ទំនាក់ទំនងរវាងក្មេងវ័យជំទង់ជាមួយនឹងអ្នក​អាណាព្យាបាល បានក្លាយជាចំណុចដ៏អៀនប្រៀនរបស់យុវជនសម័យនេះ ខណៈការសន្ទនា ដើរតួនាទីយ៉ាងសំខាន់ដើម្បីសុំឱ្យអ្នក​អាណាព្យាបាលគាំទ្រពេលខ្លួនត្រូវការសម្រេចនូវអ្វីដែលខ្លួនប៉ងប្រាថ្នា។ តាមរយៈគេហទំព័រ Kidshealth បានបង្ហាញគន្លឹះមួយចំនួនក្នុងចាប់ផ្តើមនិយាយ និងការបង្កើនភាពស្និទ្ធស្នាលជាមួយម្តាយឪពុក ឬអ្នកអាណាព្យាបាល ។ 

១. និយាយពីនេះពីនោះប្រចាំថ្ងៃ ៖ ក្នុងនាមជាកូន គួរតែបង្កើតទម្លាប់មួយដែលនិយាយទៅកាន់អ្នក​អាណាព្យាបាលអំពីរឿងរ៉ាវដែលខ្លួនបានជួបប្រទះប្រចាំថ្ងៃ ប្រាប់ឪពុកម្តាយអំពីចំណុចល្អៗរបស់ខ្លួនឯង ដូចជាពិន្ទុដែលទទួលបានពីសាលា ឬរឿងកំប្លែងដែលមិត្តរបស់ខ្លួនបានប្រាប់នៅសាលាជាដើម។ កាលដែលមានទម្លាប់និយាយគ្នាប្រចាំថ្ងៃ ជួយឱ្យមានភាពស្និទ្ធស្នាលជាមួយអាណាព្យាបាលច្រើនជាងមុន ហើយនៅពេលជួបប្រទះនូវរឿងអ្វីមួយ គឺរឹតតែផ្តល់នូវភាពងាយស្រួលក្នុងការស្នើសុំជំនួយ ឬក៏ពិភាក្សាជាមួយម្តាយឪពុក។

២. រៀបរាប់អំពីបញ្ហាដែលកើតមានប្រចាំថ្ងៃ ៖ ក្មេងជំទង់ខ្លះគិតថា ការចែករំលែកបញ្ហា អាចនឹងធ្វើឱ្យឪពុកម្តាយអាក់អន់ចិត្ត ឬក៏បារម្ភខ្លាំង ប៉ុន្តែត្រូវចាំថា អ្នក​អាណាព្យាបាល ឬឪពុកម្តាយមានសមត្ថភាពផ្លូវចិត្តគ្រប់គ្រាន់ក្នុងការគ្រប់គ្រង មិនថារឿងទាំងនោះតូចក្ដី ធំក្ដី។ ប្រសិនបើឃើញថា ឪពុកម្តាយហាក់មានមន្ទិល គឺបញ្ជាក់ឱ្យឃើញថា ពួកគាត់បានយកចិត្តទុកដាក់ជាមួយកូន និងមានក្ដីស្រឡាញ់ពិតចំពោះកូនៗ។

៣. និយាយអំពីអ្វីដែលកំពុងព្រួយបារម្ភ ៖ ប្រសិនបើកំពុងមានក្ដីបារម្ភចំពោះអ្វីមួយ សូមអនុញ្ញាតឱ្យអ្នក​អាណាព្យាលមានឱកាសដឹងអំពីបញ្ហារបស់ខ្លួន ពីព្រោះគ្រាន់តែនិយាយអំពីអ្វីដែលខ្លួនកំពុងតែបារម្ភ ក៏អាចជួយឱ្យក្ដីបារម្ភទាំងនោះបានធូរស្រាលមួយចំណែកដែរ។ ពីព្រោះអ្នក​អាណាព្យាបាល ឬឪពុកម្តាយអាចនឹងមានលទ្ធភាពជាងក្នុងការដោះស្រាយបញ្ហា។

៤. និយាយរឿងក្នុងចិត្ត ៖ ការនិយាយរឿងក្នុងចិត្តចេញមកក្រៅ ជួយឱ្យស្គាល់ខ្លួនឯងកាន់តែច្រើនជាងមុន ហើយក៏ជួយឱ្យគ្រប់គ្រងអារម្មណ៍ខ្លួនឯងបានប្រសើរថែមមួយកម្រិតទៀត។ អ្នក​អាណាព្យាបាល ជាមនុស្សម្នាក់ដ៏សំខាន់ និងជាទីកន្លែងដ៏ល្អដែលអាចចែកចាយបានគ្រប់រឿង។ ក្រោយនិយាយរឿងក្នុងចិត្តជាមួយអ្នក​អាណាព្យាបាល គឺអាចនឹងរកឃើញនូវភាពរីករាយបន្ថែម ហើយអាចធ្វើជាខ្លួនឯងបានគ្រប់ពេលគ្រប់វេលា។

៥. ចំណាយពេលជាមួយម្តាយឪពុកធ្វើសកម្មភាពសប្បាយៗ ៖ ការចំណាយពេលនៅជាមួយអ្នក​អាណាព្យាបាលឱ្យ​បានច្រើន គឺជាការបង្កើតបរិយាកាសដ៏ល្អក្នុងការនិយាយគ្នាបានគ្រប់ពេល។ កូនៗ គួរស្នើឱ្យឪពុកម្តាយនាំទៅដើរកម្សាន្តនៅតាមសួន ទៅលេងហ្គេម លេងកីឡា ចម្អិនអាហារជាមួយគ្នា ឬក៏មើលភាពយន្តជាដើម។ ការចំណាយពេលជាមួយគ្នា ជួយបង្កើននូវភាពរីករាយនិងភាពស្និទ្ធស្នាល។ ដែលកត្តាទាំងនេះហើយ ជាឱកាសបើកចំហកិច្ចសន្ទនាទាំងរឿងធំ និងរឿងតូច៕