ភ្នំពេញ – ថ្លែងក្នុងពិធីផ្សព្វផ្សាយ និងដាក់ឱ្យប្រើប្រាស់លើលទ្ធផលស្រាវជ្រាវស្តីពី “ការបាត់បង់ការសិក្សាលើផ្នែកអំណាន និងគណិតវិទ្យារបស់សិស្សនៅកម្រិតបឋមសិក្សាអំឡុងពេលរីករាលដាលនៃជំងឺកូវីដ១៩ ក្នុងតំបន់អាស៊ាន” កាលពីថ្ងៃទី២៩ ខែមីនា ឆ្នាំ២០២៣កន្លងទៅ ឯកឧត្តមបណ្ឌិតសភាចារ្យ ហង់ជួន ណារ៉ុន រដ្ឋមន្រ្តីក្រសួងអប់រំ យុវជន និងកីឡា មានប្រសាសន៍ថា ការសិក្សានេះ មានគោលបំណងផ្តល់ជាភ័ស្តុតាង និងធាតុចូលដល់រដ្ឋជាសមាជិកអាស៊ានទាំងអស់អំពីយុទ្ធសាស្ត្រ និងអន្តរាគមន៍ប្រកបដោយប្រសិទ្ធភាព លើការបាត់បង់ការសិក្សារបស់សិស្សក្នុងការអាន និងគណិតវិទ្យា ដើម្បីធានាគុណភាពសិក្សាក្នុងដំណាក់កាលងើបឡើងវិញ។

របាយការណ៍ថ្មីមួយស្ដីពីលទ្ធផលស្រាវជ្រាវស្តីពី “ការបាត់បង់ការសិក្សាលើផ្នែកអំណាន និងគណិតវិទ្យារបស់សិស្សនៅកម្រិតបឋមសិក្សាអំឡុងពេលរីករាលដាលនៃជំងឺកូវីដ១៩ ក្នុងតំបន់អាស៊ាន” ដែលបានធ្វើការសិក្សាស្រាវជ្រាវ និងជួបសម្ភាសន៍សិស្ស គ្រូ ពីប្រទេសចំនួន ៣ រួមមានកម្ពុជា ថៃ និងឡាវ និងបានប្រមូលយកមក ប្រៀបធៀបគ្នាជាមួយនឹងស្ថានភាពក្នុងប្រទេសជាច្រើនក្នុងពិភពលោក លទ្ធផលបានបញ្ជាក់ថា ការអាន និងគណិតវិទ្យារបស់សិស្សថ្នាក់ទី៦ បានធ្លាក់ចុះ ៣ភាគរយសម្រាប់ការអាន និង ១០,៧ ភាគរយសម្រាប់គណិតវិទ្យា ធៀបនឹងមធ្យមភាគឆ្នាំ ២០១៦។

ជាមួយគ្នានេះ លទ្ធផលនៃការសិក្សាស្រាវជ្រាវបានបង្ហាញថា ការបិទសាលានាំទៅរកវិសមភាពក្នុងការសិក្សា និងប៉ះពាល់អវិជ្ជមានដល់គុណភាពនៃសេវាអប់រំដែលផ្តល់នៅទូទាំងប្រទេសក្នុងតំបន់។ ទន្ទឹមគ្នានេះ អន្តរាគមន៍ជំនួយបន្ថែមដូចជា ការបង្កើតកន្លែងបង្រៀន និងរៀនបន្ថែម និងហេដ្ឋារចនាសម្ព័ន្ធបច្ចេកវិទ្យា និងការបង្កើតបរិយាកាសសាលាដែលទាក់ទាញសិស្សឱ្យចូលរួមយ៉ាងពេញលេញក្នុងការរៀនសូត្រគឺជាការចាំបាច់ដើម្បីជួយស្ដារការបាត់បង់ការសិក្សារបស់សិស្សនៅដំណាក់កាលបើកដំណើរការឡើងវិញ។

ឯកឧត្តមបណ្ឌិតសភាចារ្យ ហង់ជួន ណារ៉ុន បញ្ជាក់បន្ថែមថា ការបិទសាលារៀននៅទូទាំងពិភពលោក ក្នុងអំឡុងពេលជំងឺរាតត្បាតកូវីដ១៩ បាននាំឱ្យប៉ះពាល់ភ្លាមៗដល់ការអប់រំ ដែលបានជះឥទ្ធិពលអវិជ្ជមានដល់លទ្ធផលសិក្សារបស់សិស្សរាប់លាននាក់នៅជុំវិញពិភពលោក ក្នុងនោះក៏មានកម្ពុជាផងដែរ។ ក្នុងបទពិសោធន៍នេះ ប្រទេសជាច្រើនបានផ្លាស់ប្តូររបៀបរៀនដោយផ្ទាល់ទៅជារបៀបរៀនពីចម្ងាយ ដើម្បីធានាបន្តការបង្រៀន និងការរៀនរបស់សិស្សានុសិស្សដែលបញ្ហានេះ បានបង្ហាញឱ្យឃើញនូវកង្វះអក្ខរកម្មឌីជីថល ឧបករណ៍ឌីជីថល និងការទទួលបានការតភ្ជាប់អ៊ីនធឺណិតក្នុងការប្រើប្រាស់របៀបថ្មីទាំងនេះមានកម្រិត ដែលធ្វើឱ្យរបៀបសិក្សាថ្មី បានលេចចេញជាបញ្ហាប្រឈមថ្មីសម្រាប់ទាំងសិស្ស និងគ្រូ។

ឯកឧត្តមបណ្ឌិតសភាចារ្យ ហង់ជួន ណារ៉ុន រដ្ឋមន្រ្តីក្រសួងអប់រំ យុវជន និងកីឡា

“សិស្សានុសិស្សជុំវិញពិភពលោក ជាពិសេសក្នុងប្រទេសកំពុងអភិវឌ្ឍន៍ បានជួបប្រទះនឹងការបាត់បង់ការសិក្សា ហើយរបាយការណ៍នៃការរកឃើញនេះ អាចជាមូលដ្ឋានគ្រឹះមួយជួយដល់បណ្តាប្រទេសក្នុងអាស៊ាន ដើម្បីពង្រឹងគុណភាពអប់រំនៅក្នុងប្រទេសរបស់ពួកគេ”

លោក Hidetoshi Nishimura ប្រធានវិទ្យាស្ថានស្រាវជ្រាវសេដ្ឋកិច្ចសម្រាប់អាស៊ាន និងអាស៊ីបូព៌ា (ERIA) បាននិយាយថា នៅក្នុងបរិបទអាស៊ាន មានសិស្សជាច្រើន បានរងផលប៉ះពាល់ដោយការបិទសាលារៀន បរិយាកាសសិក្សាមិនអំណោយផល និងអក្ខរកម្មឌីជីថលទាប ក្នុងអំឡុងពេលជំងឺកំពុងរាតត្បាត។

លោក Hidetoshi Nishimura មើលឃើញថា ទាំងនេះ បណ្តាលឱ្យមានការបាត់បង់ការសិក្សាកើតឡើងគួរឱ្យកត់សម្គាល់ក្នុងចំណោមសិស្សភាគច្រើននៃថ្នាក់ដំបូង និងក្រុមងាយរងគ្រោះ ខណៈដែលភ័ស្តុតាងពីការវាយតម្លៃការសិក្សាថ្នាក់ជាតិនៅកម្ពុជា បានរកឃើញពីការធ្លាក់ចុះយ៉ាងខ្លាំង ហើយនិន្នាការនេះកាន់តែអាក្រក់ទៅៗក្នុងឆ្នាំ២០២១។

លោក Hidetoshi Nishimura ជឿងជាក់ថា លទ្ធផលនៃការសិក្សានេះ អាចជាមូលដ្ឋានគ្រឹះ និងធាតុចូលមួយ ដើម្បីដោះស្រាយវិបត្តិការសិក្សា និងតម្រូវការសម្រាប់ការអភិវឌ្ឍធនធានមនុស្សនៅក្នុងអាស៊ាននាពេលខាងមុខ ព្រោះសំខាន់បំផុត ការរកឃើញ និងអនុសាសន៍ ពីការសិក្សានេះ នឹងជួយប្រទេសសមាជិកអាស៊ានទាំងនោះ ក្នុងការដោះស្រាយការបាត់បង់ការសិក្សារបស់សិស្ស លើកកម្ពស់ការរួមបញ្ចូល និងគោលការណ៍សមធម៌។

គួរជម្រាបជូនថា កម្មវិធីនេះមានគោលបំណងផ្សព្វផ្សាយលទ្ធផលការសិក្សាស្រាវជ្រាវឱ្យមានលក្ខណៈទូលំទូលាយដល់គ្រប់ភាគីពាក់ព័ន្ធ ហើយគម្រោងនៃការសិក្សាស្រាវជ្រាវនេះ គឺជាការផ្តួចផ្តើមមួយក្នុងចំណោមការផ្តួចផ្តើមជាច្រើន ដែលបានធ្វើឡើងដោយក្រសួងអប់រំ យុវជន និងកីឡា ក្នុងអំឡុងកម្ពុជាធ្វើជាប្រធានអាស៊ាន ឆ្នាំ២០២២ ដែលទទួលបានថវិកាឧបត្ថម្ភដោយវិទ្យាស្ថានស្រាវជ្រាវសេដ្ឋកិច្ចសម្រាប់អាស៊ាន និងអាស៊ីបូព៌ា៕