ក្នុងរយៈពេល៥ឆ្នាំ កម្ពុជាតាមរយៈក្រសួងការងារ និងបណ្តុះបណ្តាលវិជ្ជាជីវៈ បានបណ្តុះបណ្តាលកម្លាំងជំនាញវិជ្ជាជីវៈបានជាង២៧ម៉ឺននាក់ដើម្បីចាក់បញ្ចូលក្នុងតម្រូវការទីផ្សារការងារដ៏ទូលំទូលាយ។ នេះបើតាមរបាយការណ៍របស់ក្រសួងការងារ និង​បណ្តុះបណ្តាលវិជ្ជាជីវៈដែលអ្នកសារព័ត៌មានទទួលបានកាលពីពេលថ្មីៗនេះ។  

របាយការណ៍របស់ក្រសួងការងារ និងបណ្តុះបណ្តាលវិជ្ជាជីវៈ បានបង្ហាញថា កម្លាំងពលកម្មជំនាញ ដែលបានបញ្ចប់ការអប់រំ និងបណ្តុះបណ្តាលបច្ចេកទេស និង វិជ្ជាជីវៈ យ៉ាងតិចឬស្មើកម្រិតវិញ្ញាបនបត្របច្ចេកទេស និង វិជ្ជាជីវៈរយៈពេលខ្លី មានចំនួន ២៧ ម៉ឺននាក់ ចន្លោះឆ្នាំ ២០១៨- ២០២២។

សម្រាប់ឆ្នាំ២០២២ កម្លាំងពលកម្មជំនាញដែលបានបញ្ចប់ការអប់រំ និង បណ្តុះបណ្តាលបច្ចេកទេសនិងវិជ្ជាជីវៈ មានប្រុសចំនួន ៥៣,៧២៣ នាក់ ក្នុងនោះមានការកើនឡើង ៥,៩៨ ភាគរយ បើប្រៀបធៀបនឹងរយៈពេលដូចគ្នាកាលពីឆ្នាំ២០២១ មានចំនួន ៥០,៦៩០ នាក់។ ដោយឡែកចំនួនសិស្សស្រីវិញ មានចំនួន ១៩,៩៤៩ នាក់ ក្នុងនោះមានការថយចុះ ៩,១២ ភាគរយ បើប្រៀបធៀបនឹងរយៈពេលដូចគ្នាកាលពីឆ្នាំ ២០២១ មានចំនួន ២១,៩៥២ នាក់។

ជាមួយគ្នានេះ ចំនួនសិស្សបញ្ចប់ការបណ្តុះបណ្តាល កម្រិតសញ្ញាបត្របច្ចេកទេសនិងវិជ្ជាជីវៈកម្រិត ១,២ និង ៣ ក្នុងឆ្នាំ ២០២២ មានចំនួន ១៦,៧១៩ នាក់ ក្នុងនោះមានកើនឡើង ៦,៦៦ ភាគរយបើប្រៀបនឹងរយៈពេលឆ្នាំ ២០២១ មានចំនួន ១៥,៦៧៤ នាក់។ 

ទន្ទឹមនឹងនេះ ចំនួនសិស្សបញ្ចប់ការបណ្តុះបណ្តាលកម្រិតចាប់ពីសញ្ញាបត្រជាន់ខ្ពស់ / បរិញ្ញាបត្ររងបច្ចេកទេស ឬ ឯកទេស ក្នុងឆ្នាំ ២០២២ មានចំនួន ១២, ២៦៩ នាក់ ក្នុងនោះមានការកើនឡើង ២៤,៨២ ភាគរយ បើប្រៀបធៀបនឹងឆ្នាំ ២០២១ មានចំនួន ៩,៨២៩ នាក់។

ឯកឧត្តម កត្តា អ៊ន រដ្ឋលេខាធិការ និង​ជាអ្នកនាំពាក្យក្រសួងការងារ និង​បណ្តុះបណ្តាលវិជ្ជាជីវៈ មានប្រសាសន៍ថា ចំនួនកម្លាំងជំនាញ​ដែល​យើង​បាន​បណ្តុះបណ្តាលគឺមិនទាន់គ្រប់គ្រាន់ទៅនឹង​តម្រូវការ​កម្លាំងជំនាញ​ក្នុងទីផ្សារ​ការងារ​កម្ពុជា ដែលមានចន្លោះពី៣០ម៉ឺន ទៅ​៥០ម៉ឺននាក់ក្នុងមួយ​ឆ្នាំនោះឡើយ។

បើតាមប្រសាសន៍របស់ ឯកឧត្តម កត្តា អ៊ន គ្រាន់តែនៅក្នុងខែកញ្ញានេះ គឺមានតម្រូវការកម្លាំងពលកម្មដល់ខ្ទង់ជាង២ម៉ឺននាក់ ដូច្នេះហើយ ទើបរាជរដ្ឋាភិបាលអាណត្តិទី៧ ដាក់ចេញ​នូវផែនការសកម្មភាព​ ឱ្យ​ក្រសួងការងារ និង​បណ្តុះបណ្តាលវិជ្ជាជីវៈ ធ្វើការបណ្តុះបណ្តាលយុវជនមកពីគ្រួសារក្រីក្រ និង​ងាយរងគ្រោះ​ចំនួន​១លាន​៥សែននាក់ក្នុងរយៈពេល​៥ឆ្នាំបន្ទាប់។

សូមជម្រាបថា រាជរដ្ឋាភិបាលអណត្តិទី៧បានដាក់ចេញគោលនយោបាយបណ្តុះបណ្តាលជំនាញបច្ចេកទេស និងវិជ្ជាជីវៈដល់កម្មករ និយោជិតក្រីក្រ និងមានហានិភ័យឱ្យបានចំនួន ១លាន ៥សែននាក់ ដើម្បីអភិវឌ្ឍចំណេះជំនាញគាត់ឱ្យកាន់តែមានកម្រិតខ្ពស់ថែមទៀត ដែលពួកគាត់អាចចូលរៀនវេន្តព្រឹកនិងថ្ងៃ វេន្តយប់ និងវេន្តសៅរ៍ អាទិត្យដោយមិនបង់ប្រាក់ ហើយមានប្រាក់ឧបត្ថមថែមទៀត៕