ជំនាញក្នុងការកត់សម្គាល់អារម្មណ៍ដែលកំពុងតែកើតមាន ជំរុញឱ្យយុវវ័យមានសមត្ថភាពយល់ពីខ្លួនឯងបានប្រសើរជាងមុន ប្រតិបត្តិត្រឹមត្រូវចំពោះខ្លួនឯង ពង្រឹងទំនាក់ទនង ការសម្រេសចិត្តប្រសើរ រួមទាំងដឹងវិធីឆ្លើយតបទៅនឹងបរិបទចម្រុះ។ តាមរយៈ Kidshealth បានពន្យល់គន្លឹះប្រាំចំណុចដើម្បីជាជំនួយដល់យុវវ័យក្នុងការកត់សម្គាល់អារម្មណ៍របស់ខ្លួនឯង។

១. ចាត់ថ្នាក់ប្រភេទអារម្មណ៍ក្នុងស្ថានការណ៍នីមួយៗ ៖ ជាជំនួយដើម្បីអនុវត្តជំនាញនៃការស្វែងយល់អំពីអារម្មណ៍ខ្លួនឯង ជាពិសេសយុវវ័យ ជាដំបូងត្រូវកត់សម្គាល់ជាមុនសិន ថា តើមានអារម្មណ៍បែបណានៅពេលដែលប្រទះហេតុការណ៍ថ្មីៗ ។ សរសេរប្រភេទអារម្មណ៍ដែលអ្នកទទួលបាន ឧទាហរណ៍ដូចជា អ្នកមានអារម្មណ៍សោមនស្សនៅពេលការងារប្រព្រឹត្តទៅយ៉ាងរលូន ឬក៏អ្នកមានអារម្មណ៍ខកចិត្តនៅពេលធ្វើកិច្ចការមិនបានល្អ អ្នកមានអារម្មណ៍រីករាយនៅពេលញ៉ាំអាហារពេលថ្ងៃជាមួយមិត្ត និងមានអារម្មណ៍ភ័យខ្លាចរាល់មុនចាប់ផ្តើមការសាកល្បងថ្មីៗណាមួយ។ ការកត់សម្គាល់អារម្មណ៍ទាំងនេះ គឺជាគន្លឹះក្នុងការសង្កេតប្រភេទអារម្មណ៍នីមួយៗដែលបានកើតឡើងចំពោះខ្លួនឯង។

២. តាមដានអារម្មណ៍ជាប្រចាំ ៖ ជ្រើសរើស ប្រភេទអារម្មណ៍មួយដែលធ្វើឱ្យអ្នកយល់ថាពេញចិត្ត ហើយអនុវត្តន៍ការតាមដានជាប្រចាំ ដើម្បីឱ្យដឹងថា តើអ្នកទទួលបានអារម្មណ៍ល្អបែបនេះញឹកញាប់កម្រិតណា។ អ្នកអាចនឹងរីករាយនៅពេលរឿងល្អៗកើតឡើងចំពោះអ្នក ឬក៏សប្បាយចិត្តខ្លាំងនៅពេលដែលមិត្តរបស់អ្នកបង្ហាញវត្តមាន ឬពេលខ្លះវិញគ្រាន់តែដល់ថ្ងៃសុក្រភ្លាមអារម្មណ៍រីករាយក៏កើតមានភ្លាមៗ។ ដូច្នេះរៀងរាល់ពេលអ្នកមានអារម្មណ៍ល្អ សូមកត់សម្គាល់ និងសរសេរទុកជាប្រចាំ ហើយវិភាគរួមទាំងតាមដានឱ្យបានខ្ជាប់ខ្ជួនថា តើសប្បាយក្នុងកម្រិតធម្មតា មធ្យម ឬក្នុងកម្រិតមួយដែលខ្លាំង?

៣. រៀនពាក្យថ្មីៗពាក់ព័ន្ធនឹងប្រភេទអារម្មណ៍ ៖ រៀនពាក្យថ្មីៗគឺដើម្បីសង្កេតមើលក្នុងបែបផែន នៃការរស់នៅ តើលោកអ្នកប្រទះនឹងប្រភេទអារម្មណ៍បែបណាខ្លះ? ព្យាយាមពិចារណាចំណុចទាំងនេះឱ្យបានច្រើនដង ដែលធ្វើយ៉ាងណារិះរកវិធីក្នុងការស្គាល់អំពីប្រភេទអារម្មណ៍ឱ្យបានទូលំទូលាយ ឧទារហណ៍ដូចជា សប្បាយ ទទួលបានការរំខាន ខកចិត្ត ខឹងសម្បារ ឬព្រួយបារម្ភជាដើម។

៤. សរសេរកំណត់ហេតុអំពីអារម្មណ៍ដែលបានជួបប្រទះ ៖ ប្រើប្រាស់ពេលពីរទៅបីនាទីក្នុងមួយថ្ងៃ ដើម្បីសរសេរអំពីអារម្មណ៍ចូលទៅក្នុងកំណត់ហេតុ កំឡុងពេលសរសេរទៀតសោធត្រូវបញ្ជាក់អំពីមូហេតុដែលបណ្តាលឱ្យកើតមានអារម្មណ៍ទាំងនោះឱ្យបានជាក់លាក់។ សរសេរ អំពីអារម្មណ៍ដែលបានជួបប្រទះ គឺជាកត្តាដែលជំរុញឱ្យលោកអ្នកកាន់តែយល់ច្បាស់អំពីស្ថានភាពផ្លូវចិត្ត នៃខ្លួន​ឯងបានប្រសើរជាងមុន។ ហើយរបៀបនៃការសរសេរ គឺអាចកែច្នៃបង្កើតឱ្យមានជាសិល្បៈតាមរយៈការតាក់តែងកំណាព្យ បង្កើតជាពាក្យជួនមានឃ្លោងឃ្លា ឬជាការបង្ហើរពាក្យពេចន៍ជាផ្ទួនរណ្តំទៅជាបទភ្លេង ឬបទចម្រៀង ដើម្បីបញ្ចេញអារម្មណ៍ដែលខ្លួនកំពុងតែកើតមាន។

៥. កត់សម្គាល់អារម្មណ៍តាមរយៈសិល្បៈដែលមានស្រាប់ ៖ ត្រង់ចំណុចនេះគឺមានន័យថា ផ្ទៀងផ្ទាត់អារម្មណ៍ទៅនឹងសិល្បៈដែលមានស្រាប់ តាមរយៈសិល្បៈករដទៃដែលបានធ្វើរួចហើយតាមយៈចម្រៀងក្ដី ភាពយន្តក្ដី ឬសិល្បៈដទៃទៀត គឺត្រូវដឹងថា តើអ្នកមានការឆ្លើយតបបែបណានៅពេលដែលបានស្តាប់ ឬទស្សនាការបញ្ចេញអារម្មណ៍ក្នុងសិល្បៈដែលមានស្រាប់ទាំងនោះ។

សូមជម្រាបជូនថា ការចំណាយពេលកត់សម្គាល់អារម្មណ៍ខ្លួនឯង គ្រាន់តែដឹងថា តើអ្នកមានអារម្មណ៍បែបណា? និងទទួលយកអារម្មណ៍ដែលកើតមានដោយគ្មានការវិនិច្ឆ័យអ្វីទាំងអស់ និងប្រតិបត្តិតែទង្វើទាំងឡាយណាដែលនាំទៅរកផលវិជ្ជមាន។

រំឮកខ្លួនឯងរឿយៗ នូវអារម្មណ៍ប្រួលប្រែដែលកើតមានចំពោះខ្លួនឯងថា ភាពមិនទៀងទាត់ទាំងនេះគឺធម្មជាតិនៃមនុស្ស។ ដូច្នេះពេលប្រសព្វនឹងអារម្មណ៍ដែលខុសពីការរំពឹងទុក សូមកុំទោមនស្សខ្លាំងពេក ប៉ុន្តែអ្វីដែលគួតែយកចិត្តទុកដាក់ គឺការរៀនសូត្រពីរបៀបឆ្លើយតបនឹងអារម្មណ៍ប្រកបដោយសតិដឹងត្រូវ ឬក៏ភាពវិជ្ជមាន។ ហើយពេលដែលបានកត់សម្គាល់អារម្មណ៍ខ្លួនឯងជារឿយៗ សុទ្ធសឹងតែជាគន្លឹះក្នុងការត្រៀមខ្លួនដោះស្រាយនឹងអារម្មណ៍ដែលកើតមាននៅពេលខាងមុខ៕