ភ្នំពេញ – គម្រោង​អនាគត​បៃតងកម្ពុជា របស់ទីភ្នាក់ងារផ្តល់ជំនួយសហរដ្ឋអាមេរិក (USAID) បានប្រកាស​ទទួលស្នាដៃ និងគំនិតច្នៃប្រឌិត ចូលរួមយុទ្ធនាការ ប្រធានបទទី៣ «បញ្ឈប់ការចោលសំរាមមិនត្រឹមត្រូវ»។

ការប្រកួតប្រជែងនេះ អាចជាទម្រង់វីដេអូខ្លី ដែល​មានរយៈពេល ១-៣ នាទី, រឿងដែលបង្ហាញជារូបថត (Photo Story) ឬ Comic Book, Creative Infographic គំនូរ ឬ ផ្ទាំងរូបភាពដែលមានភាពច្នៃប្រឌិត ឬបទចម្រៀង បទភ្លេង ឬកំណាព្យ (អមដោយ ទំនុកច្រៀង និងអត្ថបទ) ឬ ស្នាដៃជារូបភាព ឬសោតទស្សន៍ (សម្លេង) ឬសំណេរនានាដែលមានភាពច្នៃប្រឌិត។

សម្រាប់លក្ខខណ្ឌនៃការចូលរួម គឺជាយុវជនកម្ពុជា បច្ចុប្បន្នរស់នៅក្នុងប្រទេសកម្ពុជា។ ចំពោះ សម្ហារ ឬផលិតផល (ស្នាដៃ) ក្នុងករណីមានសមាជិកច្រើនជាង១រូប សមាជិក១រូបក្នុងចំណោមសមាជិកទាំងអស់ ត្រូវមានអាយុចន្លោះពី១៥ទៅ២៤ឆ្នាំ។ សមាសភាពក្រុម មានយ៉ាងច្រើន៣រូប ហើយត្រូវមានស្រី្តយ៉ាងតិច១រូប យុវតី និងយុវជន ជនជាតិដើមភាគតិច ត្រូវបានលើកទឹកចិត្ត។ បេក្ខភាពដែលចូលរួមការប្រកួត អាចជាបុគ្គល ឬជាក្រុម ប៉ុន្តែការប្រកួតបានតែមួយ និងតែម្តងប៉ុណ្ណោះ។ បេក្ខភាពដែលធ្លាប់ចូលរួមការប្រកួតម្តងរួចហើយ ត្រូវបានលើកទឹកចិត្ត ដាក់ពាក្យចូលរួមម្តងទៀត។

ជាមួយគ្នានេះ ស្នាដៃដែលត្រូវដាក់ប្រកួត ត្រូវធ្វើឡើងជាភាសាខ្មែរ និងផ្តល់នូវគំនិត ឬដំណោះស្រាយពាក់ព័ន្ធនឹងប្រធានបទ «បញ្ឈប់ការចោលសំរាមមិនត្រឹមត្រូវ»។ ទន្ទឹមគ្នានេះ ក្រុមការងារគម្រោងរក្សាសិទ្ធិ ដក សម្ហារ ឬ ផលិតផល (ស្នាដៃ) ចេញពីការប្រកួតដោយស្វ័យប្រវត្តិ ក្នុងករណីដែល សម្ហារ ឬ ផលិតផល (ស្នាដៃ) របស់បេក្ខភាពណាមួយ មានខ្លឹមសារ និងបង្ហាញ ភាពអាសអាភាស ការញុះញង់ ការរំលោភបំពាន ការប្រើហឹង្សា ឬខ្លឹមសារដែលទាក់ទងនឹងនយោបាយ និងប៉ះពាល់ដល់ វប្បធម៌ សាសនា និង ពូជសាសន៍ ឬខ្លឹមសារអវិជ្ជមានផ្សេងទៀត។

រង្វាន់សម្រាប់ជ័យលាភីចំនួន ៥នាក់ ឬ ក្រុម រួមមាន ដំណើរទស្សនកិច្ចសិក្សា បណ្ណសរសើរ និងសម្ហារផ្សេងៗទៀត របស់គម្រោង អនាគតបៃតងកម្ពុជា។ ទន្ទឹមគ្នានេះ រង្វាន់សម្រាប់បេក្ខភាពឈានមកដល់វគ្គផ្តាច់ព្រ័ត (វគ្គទី៣) រួមមាន បណ្ណសរសើរ និងសម្ហារផ្សេងៗទៀតរបស់គម្រោងអនាគតបៃតងកម្ពុជា។

បេក្ខជនដែលមានចំណាប់អារម្មណ៍អាចដាកើស្នាដៃចូលរួមប្រកួតដោយការទទួលស្នាដៃប្រកួតចាប់ពីថ្ងៃនេះ រហូតដល់ថ្ងៃទី៩ ខែមករា ឆ្នាំ២០២៣ ម៉ោង ១១:៥៩ នាទីយប់។ បេក្ខជនអាចផ្ញើស្នាដៃរបស់ខ្លួនមកកាន់អ៊ីមែល Cambodiagreenfuture@gmail.com, ឬប្រអប់សារហ្វេសប៊ុកផេ @USAIDCambodiaGreenFuture ៕