ក្នុងសន្និសីទឧត្តមសិក្សាកម្ពុជា-ឥណ្ឌូនេស៊ីលើកទី២ ដែលបាន​ប្រព្រឹត្ត​ទៅកាលពីសប្តាហ៍​កន្លងទៅនេះ អ្នក​អប់រំ​មក​ពីសាកលវិទ្យាល័យ​នានា​ក្នុងប្រទេស​កម្ពុជា និង​ឥណ្ឌូនេស៊ី បានបង្ហាញពីទំនាក់ទំនងស៊ីសង្វាក់រវាងវិស័យអប់រំ និងឧស្សាហកម្មដើម្បីរួមចំណែក ដោះស្រាយបញ្ហាប្រឈមនានាដូចជា បញ្ហាក្នុងសង្គម សេដ្ឋកិច្ច និងបរិស្ថានដើម ក៏ដូចជាការរួមបញ្ចូល​អ្វីមួយ​ថ្មី​ទៅក្នុង​វិស័យ​ណាមួយ (នវានុវត្តន៍) រួមទាំងពង្រីកការប្រកួតប្រជែងជាសាកល។​

ថ្លែងនៅក្នុងការបើកកម្មវិធី លោកបណ្ឌិត ឃៀង សុធី សាកលវិទ្យាធិការ នៃសាកលវិទ្យាល័យខេមតិច បានមានប្រសាសន៍ថា សន្និសីទនេះ គឺជាការផ្តល់ឱកាសឱ្យ​យើងទាំងអស់គ្នាផ្លាស់ប្តូរគំនិត  ការចែករំលែកការអនុវត្តល្អៗ  ព្រមទាំងស្វែងយល់កិច្ចសហការដែលជួយជំរុញវិស័យអប់រំ និងឯកជនរបស់ប្រទេសទាំងពីរឱ្យកាន់តែរីកចម្រើន។

ដើម្បីឱ្យមានការជំរុញចំណងមិត្តភាពរឹងមាំឡើង ត្រូវមានការលើកតម្កើងនូវការផ្លាស់ប្តូរនិសិ្សត និងធនធានបុគ្គលិកទៅក្រៅប្រទេស  បណ្តុះនូវវប្បធម៌នវានុវត្តន៍  និងនិរន្តរភាព​​​​​   ហើយយើងអាចធ្វើការរួមគ្នា ឆ្ពោះទៅរកការបង្កើតអនាគតដ៏ត្រចះត្រចង់សម្រាប់ប្រទេសជាតិរបស់យើង។

លោកបណ្ឌិត ឃៀង សុធី

ចំណែកឯកឧត្តមបណ្ឌិត Darmosumarto  ឯកអគ្គរដ្ឋទូតឥណ្ឌូនេស៊ី ប្រចាំប្រទេស​កម្ពុជា មានប្រសាសន៍ថា កិច្ចសហការនះបានជំរុញឱ្យវិស័យអប់រំមានភាពប្រសើរឡើងមួយកម្រិតទៀត ជាពិសេសបច្ចេកវិទ្យា។ តាមរយៈកិច្ចសហការនេះដែរ គឺបានចូលរួមពន្លឿនសេដ្ឋកិច្ច បរិស្ថាន និងឆ្លើយតបទៅនឹងការប្រកួតប្រជែងថ្មីៗក្នុងបរិបទសង្គម។ មួយវិញទៀតបានជីករំលើងគន្លឹះឱ្យរក្សាតុល្យភាពរវាងការជំរុញសេដ្ឋកិច្ច និងការដោះស្រាយបញ្ហាឬការគិតគួរអំពីបរិស្ថាន។ រួមទាំងជំរុញឱ្យកម្ពុជា និងឥណ្ឌូណេស៊ីមានការស្វះស្វែងបង្កើនកិច្ចសហការពង្រឹងទំនាក់ទំនងនិងរក្សាសន្តិភាព។

សន្និសីទឧត្តមសិក្សាកម្ពុជា-ឥណ្ឌូនេស៊ីលើកទី២ បាន​ប្រព្រឹត្តទៅកាលពីថ្ងៃទី០២ ឧសភា ២០២៤ ក្រោមប្រធានបទ ការជំរុញភាពជាដៃគូ  និងកិច្ចសហការរវាងវិស័យអប់រំនិងឧស្សាហកម្ម ដែលរៀបចំដោយសាកលវិទ្យាល័យខេមតិចសហការជាមួយនិងសាកលវិទ្យាល័យ Universitas Merdeka Malang (UNMER)ប្រទេសឥណ្ឌូនេស៊ី។

គោលបំណងសំខាន់ៗរបស់សន្និសីទនេះ គឺសម្របសម្រួលកិច្ចសន្ទនា និងការផ្លាស់ប្តូរចំណេះដឹងរវាងអ្នកអប់រំ និងវិស័យឯកជន​ដោយផ្តោតលើការរួមបញ្ចូលគ្នារវាងសហគ្រិនភាព និងនិរន្តរភាព។ ជំរុញសហគ្រិនជាមួយនឹងគំនិតបៃតង។ បង្ហាញពីកិច្ចសហការរវាងវិស័យឯកជនិងអប់រំ  ជាពិសេសផ្តោតលើសហគ្រិនភាពនិងនិរន្តរភាព។ បញ្ជាក់ឱ្យដឹងអំពីឱកាស និងការប្រឈមនៃភាពជាដៃគូដោយឥតដែនកំណត់។​ និងជំរុញបណ្តាញផ្សេងៗដើម្បីបង្កើតមិត្តភាពថ្មីៗ សម្រាប់ចម្រាញ់នូវផលប្រយោជន៍ជូនចំពោះទៅវិញទៅមក៕