មជ្ឈមណ្ឌលសិក្សាឌីជីថលជប៉ុនកំពុងក្លាយជាថ្នាក់រៀនជំនាញសតវត្សទី២១ ជួយពង្រឹងសមត្ថភាពមុខវិជ្ជាស្ទែម (STEM) ដល់កុមារកម្ពុជា ប្រមាណ ១៥០០នាក់ក្នុងសាលាបឋមសិក្សាព្រះនរោត្តម នៅរាជធានីភ្នំពេញ ។ សិស្សានុសិស្សនៅទីនេះ ទទួលបានឱកាសសិក្សាបច្ចេកវិទ្យាឌីជីថលដែលមានលំនាំអប់រំពីប្រទេសជប៉ុន ។ ភាគីពាក់ព័ន្ធជឿជាក់ថា មជ្ឈមណ្ឌលសិក្សាឌីជីថលជប៉ុននឹងចូលរួមចំណែកយ៉ាងសំខាន់ដល់ការកសាងធនធានមនុស្សកម្ពុជា ។

លោក ជ្រីន សាលី នាយកសាលាបឋមសិក្សាព្រះនរោត្តម បានឱ្យដឹងថា មជ្ឈមណ្ឌលសិក្សាឌីជីថលជប៉ុន បានបង្កើតឡើងក្រោមកិច្ចសហប្រតិបត្តិការរវាងសាលារដ្ឋ និងក្រុមហ៊ុនឯកជនជប៉ុន ក្រោមការទទួលស្គាល់របស់ JICA និងក្រសួងអប់រំ យុវជន និងកីឡា ។ ស្របជាមួយគ្នានេះ សិស្សានុសិស្សនឹងរីករាយជាមួយបច្ចេកវិទ្យាអប់រំពីប្រទេសជប៉ុន ពិសេសថ្នាក់សិក្សាកុំព្យូទ័របំប៉នបន្ថែមជាមួយកម្មវិធី Think Think (សម្រាប់កុមារអាយុចាប់ពី៤ ដល់ ១២ឆ្នាំ) ដែលជាកម្មវិធីសិក្សាឌីជីថលលេខ១ ពីប្រទេសជប៉ុន ដើម្បីអភិវឌ្ឍន៍ការគិតរបស់កុមារឱ្យកាន់តែស៊ីជម្រៅនៅក្នុងបំណិនសតវត្សទី២១ ។

គណៈគ្រប់គ្រងសាលាបឋមសិក្សាព្រះនរោត្តម បានបញ្ជាក់បន្ថែមថា សិស្សអាចចូលរៀនថ្នាក់ឌីជីថលនៅមជ្ឈមមណ្ឌលសិក្សាឌីជីថលជប៉ុន រួមមាន កម្មវិធីកុំព្យូទ័រ Microsoft Office, ការសេរកម្មវិធីប្រភេទ Scratch, កម្មវិធីគណិតវិទ្យា Think! Think ដែលបានទទួលស្គាល់ជាកម្មវិធីដែលមានប្រសិទ្ធភាពបំផុតនៅលើពិភពលោកដោយ APEC ។ ជាមួយគ្នានេះ ក្រសួងអប់រំ យុវជន និងកីឡា បានដាក់ឱ្យប្រើប្រាស់កម្មវិធី Think! Think! ចាប់តាំងពីឆ្នាំ២០១៨ តាមរយៈទីភ្នាក់ងារជប៉ុនប្រចាំប្រទេសកម្ពុជា JICA ។

សាលាបឋមសិក្សាព្រះនរោត្តមបានក្លាយជាសាលារៀនរដ្ឋទី១ ដែលក្រសួងអប់រំ យុវជន និងកីឡា សម្រេចដាក់ឱ្យដំណើរការមជ្ឈមណ្ឌលសិក្សាឌីជីថលទំនើបក្នុងគោលបំណងផ្ដល់ចំណេះដឹង និងជំនាញស្ទែមបន្ថែមជូនដល់កុមារតូចៗ សម្រាប់កម្រិតបឋមសិក្សាឱ្យកាន់តែមានប្រសិទ្ធភាពខ្ពស់ ព្រមទាំងឆ្លើយតបទៅនឹងបរិបទការអប់រំសម្រាប់សតវត្សរ៍ទី២១ នៃបដិវត្តឧស្សាហកម្មទី៤.០ ។

គួរបញ្ជាក់ថា មជ្ឈមណ្ឌលសិក្សាឌីជីថលជប៉ុនត្រូវបានសម្ពោធដាក់ឱ្យប្រើប្រាស់កាលពីព្រឹកថ្ងៃទី១៥ ខែមិថុនា ឆ្នាំ២០២៣ ដែលមានទីតាំងស្ថិតនៅក្នុងសាលាបឋមសិក្សាព្រះនរោត្តម ក្រោមវត្តមានឯកឧត្តម អ៊ុអិណុ អាត់ស៊ូសុ ឯកអគ្គរាជទូតជប៉ុនប្រចាំកម្ពុជា, ឯកឧត្តម សាន វឌ្ឍនា អនុរដ្ឋលេខាធិការក្រសួងអប់រំ យុវជន និងកីឡា, តំណាង JICA ប្រចាំកម្ពុជា, តំណាងក្រុមហ៊ុនជប៉ុនដែលជាម្ចាស់ជំនួយ, ព្រមលោកគ្រូ អ្នកគ្រូ និងសិស្សានុសិស្សជាច្រើននាក់ ៕