ថ្លែងក្នុងពិធីបើកវគ្គប្រកួតជម្រុះយក ៣ក្រុម នៃកម្មវិធី “យុវជន២១ (Youth21)” ក្រោមប្រធានបទ “សហគ្រិនឌីជីថល៖ នវានុវត្តន៍អាជីវកម្ម” ឆ្នាំ២០២៣ ឯកឧត្តម សេរី ជំនះ រដ្ឋលេខាធិការក្រសួងអប់រំ យុវជន និងកីឡា លើកឡើងថា កម្មវិធីយុវជន២១ ជំរុញយុវជនអភិវឌ្ឍសមត្ថភាពខ្លួន និងរួមចំណែកគាំទ្រធុរកិច្ចថ្មីនៅកម្ពុជា។

ឯកឧត្តម សេរី ជំនះ មានប្រសាសន៍ថា ធុរកិច្ចថ្មី សំដៅដល់ស្ថាប័ន ឬដំណើរការបង្កើត និងគ្រប់គ្រងធុរកិច្ច ដែលប្រើប្រាស់នវានុវត្ត ជាស្នូលនៃការបង្កើតអាជីវកម្មរបស់ខ្លួន ក្រោមលក្ខខណ្ឌច្បាស់លាស់ និងមានហានិភ័យ ប៉ុន្តែសក្កានុពលមានការរីកចម្រើនជឿនលឿន។ ឯកឧត្តមបន្តថា តាមរយៈការប្រកួតដំបូងរហូតដល់វគ្គពាក់កណ្ដាលផ្ដាច់ព្រ័ត្រនេះ គឺជាឱកាសសម្រាប់យុវជនក្នុងការបង្ហាញនូវភាពច្នៃប្រឌិត និងភាពប៉ិនប្រសប់ក្នុងការរៀបចំផែនការអាជីវកម្ម ដើម្បីបង្កើនចំណេះដឹងនៃធុរកិច្ចថ្មី ក៏ដូចជាចូលរួមបង្ហាញទស្សនៈវិស័យ ឬទស្សនៈរបស់ខ្លួនក្នុងនាមជាយុវជនកម្ពុជា។

រដ្ឋលេខាធិការក្រសួងអប់រំ បញ្ជាក់បន្ថែមថា តាមរយៈកម្មវិធីនេះ យុវជននឹងទទួលបានឱកាសបញ្ចេញនូវទស្សនៈរបស់ខ្លួនចំពោះដំណើរនៃបរិវដ្ដកម្មឌីជីថលនៅកម្ពុជា ដោយបេក្ខជនអាចរៀបចំផែនការអាជីវកម្ម ក្នុងនាមតំណាងជាក្រុមនិស្សិត ឬគ្រឹះស្ថានសិក្សា ក្នុងន័យឆ្លុះបញ្ចាំងអំពីបញ្ហាប្រឈម និងឱកាសដែលប្រជាជនកម្ពុជាអាចទទួលបានពីការប្រើប្រាស់ថ្នាលឌីជីថល សេវាកម្ម ឬការទិញទំនិញតាមថ្នាលឌីជីថលជាដើម។

“ចក្ខុវិស័យនៃការរៀបចំកម្មវិធី គឺចង់ឃើញយុវជនកម្ពុជារបស់យើង រស់នៅតាមក្ដីសុបិន្ត គោលដៅ និងមហិចតារបស់ខ្លួន ដើម្បីឈានទៅដល់សក្កដានុពលពេញលេញ”

ឯកឧត្តម សេរី ជំនះ រដ្ឋលេខាធិការក្រសួងអប់រំ យុវជន និងកីឡា

ឯកឧត្តម សេរី ជំនះ បន្ថែមថា វគ្គប្រកួតជម្រុះយក ៣ក្រុម នៃកម្មវិធី “យុវជន២១ មិនមែនជាការកាត់សេចក្ដីអំពីអនាគត របស់បេក្ខជននោះទេ ពីព្រោះការប្រកួតប្រជែងនេះគ្រាន់តែជាការសាកល្បងនូវសមត្ថភាពរបស់ប្អូនៗ និងក្រុមរបស់ប្អូនៗប៉ុណ្ណោះ ប៉ុន្តែអ្វីដែលជាមោទនភាពពិតប្រាកដ គឺបេក្ខជនទាំង១០ក្រុមសុទ្ធតែជាក្រុមល្អៗ ជាពន្លកយុវសហគ្រិន ជាពិសេសបានចូលរួមចំណែកយ៉ាងធំធេងនៅក្នុងភាពជាគំរូដល់យុវជនផ្សេងទៀតតាមរយៈការបង្ហាញនូវសមត្ថភាព ទេពកោសល្យ និងចំណេះដឹង។

កញ្ញា ពេជ្រ ស្រីពៅ ជានិស្សិតឆ្នាំទី៣ នៃសាកលវិទ្យាល័យអន្តរជាតិ និងជាសមាជិកក្រុមប្រកួតលើគម្រោង Eco Fly Cambodia បាននិយាយថា កម្មវិធីយុវជន២១ បានផ្ដល់ឱកាសដល់យុវជនដែលមានគំនិតច្នៃប្រឌិតក្នុងការបង្កើតអាជីវកម្មនៅថ្ងៃអនាគត។ កញ្ញា ពេជ្រ ស្រីពៅ បន្តថា បើទោះជាការប្រកួតទទួលបានលទ្ធផលបែបណាក៏ដោយក៏ក្រុមរបស់ខ្លួនពេញចិត្តទទួលយក ព្រោះសមាជិកក្រុមបានបញ្ចេញអស់ពីសមត្ថភាពក្នុងការប្រកួត។

«កម្មវិធីយុវជន២១ ពិតជាល្អដែលជួយធ្វើឱ្យសិស្សនិស្សិតបានបញ្ចេញសមត្ថភាពដោយខ្លួនឯង ហើយខ្ញុំក៏ចង់ឱ្យកម្មវិធីនេះ នៅតែបន្តធ្វើនៅឆ្នាំក្រោយៗទៀត»

កញ្ញា ពេជ្រ ស្រីពៅ ជានិស្សិតឆ្នាំទី៣ នៃសាកលវិទ្យាល័យអន្តរជាតិ

កញ្ញា ចាន់ សំបូរប៉ូគីនីកា ជានិស្សិតនៃបណ្ឌិតសភាបច្ចេកវិទ្យាឌីជីថលកម្ពុជា និងជាសមាជិកក្រុមនៃគម្រោងមន្ទីរពិសោធន៍បែបឌីជីថល បាននិយាយថា តាមរយៈការចូលរួមប្រកួតកម្មវិធីយុវជន២១នេះ រូបគេ និងសមាជិកក្រុមបានយល់ច្រើនទៅលើផ្នែកហិរញ្ញវត្ថុ ក្នុងការរៀបចំផែនការចំណាយដើម្បីដំណើរការអាជីវកម្ម។ ទន្ទឹមគ្នានេះ រាល់បេក្ខជនដែលជាប់ចូលរួមក្នុងការប្រកួតក៏ទទួលបានវគ្គបណ្ដុះបណ្ដាល និងបានស្គាល់បេក្ខជនដទៃទៀតផងដែរ។

គួរជម្រាបជូនថា វគ្គប្រកួតជម្រុះយក ៣ក្រុម នៃកម្មវិធី “យុវជន២១ (Youth21)” មានបេក្ខជនចូលរួមប្រកួតចំនួន១០ក្រុម រួមមាន ១. សាកលវិទ្យាល័យអន្តរជាតិ ២. សាកលវិទ្យាល័យអន្តរជាតិ ផារ៉ាហ្គន ៣. សាកលវិទ្យាល័យអាស៊ី អឺរ៉ុប ៤. សាកលវិទ្យាល័យអង្គ ៥. បណ្ឌិតសភាបច្ចេកវិទ្យាឌីជីថលកម្ពុជា ៦. សាកលវិទ្យាល័យភូមិន្ទភ្នំពេញ ៧. សាកលវិទ្យាល័យជាតិជាស៊ីមកំចាយមារ ៨. វិទ្យាស្ថានខេមអេដ ៩. សាកលវិទ្យាល័យវិទ្យាសាស្រ្តសុខាភិបាល ១០. សាកលវិទ្យាល័យវេស្ទើន៕