៅមនុស្សដែលលោកអ្នកចង់ជួបតែម្តងទៅ មានន័យថា ចាប់ផ្តើមសកម្មភាពជំនួសឱ្យការរង់ចាំ។

៤. លំហែកំសាន្តនៅខាងក្រៅផ្ទះ ៖ បើបានចេញទៅខាងក្រៅដែលមានធម្មជាតិនៅអមទៀតនោះ អាចថាជាពេលដែលសំណាងណាស់ ព្រោះធម្មជាតិ ឬរុក្ខជាតិបៃតងតែងបំពេញនូវភាពរីករាយជូនទៅកាន់បុគ្គលទាំងឡាយ។ ការចំណាយពេលបន្តិចបន្តួចទៅអង្គុយលើស្មៅ ក៏អាចជួយឱ្យអ្នកមានអារម្មណ៍ស្ងប់ និងបន្ធូរភាពស្រឡះទៅកាន់ខួរក្បាល។

៥. ជាបង្អែកដល់អ្នកដទៃ ៖ ការផ្តល់ស្នាមញញឹមទៅកាន់អ្នកដទៃ ក៏អាចនាំនូវភាពរីករាយទៅកាន់ខ្លួនឯង។ ចំណែកឯការផ្តល់ជំនួយទៅកាន់សមាជិកគ្រួសារ ឬសម្រាលបន្ទុកគ្រួសារ ឬទិញសម្ភារៈ និងអាហារទុកឱ្យមនុស្សជាទីស្រឡាញ់ណាម្នាក់ជាដើម។ ផ្តល់ជំនួយទៅកាន់មនុស្សដែលត្រូវការ មានន័យថា សកម្មភាពទាំងនេះជាការទទួលផលទាំងទ្វេភាគី អ្នកផ្តល់ឱ្យក៏សប្បាយចិត្ត រីឯអ្នកទទួលផលក៏បាននូវអ្វីដែលគេត្រូវការ។

៦. ញញឹមនៅមុខកញ្ចក់ ៖ តើលោកអ្នកធ្លាប់បានដឹងទេថា ស្នាមញញឹម បានបង្កើននូវអ័រម៉ូនសុភមង្គល? ដូច្នេះ ការហាត់សម ញញឹមនៅពីមុខកញ្ចក់ជាចំណែកមួយជួយបង្កើនអារម្មណ៍វិជ្ជមានទៅកាន់ខ្លួនឯង។ វាមិនចម្លែកពេកទេ ពេលដែលធ្វើបែបនេះនៅគ្រាដំបូងៗ អាចនឹងមានអារម្មណ៍ថាអៀនប្រៀនៗបន្តិច ប៉ុន្តែនៅពេលដែលអនុវត្តន៍បែបនេះជារឿយៗ យូរទៅនឹងជំរុញចិត្តឱ្យកាន់តែស្រឡាញ់ភាពរីករាយនៅលើផ្ទៃមុខរបស់ខ្លួនឯង។

៧. ធ្វើសមាធិ ៖ ធ្វើសមាធិជាចំណែកមួយជួយឱ្យផ្លូវចិត្តមានសភាពរឹងមាំ ហើយការរៀនដកដង្ហើមមួយៗក៏ជាវិធីជំរុញឱ្យស្មារតីមានភាពស្ងប់។ បច្ចុប្បន្ននេះ មានវិធីសមាធិច្រើនណាស់ផ្សព្វផ្សាយនៅតាមបណ្តាញសង្គម ដែលវារឹតតែផ្តល់នូវភាពងាយស្រួល ក្នុងការជ្រើសនូវជម្រើសណាមួយដែលសាកសមនឹងស្ថានភាពបច្ចុប្បន្ននៃខ្លួនឯង៕