គ្រាន់តែកាន់សៀវភៅអាន ក៏ជាចំណែកកាត់បន្ថយភាពតានតឹង ស្ត្រេស បាក់ទឹកចិត្ត រួមទាំងសម្រួលដល់គុណភាពនៃការគេងទៀតផង។ ការរស់នៅប្រចាំថ្ងៃ មានភាពមមាញឹកជាច្រើន​ ជាពិសេសអ្នកមានគ្រួសារ ដោយខ្លះត្រូវបំពេកូនឱ្យគេង និងមានកាតព្វកិច្ចចាំបាច់ដទៃទៀត ។ តែយ៉ាងណាកុំភ្លេចប្រើពេលយ៉ាងហោចណាស់ប្រាំមួយនាទីក្នុងការរក្សាទម្លាប់ល្អ ដើម្បីកាត់បន្ថយស្ត្រេស ដែលសកម្មភាពទាំងនោះមានដូចជា​ អានសៀវភៅ, ងូតទឹកក្តៅអ៊ុនៗ, រៀបចំសម្រាប់ថ្ងៃថ្មី និងសម្អាតបន្ទប់គេងជាដើម។

តាមរយ:​ គេហទំព័រ Toms Guide បានលម្អិតជូនបន្ថែមនៅខាងក្រោម ៖

១. អានសៀវភៅ ៖ ការចាប់កាន់សៀវភៅអានមុនពេលចូលគេង គឺជាដំណោះស្រាយដ៏ល្អមួយ ទោះបីជា​ អានបានត្រឹមតែប្រាំមួយនាទីក៏ដោយ។ ការអានបានប្រាំមួយនាទី បានរួមចំណែកកាត់បន្ថយភាពតានតឹងបាន ៦៨ ភាគរយ បើប្រៀបធៀបនឹងការស្តាប់តន្រ្តីវិញ បានត្រឹមតែ៦១ភាគរយប៉ុណ្ណោះ។

ស្ត្រេសបង្កផលប៉ះពាល់ដល់គុណភាពដំណេក គេងមិនលក់ ឬប្រើរយ:ពេលយូរក្នុងការគេងឱ្យលក់ជាដើម។ ដូច្នេះការបន្ថែមទម្លាប់អានរៀងរាល់ល្ងាច ជំនួសឱ្យការសម្លឹងអេក្រង់ទូរស័ព្ទ មិនត្រឹមតែផ្តល់ផលវិជ្ជមានចំពោះភាពស្ងប់នៃការគេងប៉ុណ្ណោះទេ ប៉ុន្តែធ្វើឱ្យអារម្មណ៍ល្អបន្ថែមមួយកម្រិតទៀត។ ចំពោះការជ្រើសរើសប្រភេទសៀវភៅ គឺអាស្រ័យលើតម្រូវការ និងចំណូលចិត្តរៀងៗខ្លួន។

២. ងូតទឹកក្តៅអ៊ុនៗ ៖ បន្ទាប់ពីមានសៀវភៅនៅក្នុងដៃដើម្បីអាន ជាការកម្សាន្តហើយ សកម្មភាពមួយទៀតដែលជួយបន្ធូរអារម្មណ៍នោះ គឺការងូតទឹកក្តៅអ៊ុនៗ បើមានល្អាងទឹកសម្រាប់ត្រាំខ្លួន រឹងរឹតតែប្រសើរ បន្ទប់ទឹកមិនមែនសម្រាប់តែប្រើប្រាស់បន្ទោរបង់ ឬងូតទឹកជំរះកាយតែប៉ុណ្ណោះទេ​ គួរមានការប្រែក្លាយទៅជាកន្លែងមួយដែលផ្តល់នូវការស្មឹងស្មាត។ ដូច្នេះរៀបចំបន្ទប់ទឹកឱ្យបានស្អាត​ ដោយការប្រើប្រាស់អំពូលភ្លើងស្របនឹងទីតាំង ឬការជ្រើសរើសទៀនក្រអូបសម្រាប់ដាក់ក្នុងបន្ទប់ទឹក ដើម្បីបន្ថយភាពតានតឹង ​និងបង្កើនភាពស្រស់ស្រាយពេលងូតទឹក។

៣. ការរៀបចំសម្រាប់ថ្ងៃថ្មី ៖​ ការដែលមិនបានរៀបចំសម្រាប់ថ្ងៃបន្ទាប់ បណ្តាលឱ្យអារម្មណ៍មានភាពច្របូកច្របល់ ជំរុញឱ្យកើតមានអាការថប់បារម្ភ។ ការត្រៀមខ្លួនសម្រាប់ថ្ងៃបន្ទាប់ មិនថាផែនការ ឬការរៀបចំសម្ភារនោះទេ សុទ្ធសឹងតែជាការរួមចំណែកកាត់បន្ថយអារម្មណ៍ឆេវឆាវ និងការចូលគេងដោយអារម្មណ៍ល្អ ព្រោះនៅពេលគេងបានគ្រប់គ្រាន់​ គេងបានស្ងប់ល្អ បានជះផលវិជ្ជមានទៅកាន់ថ្ងៃបន្ទាប់ផងដែរ។

៤. សម្អាតបន្ទប់គេង ៖ ការសម្អាត​រៀបចំសម្ភារក្នុងបន្ទប់ ឬការយករបស់ដែលមិនចាំបាច់ចេញពីក្នុងបន្ទប់ បានបង្កើនគុណភាពនៃការគេង។​ ព្រោះបន្ទប់ស្អាតស្រឡះល្អ ធ្វើឱ្យអារម្មណ៍ស្រឡះល្អដូចគ្នា៕