ក្នុងកម្មវិធីអបអរសាទរ ខួបទី២៥ នៃទិវាអន្តរជាតិសម្រាប់យុវជន ក្រោមមូលបទ៖ ” នវានុវត្តន៍ផ្នែកឌីជីថលរបស់យុវជនសម្រាប់ការអភិវឌ្ឍប្រកបដោយចីរភាព” នាព្រឹកថ្ងៃទី០៨ ខែសីហា​ ឆ្នាំ២០២៤ លោកជំទាវ គឹម សេដ្ឋានី រដ្ឋលេខាធិការប្រចាំការក្រសួងអប់រំ យុវជន និងកីឡា មានប្រសាសន៍ថា កម្ពុជាមានយុវជនជាង៣០% ស្មើ ១ភាគ៣នៃប្រជាជនកម្ពុជាសរុប ដែលជាសក្កដានុពលសំខាន់ក្នុងការអភិវឌ្ឍសេដ្ឋកិច្ច និងសង្គម និងជាអ្នកបន្តវេនក្នុងការដឹកនាំប្រទេស។

លោកជំទាវ គឹម សេដ្ឋានី បញ្ជាក់បន្ថែមថា កម្ពុជាជា​ប្រទេស​មានអំណោយផលដែលមានធនធានជាយុវជនមានចំនួនច្រើន អាចចូលរួមយ៉ាងសកម្មក្នុងការរួមចំណែកអភិវឌ្ឍប្រទេសជាតិ។ លោកជំទាវបន្តថា បើទោះជាបច្ចុប្បន្ននេះ ប្អូនសិស្សានុសិស្សមិនទាន់ទទួលបានការអភិវឌ្ឍឱ្យក្លាយជាធនធានមនុស្សពេញលេញ ឬជាជនមានពិការភាព ប៉ុន្តែប្អូនៗសិស្សានុសិស្សនៅតែមានឱកាសក្នុងការអភិវឌ្ឍខ្លួនឯង ហើយអាចប្រែក្លាយខ្លួនឯងទៅជាមូលធនមនុស្សដ៏សំខាន់របស់កម្ពុជា។

រដ្ឋលេខាធិការប្រចាំការក្រសួងអប់រំ បញ្ជាក់បន្ថែមថា មូលធនមនុស្ស គឺជាមនុស្សដែលមានសមត្ថភាពទាំងចំណេះដឹងផ្នែករឹង ចំណេះដឹងផ្នែកទន់ ដែលមានសក្តានុពលឆ្លើយតបតម្រូវការទីផ្សារ ពលកម្ម ការប្រកួតប្រជែងក្នុងតំបន់ និងពិភពលោក ដើម្បីសម្រេចចក្ខុវិស័យរបស់កម្ពុជានៅឆ្នាំ២០៣០។

លោកជំទាវ គឹម សេដ្ឋានី បន្ថែមថា ទិវាយុវជន ឆ្នាំនេះ ផ្ដោតលើនវានុវត្តឌីជីថលរបស់យុវជនសម្រាប់ការអនុវត្តប្រកបដោយចីរភាព។ ពាក្យស្លោកនេះ បង្ហាញពីការទទួលស្គាល់របស់ពិភពលោកនៃអន្តរកម្មរវាងយុវជនជាមួយបច្ចេកវិទ្យាឌីជីថល។ ក្នុងនោះវ័យដែលមានអន្តរកម្ម វ័យដែលសកម្ម និងវ័យដែលប្រើប្រាស់បច្ចេកវិទ្យាឌីចីថលច្រើនជាងគេ គឺយុវជន។ ហេតុនេះ ប្រធានបទផ្ដោតលើតួនាទីយុវជនក្នុងសម័យឌីជីថល ដើម្បីឱ្យយុវជនចូលរួមស្វែងរកដំណោះស្រាយដែលពិភពលោកកំពុងប្រឈម រួមមាន​ បម្រែបម្រួលអាកាសធាតុ គ្រោះរាំងស្ងួត ទឹកជំនន់ ខ្យល់ព្យុះ ការកើនកម្ដៅ និងបញ្ហាបរិស្ថានជាច្រើន ដែលយើងត្រូវធ្វើយ៉ាងណាឱ្យយុវជនក្លាយជាផ្នែកមួយដើម្បីចូលរួមថែរក្សាបរិស្ថាន ចូលរួមដោះស្រាយការបម្រែបម្រួលអាកាសធាតុ រក្សាសន្តិភាពពិភពលោក ដើម្បីឈានទៅសម្រេចគោលដៅអភិវឌ្ឍប្រកបដោយចីរភាពរបស់កម្ពុជា។

«យុវជនដែលមានអាយុពីចន្លោះ១៥ ដល់២៤ឆ្នាំ ជាអ្នកប្រើប្រាស់អ៊ីនធឺណិតច្រើនជាងគេ ហើយយុវជនជាភ្នាក់ងារក្នុងការនាំឱ្យមានការផ្លាស់ប្ដូរក្នុងការប្រើប្រាស់បច្ចេកវិទ្យា ដើម្បីដោះស្រាយបញ្ហាសង្គម និងអភិវឌ្ឍប្រទេសជាតិ»។

លោកជំទាវ គឹម សេដ្ឋានី រដ្ឋលេខាធិការប្រចាំការក្រសួងអប់រំ យុវជន និងកីឡា

រដ្ឋលេខាធិការប្រចាំការក្រសួងអប់រំ បន្ថែមទៀតថា របៀបវារៈ នៃទិវាយុវជន ឆ្នាំនេះ បានផ្ដោតទៅលើការគៀរគរធនធាន និងការវិនិយោគទៅលើកម្មវិធីសម្រាប់ការអភិវឌ្ឍយុវជន ការបង្កើតការងារ ដើម្បីផ្ដល់ឱកាសដល់យុវជនឱ្យចូលរួមហ្វឹកហ្វឺនការងារ និងផ្ដល់ឱកាសនិងសិទ្ធិអំណាចដោយផ្ទាល់ដល់យុវជន អាចអភិវឌ្ឍខ្លួនឯងបាន ដើម្បីក្លាយជាអ្នកដឹកនាំប្រទេស និងនាំមកនូវសន្តិភាពដល់ពិភពលោកទាំងមូល។

យ៉ាងណាក៏ដោយ អគ្គនាយកដ្ឋានយុវជន នៃក្រសួងអប់រំ​យុវជន​និងកីឡា ក៏បានរៀបចំឱ្យមានកម្មវិធីផ្សេងជាច្រើន រួមមាន កម្មវិធីនិយាយជាសាធារណៈ កម្មវិធីជជែកដេញដោលយុវជនថ្នាក់ជាតិ ដែលផ្ដល់ឱកាសដល់យុវជនបង្កើនសមត្ថភាព និងអភិវឌ្ឍខ្លួនឯង ហើយសុទ្ធតែបានឆ្លើយតបទៅនឹងគោលបំណងនៃទិវាយុវជនអន្តរជាតិ។

គួរជម្រាបជូនថា ទិវាអន្តរជាតិសម្រាប់យុវជន ត្រូវបានប្រារព្ធជារៀងរាល់ឆ្នាំនៅថ្ងៃទី១២ ខែសីហា។ ចាប់តាំងពីឆ្នាំ១៩៩៩ នៅពេល​ដែល​មហាសន្និបាត​អង្គការសហប្រជាជាតិ​បាន​អនុម័ត​អនុសាសន៍​ដោយសន្និសីទ​ពិភពលោក​របស់​រដ្ឋមន្រ្តីយុវជន ដើម្បីប្រកាស​នៅថ្ងៃទី១២ សីហា ថា ជាទិវាអន្តរជាតិសម្រាប់យុវជន ហើយ​កាលបរិច្ឆេទនេះ គឺជា​ការ​រំលឹក​ដ៏​មាន​អានុភាព​ចំពោះ​តួនាទី​ដ៏​សំខាន់​របស់យុវជន​ក្នុងការ​បង្កើត​អនាគត​ប្រកប​ដោយ​ចីរភាព៕