នៅក្នុងទិវាជាតិ​អប់រំ​បណ្តុះបណ្តាល​បច្ចេកទេស និង​វិជ្ជាជីវៈ (TVET Day) លើកទី៨ ឆ្នាំ២០២៥ ដែល​គ្រោង​ប្រព្រឹត្ត​ធ្វើ​នៅ​ថ្ងៃទី១៥-១៦ មិថុនា ខាងមុខនេះ នឹងមាន​ការ​បង្ហាញស្នាដៃបង្កើតថ្មី ទំនើប និង​ប្រកប​ដោយភាពច្នៃប្រឌិត បង្កើត​ឡើងដោយ​សិស្ស និស្សិត TVET សរុបចំនួន ២២៣ស្នាដៃ។

លោក ស៊ុន មេសា អ្នកនាំពាក្យ​ក្រសួងការងារ និង​បណ្តុះបណ្តាលវិជ្ជាជីវៈ មានប្រសាសន៍ថា ស្នាដៃបង្កើតថ្មី​ទាំង ២២៣ស្នាដៃនោះ គឺបង្កើតឡើង​ដោយយុវជន​កម្ពុជា មានដូចជា ដ្រូន រ៉ូបូតឆុងកាហ្វេ រថយន្ត​អគ្គិសនី ក៏​ដូចជា​ប្រព័ន្ធស្វ័យប្រវត្តិកម្ម​ផ្សេង​ជាច្រើនទៀត។

បើតាម​លោក ស៊ុន មេសា ស្នាដៃទាំងនេះ គឺជាសមិទ្ធផលរបស់​យុវជន​កម្ពុជា​ក្នុង​សតវត្សរ៍ទី២១ ដែល​មាន​សមត្ថភាព​ក្នុងការ​បណ្តុះបណ្តាល​បច្ចេកទេស និង​វិជ្ជាជីវៈ។

លោក ជិន តារ៉ា នាយកវិទ្យាស្ថាន​បច្ចេកទេស​ឧស្សាហកម្ម (ITI) បានឱ្យដឹងថា ITI ក៏​មានដាក់តាំង​បង្ហាញ​ស្នាដៃ​សិស្ស​និស្សិត​ចំនួន៥ស្នាដៃដែរ​នៅក្នុង​ឱកាស​ទិវាជាតិ​អប់រំ​បណ្តុះបណ្តាល​បច្ចេកទេស និង​វិជ្ជាជីវៈ លើកទី៨ ដោយ​រួមមានដូចជា ម៉ាស៊ីនផលិតទឹកកក, រថយន្ត​អគ្គិសនី​សម្រាប់​បូមសំរាម, ប្រព័ន្ធស្មាតស៊ីធី, ប្រព័ន្ធ​ស្រោចស្រព​ស្វ័យ​ប្រវត្តិ និង​ឧបករណ៍​សម្ភារៈ​សម្រាប់​ការ​បណ្តុះបណ្តាល​លើ​ជំនាញ​ឯកទេស​កម្មជាដើម។

ដោយឡែកវិទ្យាស្ថាន​អភិវឌ្ឍន៍​មុខ​ជំនាញ​កម្ពុជា-ថៃ ក៏​បាន​ឱ្យ​ដឹងដែរថា ត្រៀម​នឹង​យកស្នាដៃនិស្សិត​ចំនួន២ ទៅ​ដាក់បង្ហាញដល់សាធារណៈជន​ក្នុង​ឱកាស​ទិវាជាតិ​អប់រំ​បណ្តុះបណ្តាល​បច្ចេកទេស និង​វិជ្ជាជីវៈ​ លើកទី៨ ដែល​រួមមាន ម៉ាស៊ីនចិតដូងស្វ័យប្រវត្តិ និង​ម៉ាស៊ីន​សម្រួងផ្លែឈើ។ យុវជន លឿត វិសាល និស្សិត​ជំនាញ​វិស្វកម្ម​អគ្គិសនី ជាម្ចាស់ស្នាដៃម៉ាស៊ីនសម្ងួតផ្លែឈើនិយាយថា ម៉ាស៊ីន​ដែលខ្លួនបង្កើតឡើងនេះ គឺជា​សមិទ្ធផល​មួយ ក្នុង​ចំណោម​សមិទ្ធផល​ផ្សេងៗ​ទៀត​ ដែល​បញ្ជាក់​ពីសមត្ថភាព និង​គុណភាព​សិក្សា​របស់​និស្សិត TVET។

បើតាម​សេចក្តីប្រកាស​ព័ត៌មាន​របស់ក្រសួងការងារ និង​បណ្តុះបណ្តាល​វិជ្ជាជីវៈ ទិវាជាតិអប់រំបណ្តុះបណ្តាលបច្ចេកទេស និងវិជ្ជាជីវៈ លើកទី៨ ឆ្នាំ២០២៥ ក្រោមប្រធានបទ «TVET បង្កើតឱកាសការងារ សាងក្តីសង្ឃឹមដល់យុវជន» ដែលនឹងប្រព្រឹត្តទៅនៅថ្ងៃទី១៥-១៦ ខែមិថុនា ឆ្នាំ២០២៥ ចាប់ពីម៉ោង ៨ព្រឹក ដល់ម៉ោង ៨យប់ នៅមជ្ឈមណ្ឌលសន្និបាត និងពិព័រណ៍កោះពេជ្រ រាជធានីភ្នំពេញ។

ទិវាជាតិនេះ ក្រសួងនឹងរៀបចំដាក់តាំងបង្ហាញពីវឌ្ឍនភាពពីវិស័យអប់រំបណ្តុះបណ្តាលបច្ចេកទេស និងវិជ្ជាជីវៈ ដែលមានការចូលរួមពីក្រសួង ស្ថាប័ន គ្រឹះស្ថានសិក្សា វិស័យឯកជន ដៃគូអភិវឌ្ឍ និងផ្នែកពាក់ព័ន្ធនានា សរុបចំនួន ១៣៤ ស្មើនឹង ២០៥ស្តង់ ព្រមទាំងមានការធ្វើបទបង្ហាញចែករំលែកបទពិសោធន៍ពីវាគ្មិនល្បីៗ និងកម្មវិធីសំខាន់ៗដូចជា កិច្ចពិភាក្សាលើប្រធានបទ ស្តីពី «TVET បង្កើតឱកាសការងារ សាងក្តីសង្ឃឹមដល់យុវជន», ការចែករំលែកបទពិសោធន៍ការអភិវឌ្ឍន៍ជំនាញ និងកម្មវិធី ASEAN Year of Skills 2025 របស់ប្រទេសម៉ាឡេស៊ី និងគ្រឹះស្ថាន TVET មកពីប្រទេសចិន, ការតាំងបង្ហាញសមិទ្ធផលនានារបស់ក្រសួង ស្ថាប័ន គ្រឹះស្ថានសិក្សា អង្គការ សមាគម ព្រមទាំងខ្សែសង្វាក់ផលិតកម្មក្រុមហ៊ុនឯកជននានា, ការទទួលបានព័ត៌មានសិក្សាអំពីកម្មវិធីបណ្ដុះបណ្ដាលជំនាញវិជ្ជាជីវៈ និងបច្ចេកទេស មួយលានប្រាំសែននាក់ ព័ត៌មានអាហាររូបករណ៍ ហើយអាចមកចុះឈ្មោះរៀនភ្លាមៗបានដោយផ្ទាល់។

ជាមួយ​គ្នា​នៅ​ក្នុង​ទិវានោះ អ្នកចូលរួម​ក៏​អាច​មក​ដាក់ពាក្យ​ស្វែង​រក​ការងារភ្លាមៗ ជាមួយ​ក្រុមហ៊ុន​ធំៗ ដោយ​មាន​ឱកាស​ការងារ​ប្រមាណជាង ៦ម៉ឺន៣ពាន់កន្លែង៕