កម្មវិធីថ្នាក់ពីរភាសា បារាំង-ខ្មែរ គឺជាកម្មវិធីរៀនភាសាបារាំងច្រើនជាងកម្មវិធីក្នុងថ្នាក់ធម្មតាផ្ដោតទៅលើមុខវិជ្ជាវិទ្យាសាស្រ្ត រួមមាន គណិតវិទ្យា រូបវិទ្យា និងជីវវិទ្យា ដោយប្រើប្រាស់ជាភាសាបារាំង។ ទន្ទឹមគ្នានេះ គ្រូបង្រៀនថ្នាក់ពីរភាសា បារាំង-ខ្មែរ នៅតែជាតម្រូវការរបស់កម្ពុជា ក្នុងការអប់រំបណ្ដុះបណ្ដាលធនធានមនុស្សចាប់កម្រិតបឋមសិក្សារហូតដល់ឧត្តមសិក្សា សម្រាប់មុខវិជ្ជាវិទ្យាសាស្រ្តដោយប្រើប្រាស់ភាសាបារាំង។

លោកជំទាវ ឃួន វិច្ឆិកា អ្នកនាំពាក្យក្រសួងអប់រំ​ យុវជន និងកីឡា មានប្រសាសន៍ថា ថ្នាក់ពីរភាសា បារាំង-ខ្មែរ ជាកម្មវិធីបង្កើតឡើងក្រោមកិច្ចសហប្រតិបត្តិការរវាងកម្ពុជា-បារាំង ចាប់តាំងពីខែមេសា ឆ្នាំ១៩៩៩ ហើយក្នុងឆ្នាំ២០១៤ ភាគីបារាំងបានបញ្ចប់ការគាំទ្រផ្នែកថវិកាទៅលើកម្មវិធីនេះ។ លោកជំទាវ បន្តថា ដោយសារមើលឃើញអំពីសារៈសំខាន់របស់ថ្នាក់ពីរភាសាចំពោះលទ្ធផលសិក្សារបស់សិស្សានុសិស្សកន្លងមក ក៏ដូចជាការលើកកម្ពស់ការអប់រំភាសាបរទេស ជាពិសេសភាសាបារាំង គឺរាជរដ្ឋាភិបាលកម្ពុជាបានបន្តកម្មវិធីនេះឱ្យអនុវត្តមកដល់បច្ចុប្បន្ន។

អ្នកនាំពាក្យក្រសួងអប់រំ បញ្ជាក់បន្ថែមថា ដើម្បីឆ្លើយតបតម្រូវការធនធានមនុស្សផ្នែកគ្រូបង្រៀនថ្នាក់ពីរភាសា បារាំង-ខ្មែរ ក្រសួងអប់រំ បានដាក់បញ្ជូលការរៀន និងបង្រៀនភាសាបារាំង នៅកម្រិតសាកលវិទ្យាល័យ ជាក់ស្ដែងនៅក្នុងសាកលវិទ្យាល័យភូមិន្ទភ្នំពេញ ដែលតម្រូវឱ្យអ្នកសិក្សាក្នុងមុខវិជ្ជារូបវិទ្យា ជីវវិទ្យា គណិតវិទ្យា រៀនភាសាបារាំងបន្ថែម។

លោកជំទាវ ឃួន វិច្ឆិកា បន្ថែមថា និស្សិតដែលបានរៀនភាសាបារាំងបន្ថែមលើមុខវិជ្ជាវិទ្យាសាស្រ្តដែលខ្លួនបានជ្រើសរើសជាមុខជំនាញសម្រាប់ការសិក្សាថ្នាក់បរិញ្ញាបត្រ គឺដើម្បីមានឱកាសប្រឡងជាប់ជាក្របខណ្ឌគ្រូបង្រៀន ហើយចូលបណ្ដុះបណ្ដាលក្នុងសាលាគរុកោសល្យ ដើម្បីក្លាយទៅជាគ្រូបង្រៀនថ្នាក់ពីរភាសានេះ។ នេះមានន័យថា ក្រៅពីការដាក់ឱ្យមានថ្នាក់ពីរភាសា នៅក្នុងសាកលវិទ្យាល័យ ក្នុងនោះក្រសួងក៏ដាក់ឱ្យអនុវត្តថ្នាក់ភាសាបារាំងនៅក្នុងសាលាគរុកោសល្យ ហើយកន្លងមកក្រសួងអប់រំ តែងធ្វើការបណ្ដុះបណ្ដាលជារៀងរាល់ឆ្នាំ ដើម្បីឆ្លើយតបតម្រូវការថ្នាក់ពីរភាសានេះ។

អ្នកនាំពាក្យក្រសួងអប់រំ បញ្ជាក់ថា គ្រូបង្រៀនដែលអាចទៅបង្រៀនថ្នាក់ពីរភាសា បារាំង-ខ្មែរ នេះបាន ទី១. ត្រូវមានចំណេះដឹងផ្នែកភាសាបារាំងជ្រៅជ្រះ ទី២. គ្រូបង្រៀនមុខវិជ្ជាវិទ្យាសាស្រ្តត្រូវបង្រៀនមុខវិជ្ជាគណិតវិទ្យា រូបវិទ្យា និងជីវវិទ្យា ជាភាសាបារាំង។ មានន័ថា គ្រូបង្រៀនក្នុងថ្នាក់ពីរភាសា បារាំង-ខ្មែរ នេះ ក្រៅពីជាគ្រូបង្រៀនមុខវិជ្ជាភាសាបារាំង គឺគ្រូបង្រៀនមុខវិជ្ជាវិទ្យាសាស្រ្តដូចជា គណិតវិទ្យា រូបវិទ្យា ជីវវិទ្យា ទាមទារឱ្យចេះភាសាបារាំងច្បាស់លាស់ និងមុខវិជ្ជាវិទ្យាសាស្រ្តច្បាស់លាស់ផងដែរ។

បើតាម លោកជំទាវ ឃួន វិច្ឆិកា កម្មវិធីថ្នាក់ពីរភាសាបារាំង-ខ្មែរ ក្រសួងអប់រំ កំពុងអនុវត្តនៅក្នុងសាលារៀន ក្នុងខេត្តក្រុងចំនួន៧ រួមមាន រាជធានីភ្នំពេញ សៀមរាប កំពង់ចាម ព្រះសីហនុ កណ្ដាល តាកែវ និងបាត់ដំបង។ ក្នុងនោះ រាជធានីភ្នំពេញ មានវិទ្យាល័យព្រះស៊ីសុវត្ថិ និងវិទ្យាល័យចតុមុខ, ខេត្តសៀមរាប មានវិទ្យាល័យអង្គរ និងបឋមសិក្សាវត្តបូណ៌, ខេត្តកំពង់ចាម មានវិទ្យាល័យព្រះសីហនុ និងបឋមសិក្សាឧត្តរ, ខេត្តព្រះសីហនុ មានវិទ្យាល័យហ៊ុនសែនមិត្តភាព វិទ្យាល័យក្រុងព្រះសីហនុ អនុវិទ្យាល័យសម្ដេចឪ បឋមសិក្សាផ្សារលើ និងបឋមសិក្សាហ៊ុនសែនមិត្តភាព, ខេត្តកណ្ដាល មានវិទ្យាល័យហ៊ុនសែនសេរីភាព និងបឋមសិក្សាហ៊ុនសែនព្រែកឬស្សី, ខេត្តតាកែវ មានវិទ្យាល័យជាស៊ីមតាកែវ និងខេត្តបាត់ដំបង មានវិទ្យាល័យព្រះមុនីវង្ស បឋមសិក្សាសម្ដេចជាស៊ីម បឋមសិក្សា២ធ្នូ ព្រមទាំងគ្រោងពង្រីកវិសាលភាពនៅក្នុងពេលអនាគតទៅកាន់វិទ្យាល័យនេតយ៉ង់ផងដែរ។

លោកបណ្ឌិត ជេត ជាលី សកល​វិទ្យាធិការនៃសកលវិទ្យាល័យភូមិន្ទភ្នំពេញ បានលើកឡើងថា កាលពីដើម អក្សរសាស្រ្តបារាំង ជាជំនាញមួយ ដែលធ្លាប់មានសិស្ស និស្សិត ចាប់អារម្មណ៍រៀនជាច្រើន តែក្រោយមក​កម្រិត​នៃនិសិ្សតដែលចាប់អារម្មណ៍ហាក់ថមថយ និងប្រើប្រាស់ចាំបាច់សម្រាប់និស្សិតពេទ្យ។ យ៉ាងណាមិញ លោកបណ្ឌិតថា ភាសាបារាំង នៅតែសំខាន់សម្រាប់កម្ពុជា ដោយសារឯកសារ​ជាច្រើន​និយាយអំពីកម្ពុជា ត្រូវបានចងក្រងជាភាសាបារាំង។

គួរជម្រាបជូនថា និស្សិតដែលបញ្ចប់ការសិក្សាអក្សរសាស្រ្តបារាំង នឹងទទួលបានចំណេះដឹង ផ្នែកវប្បធម៌ អរិយធម៌ សង្គមសេដ្ឋកិច្ច និងប្រវត្តិសាស្ត្រ ភូមិសាស្រ្តនៃប្រទេសបារាំង, ផ្នែកវិធីសាស្រ្តបង្រៀនភាសាបារាំង, ផ្នែកបកប្រែភាសា​បារាំង-ខ្មែរ និងផ្នែកភាសាបរទេសសម្រាប់ឯកទេសភោជនីយអាហារ សណ្ឋាគារ និងឯកទេសផ្សេងទៀត។

ចំពោះនិសិ្សតបញ្ចប់ការសិក្សាជំនាញនេះ អាចបម្រើការងារដូចជា៖ ជាសាស្រ្តាចារ្យភាសាបារាំងតាមគ្រឹះស្ថាន​សិក្សាអប់រំ, ធ្វើការតាមក្រុមហ៊ុនបកប្រែ ក្រុមហ៊ុនឯកជន ស្ថានទូត ឬអង្គការក្រៅរដ្ឋាភិបាល ឬជាមគ្គុទ្ទេសក៍​ផ្នែកភាសាបារាំង ជាដើម៕