ក្នុងជំនួបពិភាក្សាការងារជាមួយលោក Michael Bowers ប្រធានកម្មវិធីនៃអង្គការរូមធូរីដសកលលោក កាលពីពេលថ្មីៗនេះ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា បានស្នើអង្គការរូមធូរីដជួយវាយតម្លៃការអនុវត្តកញ្ចប់សម្ភារៈអំណានថ្នាក់ដំបូង និងគាំទ្រដំណើរការបណ្ណាល័យនៅតាមគ្រឹះស្ថានបណ្តុះបណ្តាលគ្រូ។

ឯកឧត្តមបណ្ឌិតសភាចារ្យ ហង់ជួន ណារ៉ុន មានប្រសាសន៍ថា ក្រសួងអប់រំបានអភិវឌ្ឍកញ្ចប់សម្ភារៈអំណានថ្នាក់ដំបូង ផ្អែកតាមបទពិសោធនៃការអនុវត្តរបស់អង្គការរូមធូរីដ។ ក្នុងនោះឯកឧត្តមបណ្ឌិតសភាចារ្យ បានថ្លែងអំណរគុណដល់អង្គការរូមធូរីដ ដែលបានជួយដល់ការលើកកម្ពស់អំណានថ្នាក់ដំបូង និងគាំទ្រដល់ការគ្រប់គ្រងនិងដំណើរការបណ្ណាល័យនៅតាមសាលាបឋមសិក្សាគោលដៅនាពេលកន្លងមក។

ជាការឆ្លើយតប ប្រធានកម្មវិធី នៃអង្គការ​រូមធូរីដ លើក​ឡើងថា ចាប់តាំងពីឆ្នាំ២០១៨មក អង្គការរូមធូរីដបានចូលរួមជាមួយក្រសួងអប់រំ យុវជន និងកីឡា និងរាជរដ្ឋាភិបាលកម្ពុជា ក្នុងការអនុវត្តកម្មវិធីអំណាន និងកម្មវិធីអប់រំកុមារី ចំណាយទឹកប្រាក់ជិត២០លានដុល្លារសហរដ្ឋអាមរិក។ ហើយអង្គការរូមរីដ សូមទទួលយកនូវសំណូមពររបស់ឯកឧត្តមបណ្ឌិតសភាចារ្យ និងបានប្តេជ្ញាបន្តគាំទ្រដល់ការលើកកម្ពស់អំណាននៅកម្ពុជា។ ទន្ទឹមនោះ លោក Micheal Bowers បានប្រគល់សៀវភៅជាខេមរៈភាសាចំនួនជាង១២ម៉ឺនក្បាលនិង សៀវភៅជាភាសាអង់គ្លេសចំនួនជាង៨៣  ម៉ឺនក្បាលដល់ក្រសួងអប់រំផងដែរ។

ក្នុងនាមរាជរដ្ឋាភិបាលកម្ពុជា និងជាការថ្លែងអំណរគុណ ឯកឧត្តមបណ្ឌិតសភាចារ្យឧបនាយករដ្ឋមន្ត្រី ក៏បានផ្តល់នូវគ្រឿងឥស្សរិយយសមុនីសារាភ័ណ្ឌ ថ្នាក់មហាសេរីវឌ្ឍនា ជូនលោក Michael Bowers ទទួលជំនួស  Dr. Geetha Murali និងថ្នាក់ដឹកនាំអង្គការរូមធូរីដប្រចាំប្រទេសកម្ពុជាចំនួន ៤រូបទៀតផងដែរ។

លោក ជា វ៉ាន់ថា នាយកប្រចាំប្រទេសរបស់អង្គការរូមធូរីដកម្ពុជា មានប្រសាសន៍ថា លោកមានសេចក្ដីរីករាយ និងរំភើបជាអនេកដែលអ្នកដឹកនាំនៃអង្គការរូមធូរីដចំនួន៥រូបបានទទួលនូវគ្រឿងឥស្សរិយយសមុនីសារាភ័ណ្ឌ ថ្នាក់មហាសេរីវឌ្ឍនា ពីព្រះមហាក្សត្រនៃព្រះរាជាណាចក្រកម្ពុជា តាមរយៈឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា។

នាយកប្រចាំប្រទេសរបស់អង្គការរូមធូរីដកម្ពុជា បញ្ជាក់ថា ការទទួលនូវគ្រឿងឥស្សរិយយសមុនីសារាភ័ណ្ឌ ថ្នាក់មហាសេរីវឌ្ឍនានេះ បានឆ្លុះបញ្ចាំងពីការទទួលស្គាល់ និងអំណរគុណដល់ស្នាដៃអ្នកដឹកនាំរបស់អង្គការរូមធូរីដ និងក្រុមការងារទាំងអស់ រួមទាំងសមិទ្ធផលសំខាន់ៗដែលជាសមិទ្ធផលរួមរបស់អង្គការរូមធូរីដតាមរយៈភាពជាដៃគូក្នុងការអនុវត្តកម្មវិធីតអំណាន និងកម្មវិធីអប់រំកុមារក្នុងរយៈពេលជាង២០ឆ្នាំកន្លមកនេះ។

លោក ជា វ៉ាន់ថា មានប្រសាសន៍ថា ជាផលវិជ្ជមានដល់កុមារបានជាង ២លាន២សែននាក់ ក្នុងនោះមានកុមារីកម្រិតមធ្យមសិក្សាជាង ២ម៉ឺន១ពាន់នាក់ផងដែរ បានទទួលផលជាវិជ្ជមាននេះក្នុងខេត្តគោលដៅចំនួន៧ខេត្ត។ លើសពីនេះ ជួយសាងសង់ និងជួសជុលអគារសិក្សា និងបណ្ណាល័យចំនួន៣៣០។ ក្នុងរយៈពេល៥ឆ្នាំចុងក្រោយនេះ អង្គការរូមធូរីដបានគាំទ្រថវិកាតាមរយៈកម្មវិធីអំណានប្រហែល ២០លានដុល្លារអាមេរិក ។ ក្នុងឆ្នាំ២០២២ អង្គការរូមធូរីដកម្ពុជាមានកិត្តិយសទទួលបានរង្វាន់យូណេស្កូសកលសម្រាប់ការលើកកម្ពស់ស្នាដៃការអប់រំកុមារី និងស្ត្រី។

«នេះជាលើកទី១ហើយដែលកម្ពុជាបានទទួលពានរង្វាន់យូណេស្កូ ដែលពីមុនឡើងមិនធ្លាប់ទទួលបាននៅឡើយទេ វាអាចឆ្លុះបញ្ជាំងអំពីការងារអប់រំកុមារី និងស្រីតាមរយៈសម្បទានយេនឌ័រ តាមរយៈការសហការគ្នាជាមួយក្រសួងអប់រំ ធ្វើឱ្យសម្រេចស្នាដៃល្អជាច្រើនក្នុងប្រទេសកម្ពុជា»

លោក ជា វ៉ាន់ថា នាយកប្រចាំប្រទេសរបស់អង្គការរូមធូរីដកម្ពុជា

លោក ជា វ៉ាន់ថា បន្តថា នៅក្នុងផែនការយុទ្ធសាស្រ្តរបស់អង្គការរូមធូរីដ មានការប្ដេជ្ញាចិត្តចូលរួមគាំទ្រក្រសួងអប់រំ យុវជន និងកីឡារយៈពេលយូរអង្វែងតាមរយៈការពង្រឹងគុណភាពអប់រំ តាមរយៈអំណាននៅក្នុងថ្នាក់រៀន និងអំណាននៅក្នុងបណ្ណាល័យដែលជាមូលដ្ឋានគ្រឹះដ៏រឹងមាំសម្រាប់ការរីកលូតលាស់របស់កុមារនៅតាមបឋមសិក្សាក៏ដូចជាមធ្យមសិក្សា។ ជាពិសេស ដើម្បីសិស្សទទួលបានអ្វីដែលជោគជ័យនៅក្នុងជីវិតសិក្សារបស់ពួកគេផងដែរ ។ ក្នុងនោះក៏ប្ដេជ្ញាជួយឱ្យកុមារនៅមធ្យមសិក្សាទទួលបានបំណិនទន់ ដើម្បីឱ្យពួកគេអាចបញ្ចប់ការសិក្សាដោយទទួលជោគជ័យ ក្នុងនោះគេអាចបន្តការសិក្សានៅថ្នាក់ឧត្តមសិក្សា ដើម្បីទទួលបានជីវិតមួយដ៏រុងរឿងផងដែរ។​

បើតាមនាយកប្រចាំប្រទេសរបស់អង្គការរូមធូរីដកម្ពុជា ការប្ដេជ្ញាចិត្តក្នុងរយៈពេល៣ឆ្នាំខាងមុន បានត្រៀមថវិកាប្រហែលជា១១លានដុល្លារអាមេរិក ដើម្បីយកមកអនុវត្តលើកម្មវិធីអំណាន កម្មវិធីអប់រំកុមារី និងពង្រឹងទៅលើប្រព័ន្ធអប់រំ គុណភាពរៀន និងបង្រៀនតាមសាលាគោលដៅដោយផ្ដោតសំខាន់លើលទ្ធផលសិក្សារបស់សិស្ស។ អង្គការរូបធូរីដ ជាដៃគូយ៉ាងជិតស្និទ្ធជាមួយក្រសួងអប់រំ គ្រប់លំដាប់ថ្នាក់ទាំងជាតិ និងថ្នាក់ខេត្ត ជាពិសេសថ្នាក់សាលារៀន ថ្នាក់សហគមន៍ និងមានការចូលរួមពីអាណាព្យាបាលសិស្ស។ ក្នុងនោះ ថវិកានឹងយកទៅពង្រឹង និងពង្រីកសាលាគោលដៅចំនួន១ពាន់បន្ថែម ហើយកិច្ចការដែលចូលរួមលើកកម្ពស់ការអប់រំ នឹងរួមចំណែកផ្លាស់ប្ដូរពិភពលោកគឺចាប់ផ្ដើមពីកុមារទទួលបានការអប់រំដែលមានគុណភាព៕