សម្រាប់ឆ្នាំ២០២៤នេះ កម្មវិធី Insight Tech Festival ដែលដឹកនាំរៀបចំដោយក្រុមប្រឹក្សាយុវជនឯកអគ្គរដ្ឋទូតសហរដ្ឋអាមេរិក (AYC) នឹងធ្វើឡើងនៅថ្ងៃទី១០ ខែវិច្ឆិកា ឆ្នាំ២០២៤ ខាងមុខនេះ នៅ Factory Phnom Penh ដើម្បីផ្តល់ការយល់ដឹងដល់សិស្សានុសិស្សដែលមានចំណង់ចំណូលចិត្តផ្នែកបច្ចេកវិទ្យា អំពីជីវិតសិក្សនៅសាកលវិទ្យាល័យ ព្រមទាំងអាជីពការងារក្នុងឧស្សាហកម្ម បច្ចេកវិទ្យា នាពេលអនាគតផងដែរ។

កម្មវិធី Insight Tech Festival នឹងធ្វើឡើងរយៈពេលមួយថ្ងៃពេញពីម៉ោង ៩ព្រឹកដល់ម៉ោង ៥ល្ងាចដែលរួមមានសកម្មភាពសំខាន់ៗជាច្រើនដូចជា ការចែករំលែកចំណេះដឹង បទពិសោធន៍ពីអ្នកជំនាញឱ្យ​កាន់តែស៉ីជម្រៅទាក់ទងទៅលើការងារនៅក្នុងវិស័យបច្ចេកវិទ្យា កិច្ចពិភាក្សាតុមូលអំពីនិន្នាការបច្ចេកវិទ្យានាពេលអនាគតដែលលើសពីបញ្ញាសិប្បនិម្មិត (AI) និងការចែករំលែកព័ត៌មានពីអាហារូបករណ៍ក៏ដូចជា ការបង្ហាញពីគ្រឹះស្ថានសិក្សារដ្ឋ និងឯកជនពីកម្មវិធីសិក្សាដែលជួយសិស្សានុសិស្សដែលទើបបញ្ចប់ថ្នាក់វិទ្យាល័យអាចស្វែងយល់អំពីជម្រើសនៃការសិក្សា នៅថ្នាក់ឧត្តមសិក្សា។

កញ្ញា គន្ធ មណីរ័ត្ន ជាអ្នកសម្របសម្រួលកម្មវិធី Insight Tech Festival លើកទឹកចិត្តដល់សិស្សានុសិស្ស ដែលទើបប្រឡងបាក់ឌុបរួច ឬមានចំណាប់អារម្មណ៍លើបច្ចេកវិទ្យា អញ្ជើញចូលរួមក្នុងកម្មវិធីនេះដោយថា Insight Tech Festival ជាវេទិកានៃការជួបជុំអ្នកចូលចិត្តបច្ចេកវិទ្យា អ្នកជំនាញក្នុងវិស័យបច្ចេកវិទ្យា និង អ្នកមានគំនិតច្នៃប្រឌិត ។ ដូច្នេះ អ្នកចូលរួមនឹងទទួលបានឱកាសជជែកជាមួយវាគ្មិនជាច្រើន ការចូលរួមសិក្ខាសាលា និងឱកាសជាច្រើនទៀតក្នុងការភ្ជាប់ទំនាក់ទំនងជាមួយអ្នកដែលមានចំណូលចិត្តប្រហាក់ប្រហែលគ្នា។ សម្រាប់យុវជនដែលមានបំណងចង់ចូលរួម អាចចុះឈ្មោះតាមរយៈតំណរភ្ជាប់នេះ៖ bit.ly/3NxGxEX ។

សូមបញ្ជាក់ថា កម្មវិធី Insight Tech Festival ត្រូវបានបង្កើតឡើងក្នុងគោលបំណងបំផុសស្មារតីយុវជន ជាពិសេស យុវតីកម្ពុជា ឱ្យចាប់យកជំនាញក្នុងវិស័យបច្ចេកវិទ្យា និងទទួលបានការងារដែលមានតម្រូវការខ្ពស់ក្នុងទីផ្សារការងារ។ គម្រោងនេះ គឺជាស្ពានដែលអាចកាត់បន្ថយគម្លាតឌីជីថល និងយេនឌ័រ ក្នុងវិស័យបច្ចេកវិទ្យាព័ត៌មាន ជាមួយ នឹងការលើកកម្ពស់ការយល់ដឹងបន្ថែម អំពីជំនាញសំខាន់ៗមួយចំនួនក្នុងវិស័យបច្ចេកវិទ្យា រួមមាន Web Development, App Development, Data Science, AI, and Cybersecurity ទៅកាន់សិស្សវិទ្យាល័យ និងនិស្សិតដែលទើបនឹងចាប់ផ្ដើមចូលរៀនមហាវិទ្យាល័យ ដើម្បីចូលរួមលើកកម្ពស់សេដ្ឋកិច្ចកម្ពុជា ក្នុងបរិបទនៃឧស្សាហកម្ម ៤.0៕