ថ្លែងក្នុងព្រឹត្តិការណ៍ប្រកួតក្រុមភ្លេងកាយរឹទិ្ធថ្នាក់ជាតិលើកទី១ ឆ្នាំ២០២៤ ក្រោមប្រធានបទ “ភ្លេងក្នុងសន្តិភាព” កាលពីថ្ងៃទី៣ ខែឧសភា ឆ្នាំ២០២៤ កន្លងទៅនៅពហុកីឡាដ្ឋានជាតិអូឡាំពិក ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា និងជាប្រធានកាយរឹទ្ធិជាតិកម្ពុជា បានលើកឡើងថា ការបង្កើតកម្មវិធីប្រកួតក្រុមភ្លេងព្យុហយាត្រាពិតជាបានជួយដល់ការអភិវឌ្ឍដល់កាយសម្បទា និងសុខភាពផ្លូវចិត្តរបស់យុវជន។

ឯកឧត្តមបណ្ឌិតសភាចារ្យ ហង់ជួន ណារ៉ុន បន្ថែមថា ការប្រកួតនេះក៏ជួយដល់ការលូតលាស់ខាងបញ្ញាស្មារតី ការបណ្តុះវិន័យ និងឥរិយាបថល្អដែលគាំទ្រដល់ការសិក្សារៀនសូត្រក្នុងសាលារៀនយ៉ាងមានប្រសិទ្ធភាព។ ទន្ទឹមគ្នានេះ តបទៅនឹងអនុសាសន៍សម្តេចមហាបរវធិបតី នាយករដ្ឋមន្ត្រី ដែលបានដាក់ចេញនូវវិធានគន្លឹះចំនួន ៤ ដើម្បីលើកកម្ពស់គុណភាពអប់រំ ដូចជា ទី១.ការពង្រឹងអភិបាល កិច្ចសាលារៀន ទី២. ការពិនិត្យ កែសម្រួល និងរៀបចំកម្មវិធីសិក្សា និងសកម្មភាពក្រៅម៉ោងសិក្សា ដើម្បីពង្រឹងចំណេះដឹង វិន័យ សីលធម៌ និងឥរិយាបថរបស់សិស្ស ទី៣. ការយកចិត្តទុកដាក់លើសុខភាពរបស់សិស្ស និង ទី៤. ភាពជាដៃគូរដ្ឋ និងសហគមន៍ដើម្បីលើកកម្ពស់ការអប់រំ។

រដ្ឋមន្ត្រីក្រសួងអប់រំ បញ្ជាក់បន្ថែមថា វិធីសាស្រ្តអប់រំតាមរយៈការហ្វឹកហាត់ក្នុងក្រុមភ្លេងព្យុហយាត្រា ជាផ្នែកមួយយ៉ាងសំខាន់ក្នុងការជួយអភិវឌ្ឍជំនាញដល់យុវជនជាច្រើនដូចជា ទី១. ការពង្រឹងវិន័យនិងការលះបង់ ២. ការគ្រប់គ្រងពេលវេលា ៣. បំណិនពហុជំនាញ ៤. ការពង្រឹងភាពធន់និងទំនុកចិត្ត និង ៥. បំណិនការងារជាក្រុម ។

យោងតាមរបាយការណ៍សកម្មភាពរបស់ប្រធាននាយកដ្ឋានសហប្រតិបត្តិការកាយរឹទ្ធិ បានឱ្យដឹងថា ការប្រកួតក្រុមភ្លេងកាយរឹទិ្ធថ្នាក់ជាតិលើកទី១ ត្រូវជ្រើសរើសជាក្រុមភ្លេងកាយរឹទិ្ធ គឺ (១). ក្រុមភ្លេងកាយរឹទិ្ធមានសមាជិកចាប់ពី ២៥នាក់ដល់ ៣០នាក់ ដែលជាសមាជិកនៃកាយរឹទិ្ធជាតិកម្ពុជា (២). សមាជិកក្រុមជាកាយរឹទិ្ធប្អូន និងកាយរឹទិ្ធជំទង់មានអាយុចន្លោះចាប់ពី១១ឆ្នាំ ទៅ២៥ឆ្នាំ (៣). មានឯកសណ្ឋានកាយរឹទ្ធិ និងឧបករណ៍ភ្លេង (៤). មានសុខភាពល្អ និងមានឆន្ទៈចូលរួមសកម្មភាពគ្រប់កាលៈទេសៈ (៥). មានគំនិតច្នៃប្រឌិត ស្មារតីធើ្វការជាក្រុម និងមានទំនួលខុសត្រូវខ្ពស់។

ព្រិត្តិការណ៍ប្រកួតក្រុមភ្លេងកាយរឹទិ្ធនា មានក្រុមភ្លេងកាយរឹទិ្ធចូលរួមប្រកួតចំនួន ០៨ ក្រុម ប្រតិភូកាយរឹទិ្ធសរុប ២៥៦នាក់ ដូចជា៖ (១). រាជធានីភ្នំពេញ ចំនួន ៣ ក្រុម (កងឯកភាពវិទ្យាល័យវត្តកោះ វិទ្យាល័យបាក់ទូក និងវិទ្យាល័យហ៊ុនសែនប៊ុនរ៉ានី វត្តភ្នំ) (២). ខេត្តកណ្តាល ១ក្រុម (៣). ខេត្តសៀមរាប ១ក្រុម (៤). ខេត្តឧត្តរមានជ័យ ១ក្រុម (៥). ខេត្តកោះកុង ១ក្រុម និង (៦). ខេត្តរតនគិរី ១ក្រុម។

គួរជម្រាបជូនថា នាពេលកន្លងមក កាយរឹទិ្ធជាតិកម្ពុជាបានចូលរួមចំណែកជាមួយក្រសួងអប់រំ យុវជន និងកីឡា ដើម្បីអភិវឌ្ឍន៍កុមារ និងយុវជនឱ្យមានសក្កានុពលពេញលេញទាំងផ្លូវកាយ ផ្លូវចិត្ត ផ្លូវបញ្ញា ផ្លូវអារម្មណ៍ផ្លូវសង្គម និងក្លាយជាពលរដ្ឋល្អពលរដ្ឋសកល និងពលរដ្ឋសកម្មនៅក្នុងសហគមន៍រស់នៅរបស់ខ្លួនទាំងក្នុងសហគមន៍ជាតិ និងអន្តរជាតិ៕