ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
«នៅក្នុងសង្គមដ៏មមាញឹកនាពេលបច្ចុប្បន្ន ការរត់ប្រណាំងនឹងការងារ ការសិក្សា និងកាតព្វកិច្ចប្រចាំថ្ងៃ បានធ្វើឱ្យមនុស្សជាច្រើនធ្លាក់ក្នុងស្ថានភាពស្ត្រេសខ្លាំង តានតឹង និងហត់នឿយស្មារតីដោយមិនដឹងខ្លួន។ ប្រសិនបើអ្នកកំពុងមានអារម្មណ៍ថាណែនទ្រូង គិតច្រើន រហូតដល់បាក់កម្លាំងចិត្ត សូមដាស់តឿនខ្លួនឯងថា វាដល់ពេលដែលត្រូវដកឃ្លាសម្រាកហើយ។
ផ្លូវចិត្តរបស់អ្នកក៏ដូចជារាងកាយដែរ ពេលវាឈឺ ឬហត់ វាទាមទារការមើលថែ និងព្យាបាលដោយក្តីស្រឡាញ់។ មិនបាច់ចំណាយលុយច្រើន ឬធ្វើរឿងស្មុគស្មាញនោះទេ ថ្ងៃនេះយើងសូមណែនាំនូវវិធីសាស្ត្រសាមញ្ញៗ និងងាយៗបំផុត ដែលអ្នកអាចធ្វើបានភ្លាមៗក្នុងរយៈពេលត្រឹមតែ ១ថ្ងៃ ដើម្បីជួយរំសាយភាពតានតឹង រក្សាភាពស្ងប់ក្នុងចិត្ត និងសាកថ្មជីវិតឱ្យមានថាមពលឡើងវិញ។
១. បិទទូរស័ព្ទ ឬដកឃ្លាពីបណ្តាញសង្គមខ្លះ (Digital Detox)
ការតាមដានមើលហ្វេសប៊ុក (Facebook), ទីកតុក (TikTok) ឬការតបឆាតរឿងការងារមិនចេះចប់ ធ្វើឱ្យខួរក្បាលយើងរវល់ និងតានតឹងពេញមួយថ្ងៃ។ សាកល្បងដាក់ទូរស័ព្ទចុះ ឬបិទអ៊ីនធឺណិត (Wi-Fi) ក្នុងមួយថ្ងៃឱ្យបាន ២ ទៅ ៣ដង ដោយម្តងៗទុកពេល ១ម៉ោងទៅ ១ម៉ោងកន្លះ ដើម្បីឱ្យខួរក្បាលបានសម្រាកពិតប្រាកដ។
២. ទៅរកធម្មជាតិ បៃតងៗ
ធម្មជាតិមានថាមពលជួយលួងលោមចិត្តយើងយ៉ាងអស្ចារ្យ។ អ្នកមិនបាច់ធ្វើដំណើរទៅណាឆ្ងាយដល់ក្នុងព្រៃនោះទេ គ្រាន់តែដើរលេងក្នុងសួនច្បារជិតផ្ទះ អង្គុយលេងក្រោមដើមឈើត្រជាក់ៗ ឬមើលផ្កា រួចដកដង្ហើមវែងៗ។ ពេលទៅដល់ ព្យាយាមកុំដកទូរស័ព្ទមកថតរូប ឬស្តាប់កាសអី គឺទុកត្រចៀកស្តាប់សំឡេងខ្យល់ សំឡេងស្លឹកឈើ និងមើលសម្រស់ធម្មជាតិជុំវិញខ្លួនវិញ។
៣. ធ្វើចលនារាងកាយ ឬហាត់ប្រាណស្រាលៗ
ពេលយើងធ្វើចលនា រាងកាយនឹងបញ្ចេញសារធាតុគីមីម្យ៉ាងដែលធ្វើឱ្យយើងមានក្តីសុខ និងកាត់បន្ថយភាពស្រ្តេស។ អ្នកអាចសាកល្បង ដូចជា ដើរយឺតៗជុំវិញភូមិ ឬក្នុងបុរី, រាំលេងតាមបទចម្រៀងដែលចូលចិត្តនៅក្នុងបន្ទប់, ធ្វើ យោគៈ ឬលាតសន្ធឹងដៃជើងស្រាលៗ (មិនមែនបង្ខំខ្លួនឯងឱ្យហត់ខ្លាំងនោះទេ)។
៤. អង្គុយគិតឡើងវិញពីអ្វីដែលខ្លួនឯងចង់បាន
ជារឿយៗ យើងស្ត្រេសដោយសារយើងរវល់ធ្វើរឿងដែលយើងមិនចូលចិត្ត ឬត្រូវទទួលរងសម្ពាធពីអ្នកដទៃខ្លាំងពេក។ សាកល្បងយកសៀវភៅមកកត់ត្រា ឬអង្គុយគិតស្ងាត់ៗម្នាក់ឯង «តើរឿងអ្វីខ្លះដែលធ្វើឱ្យយើងហត់នឿយ ហើយយើងគួររៀនបដិសេធខ្លះ?» ឬ «តើជីវិតបែបណាដែលយើងរស់នៅទៅមានក្តីសុខពិតប្រាកដ?»។
៥. ធ្វើអ្វីដែលប្លែក និងសប្បាយៗ (បញ្ចេញភាពច្នៃប្រឌិត)
កុំធ្វើការងារដែលត្រូវប្រកួតប្រជែង ឬចង់បានចាញ់ឈ្នះអី។ ក្នុងថ្ងៃសម្រាកនេះ គួរធ្វើអ្វីដែលខ្លួនឯងចូលចិត្ត និងធ្វើទៅសប្បាយចិត្ត ដូចជា ៖ ចូលផ្ទះបាយធ្វើម្ហូប ឬដុតនំញ៉ាំខ្លួនឯង, គូររូប ផាត់ពណ៌លេង, ដាំដើមឈើ រៀបចំផ្កា ឬលេងតន្ត្រី។
៦. ជួបជុំមនុស្សដែលយើងស្រឡាញ់ និងផ្តល់កម្លាំងចិត្ត
ការបាននៅក្បែរ ញ៉ាំបាយជុំគ្នា ឬជជែកគ្នាលេងជាមួយឪពុកម្តាយ បងប្អូន ឬមិត្តភក្តិជិតស្និទ្ធដែលយល់ចិត្តយើង គឺជារឿងដ៏មានតម្លៃ។ មិនបាច់ជួបមនុស្សច្រើននាំតែហត់ទេ ជួបតែមនុស្ស ១នាក់ ឬ ២នាក់ដែលស្តាប់យើងដោយក្តីស្រឡាញ់ ត្រឹមតែ ១ម៉ោង ក៏ជួយឱ្យយើងកក់ក្តៅចិត្តដែរ។
៧. ធ្វើរឿងសាមញ្ញៗដែលជួយឱ្យខ្លួនឯងមានក្តីសុខ (Self-Care)
ការមើលថែខ្លួនឯង មិនមែនទាល់តែចំណាយលុយច្រើនទៅកន្លែងម៉ាស្សា ឬស្ប៉ាទំនើបៗនោះទេ។ រឿងសាមញ្ញៗនៅផ្ទះក៏ជួយបានច្រើនដែរ ដូចជា ងូតទឹកក្ដៅឧណ្ហៗឱ្យស្រឡះខ្លួន, ស្តាប់បទចម្រៀង ឬស្តាប់រឿងរ៉ាវអប់រំចិត្ត, អុជធូបក្រអូប ឬទៀនក្រអូបក្នុងបន្ទប់, អង្គុយមើលពពកនៅលើមេឃ ឬសរសេររឿងរ៉ាវដែលយើងចង់អរគុណក្នុងជីវិត។
៨. សម្រាក និងដេកឱ្យបានឆ្អែត
ការសម្រាកពិតប្រាកដ មិនមែនជាការដេកចុចទូរស័ព្ទមើលរឿងភាគរាប់ម៉ោងនោះទេ ព្រោះវាកាន់តែធ្វើឱ្យភ្នែក និងខួរក្បាលយើងហត់លើសដើម។ ការសម្រាកដ៏ល្អ គឺការដេកថ្ងៃមួយភាំងដោយគ្មានការរំខាន បិទភ្នែកដកដង្ហើមវែងៗ ឬអង្គុយស្ងៀមៗ ២០នាទី ដោយមិនគិតខ្វល់ពីការងារអ្វីទាំងអស់។
៩. ធ្វើអំពើល្អ ឬចែករំលែកទៅកាន់អ្នកដទៃ
ការធ្វើរឿងល្អៗតូចតាចសម្រាប់អ្នកដទៃ ជួយឱ្យចិត្តយើងជ្រះថ្លា និងមានក្តីសុខឡើងវិញ។ អ្នកអាចសាកល្បងផ្ញើសារទៅសួរសុខទុក្ខ និងអរគុណអ្នកដែលមានគុណលើអ្នក ឬធ្វើទាន និងជួយកិច្ចការបន្តិចបន្តួចដល់អ្នកជុំវិញខ្លួនតាមលទ្ធភាព។
១០. ជួបពិភាក្សាជាមួយគ្រូពេទ្យ ឬអ្នកជំនាញចិត្តសាស្ត្រ
ប្រសិនបើអ្នកមានអារម្មណ៍ថា ពិបាកចិត្តខ្លាំង ណែនទ្រូង ចង់តែយំ ឬគិតច្រើនរហូតគេងមិនលក់ច្រើនថ្ងៃ ហើយមិនដឹងត្រូវដោះស្រាយតាមណាទេ ការប្រើប្រាស់ថ្ងៃសម្រាកនេះទៅជួបពិភាក្សាជាមួយគ្រូពេទ្យចិត្តសាស្ត្រ គឺជាជម្រើសដ៏ល្អបំផុត។ គ្រូពេទ្យនឹងជួយស្តាប់ និងរកវិធីជួយសម្រាលទុក្ខធុរៈរបស់អ្នកបានចំគោលដៅ៕
