«រៀនតាមរយៈការលេងនិងបរិស្ថាន»  ឬ «លេងគឺរៀន រៀនគឺលេង» ជាវិធីសាស្ត្រមួយដ៏សំខាន់ក្នុងការអនុវត្តកម្មវិធីមត្តេយ្យសិក្សា ដែលឆ្លើយតបនឹងការអភិវឌ្ឍផ្នែករាងកាយ និងសុខភាព, ការអភិវឌ្ឍផ្នែកសីលធម៌ និងវប្បធម៌, ការអភិវឌ្ឍផ្នែកសង្គមនិងអារម្មណ៍, ការអភិវឌ្ឍផ្នែកការយល់ដឹងនិងការគិត និង ការអភិវឌ្ឍផ្នែកភាសា។ នេះបើតាមប្រសាសន៍លើកឡើងរបស់ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា ក្នុងពិធីផ្សព្វផ្សាយដាក់ឱ្យប្រើប្រាស់ឯកសារបច្ចេកទេស ស្តីពី «រៀនតាមរយៈការលេង និងបរិស្ថាន» កាលពីពេលថ្មីៗនេះ។

ឯកឧត្តមបណ្ឌិតសភាចារ្យ ហង់ជួន ណារ៉ុន បន្ថែមថា កម្មវិធីលម្អិតមត្តេយ្យសិក្សា បានកំណត់គោលដៅរួមដោយជំរុញការអនុវត្តសកម្មភាព «ការសិក្សារៀនសូត្ររបស់កុមារចាប់ផ្តើមពីការប្រើប្រាស់ញ្ញាណ និងចិត្តចលភាព តាមរយៈសកម្មភាពលេង និងសកម្មភាពផ្ទាល់របស់កុមារ» ដែលសកម្មភាពនេះបានបង្កប់នូវអាថ៌កំបាំងសមត្ថភាពរបស់កុមារដែលមិននឹកស្មានដល់។

ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានសម្ដែងការកោតសរសើរ និងវាយតម្លៃខ្ពស់ចំពោះ លោកជំទាវ រដ្ឋលេខាធិការប្រចាំការ និងជាប្រធានគណៈកម្មការគ្រប់គ្រងគម្រោង និងក្រុមការងារនាយកដ្ឋានអប់រំកុមារតូច អង្គការពាក់ព័ន្ធដូចជា ទីភ្នាក់ងារសហប្រតិបត្តិការអន្តរជាតិជប៉ុន (JICA) និង សាជីវកម្មសុខុមាលភាពសង្គម ថិនរីយូ កូសេកៃ (Tenryu Koseikai -TKK) ប្រចាំប្រទេសជប៉ុន ដែលបានឧបត្ថម្ភគាំទ្រថវិកា និងបច្ចេកទេសក្នុងការអនុវត្តគម្រោង ក៏ដូចជាថ្លែងអំណរគុណអង្គការសមាគមន៍សន្តិស្ម័គ្រចិត្ត (SVA) ដែលបានចូលរួមគាំទ្រវិស័យអប់រំនៅកម្ពុជា ចាប់តាំងពីឆ្នាំ១៩៨១ ដោយបានបង្កើតសមិទ្ធផលជាច្រើនលើផ្នែកបោះពុម្ព, សាងសង់អគារសិក្សា អគារបណ្ណាល័យ , អគារមជ្ឈមណ្ឌលសិក្សាសហគមន៍, ព្រមទាំងជួសជុលអគារ , ជួយផ្តល់វគ្គបំប៉នបច្ចេកទេសគ្រប់គ្រងបណ្ណាល័យ,សកម្មភាពបណ្ណាល័យចល័ត, ការនិទានរឿងដល់សាលាបឋមសិក្សា, និងមជ្ឈមណ្ឌលសិក្សាសហគម និង បានសម្រេចសមិទ្ធផលនៃគម្រោងអប់រំកុមារតូចជំហានទី១ និងគម្រោងជំហានទី២ សរុប១០០សាលារៀន ដែលបានផ្តល់ផលជះជាវិជ្ជមានក្នុងការលើកកម្ពស់ការអប់រំកុមារតូចនៅកម្ពុជាផងដែរ។

រដ្ឋមន្រ្តីក្រសួងអប់រំ ក៏បានស្នើអង្គភាពជំនាញពាក់ព័ន្ធ និងមន្ទីរអប់រំ យុវជន និងកីឡារាជធានី ខេត្តទាំងអស់យកចិត្តទុកដាក់ខ្ពស់ក្នុងការអនុវត្តកម្មវិធីសិក្សាសម្រាប់មត្តេយ្យសិក្សាដោយត្រូវ៖ ទី១. ផ្សព្វផ្សាយបន្តដល់គ្រប់សាលា និងថ្នាក់មត្តេយ្យសិក្សា ដើម្បីចូលរួមជំរុញការអនុវត្តឯកសារបច្ចេកទេសស្តីពី ការរៀបចំបរិស្ថានសិក្សាតាមរយៈការលេង រឿងនិទាន និងការផលិតសម្ភារៈល្បែងសម្រាប់កុមារតូច ទី២. អង្គភាពជំនាញត្រូវពិនិត្យឡើងវិញ និងដាក់ឱ្យអនុវត្តតេស្តកុមារតូចកម្រិតមត្តេយ្យសិក្សាឡើងវិញ ដើម្បីរៀបចំក្របខ័ណ្ឌរង្វាយតម្លៃសមត្ថភាពកុមារឱ្យបានសមស្របទៅតាមការអភិវឌ្ឍចិត្តសង្គមរបស់កុមារតូច ទី៣. សាលាមត្តេយ្យសិក្សា និងថ្នាក់មត្តេយ្យសិក្សាគ្រប់រូបភាព ត្រូវរៀបចំបរិស្ថានសិក្សាក្នុងនិងក្រៅថ្នាក់ឱ្យស្របតាមលក្ខណៈបច្ចេទេសនៃការអនុវត្តកម្មវិធីសិក្សា ទី៤. សាលាមត្តេយ្យសិក្សានិងថ្នាក់មត្តេយ្យសិក្សាគ្រប់រូបភាព ត្រូវបន្តយកចិត្តទុកដាក់ ក្នុងការអនុវត្តវិធានការថែទាំសុខភាព និងអនាម័យ សម្រាប់កុមារតូច ទី៥. សាលាមត្តេយ្យសិក្សានិងថ្នាក់មត្តេយ្យសិក្សាគ្រប់រូបភាព ត្រូវចូលរួម និងជំរុញការអនុវត្តស្តង់ដាសាលាមត្តេយ្យសិក្សាគំរូ ឱ្យមានប្រសិទ្ធភាពខ្ពស់ ដើម្បីជាប្រយោជន៍សម្រាប់កុមារតូចនៅកម្ពុជា។

ជាការឆ្លើយតបទៅនឹងវិធានការគន្លឹះរបស់រាជរដ្ឋាភិបាល ក្រសួងបានសម្រួចអាទិភាពកំណែទម្រង់របស់ខ្លួន ដោយបានដាក់ចេញនូវស្តង់ដាសាលារៀនគំរូ ចាប់ពីកម្រិតមត្តេយ្យសិក្សាដល់កម្រិតមធ្យមសិក្សា ដែលផ្តោតលើស្តង់ដាសាលារៀនគំរូចំនួនប្រាំ រួមមាន ស្តង់ដាទី១៖ លទ្ធផលសិក្សារបស់សិស្ស, ស្តង់ដាទី២៖ ការបង្រៀននិងរៀន, ស្តង់ដាទី៣៖ ការចូលរួមរបស់សហគមន៍, ស្តង់ដាទី៤៖ ដំណើរប្រតិបត្តិការ និងរដ្ឋបាលសាលារៀន, ស្តង់ដាទី៥៖ គណនេយ្យភាពរបស់សាលារៀន។

គួរជម្រាបជូនថា កម្មវិធីផ្សព្វផ្សាយដាក់ឱ្យប្រើប្រាស់ឯកសារបច្ចេកទេស ស្តីពី «រៀនតាមរយៈការលេង និងបរិស្ថាន» ធ្វើឡើងក្នុងគោលបំណងដើម្បីផ្សព្វផ្សាយដាក់ឱ្យប្រើប្រាស់ជាផ្លូវការនូវឯកសារចំនួន ៣ក្បាល ក្នុងនោះរួមមាន ឯកសារស្តីពីការរៀនតាមរយៈការលេង និងបរិស្ថាន, ការផលិតសម្ភារៈល្បែងនិងរឿងនិទានសម្រាប់មត្តេយ្យសិក្សា ដែលសុទ្ធសឹងជាឯកសារបច្ចេកទេសសម្រាប់បម្រើដល់ការអប់រំកុមារតូច និងជាឯកសារគាំទ្រដល់ការអនុវត្តកម្មវិធីសិក្សាសម្រាប់មត្តេយ្យសិក្សានៅកម្ពុជា ក៏ដូចជា ប្រកាសដាក់ឱ្យអនុវត្តទ្រឹស្ដី “ការរៀនតាមរយៈការលេង និងបរិស្ថាន»៕